بۇدان بىلاي قوعامدىق ورىنداردا اقشا جيناپ, مۇقتاج جاندارعا كومەكتەسىپ جۇرگەن ەرىكتىلەر تەكسەرىلەدى. ويتكەنى سوڭعى كەزدەرى ەلىمىزدە قايىرىمدىلىقپەن اينالىساتىندار كوبەيگەن. ىشكى ىستەر مينيسترلىگى وكىلدەرىنىڭ ايتۋىنشا, مۇنداي ەرىكتىلەردىڭ ارتىندا الاياقتار تۇرۋى مۇمكىن. ال انىقتالعان جاعدايدا, ولارعا قانداي جازا قولدانىلاتىنى ازىرگە بەلگىسىز, دەپ حابارلايدى Egemen.kz.
دەسە دە مۇقتاج جاندارعا شىنىمەن كومەكتەسىپ جۇرگەندەر دە بار. ماسەلەن, 11 جاسار ءاليحان تسەرەبرال سال اۋرۋىنا شالدىققان. اناسى بالاسىمەن بىرنەشە رەت شەتەلگە بارىپ قارالىپتى. قايدا بولماسىن, اتتاپ باسساڭ, «اقشا قاجەت ەتەتىن قىمباتشىلىق زاماندا دەرتىنە داۋا بار, الايدا قاراجات جوق» دەيدى. ايتۋىنشا, اي سايىن ءاليحاننىڭ ەمىنە 600 مىڭ تەڭگەگە دەيىن قاراجات كەتەدى ەكەن. جۇبايىنىڭ جالاقىسى شايلىعىنان ارتىلمايتىن وتباسىنا قورلاردىڭ ءبىرى تەك قارجىلاي عانا ەمەس, ازىق-ت ۇلىكپەن دە قامتاماسىز ەتكەن.
«بالامدا تسەرەبرال سال اۋرۋى. بۇل دياگنوزبەن بالادا ەش ءۇزىلىس بولماۋى كەرەك. ايتپەسە سۇيەگى قيسايا باستايدى. وسى كىسىلەردى تاۋىپ قايرات مىرزانىڭ ارقاسىندا بالام قورعاۋلى. سول كىسىلەردەن كومەك سۇراعانمىن. اللاعا شۇكىر. ءبىر رەت ەمەس, ءۇش رەت كومەگىن الدىم. قارجىلاي الدىم. ويتكەنى بالاما قارجىلاي كومەك كەرەك. بالانىڭ جاردەماقىسى وزىنە جەتپەيدى», دەيدى ايسۇلۋ قاۋكەنوۆا.
كتك جازعانداي, قور وكىلدەرى سال اۋرۋىنا, اۋىر دەرتكە شالدىققان 350-دەن استام بالانىڭ ەمىنە قارجىلاي قولداۋ كورسەتىپ كەلەدى ەكەن. بۇل قور ەلىمىزدىڭ ءتورت قالاسىندا بار.
«قوعامدىق قورىمىز ءبىر وتباسىنا ناقتى سوما دايىنداپ قويدى. كەيدە وزدەرى سۇرايدى, وسىنشاما سوما كەرەك دەپ. سول كەزدە قانشا ۋاقىتتا جيناپ بولامىز, سودان كەيىن كەلەسى بالاعا جيناپ بەرەمىز. ءبىر بالاعا ءبىر اپتادا جيناپ قويامىز. كەيبىرىنە ءبىر ايدا جينايمىز, كەيبىرىنە ءتورت اپتا كەتەدى. كەزەكپەن. ول جەردە ەسەپ بەرىلەدى, بۋحگالتەرياعا بارادى عوي. اكتىمەن قابىلداپ الامىز», دەيدى «حالىقارالىق دۇنيە رۋحانيات» قوعامدىق قورىنىڭ پرەزيدەنتى جانبولات ورىنباسار.
اتالمىش قور 6 جىلدان بەرى جۇمىس ىستەپ كەلەدى. مۇندا ەرىكتىلەردەن جاساقتالعان ارنايى توپ تا بار. ولار ناۋقاس بۇلدىرشىندەردىڭ سۋرەتى جاپسىرىلعان قوراپشالارمەن قوعامدىق ورىنداردى ارالاپ, كوپشىلىكتى ساۋابى مول, يگى ءىس جاساۋعا شاقىرادى.
«ناۋقاس سابيلەردىڭ ەمىنە كومەك بەرىپ جاتىرمىز. ەرەكشە بالالاردىڭ. وسىنداي «حالىقارالىق رۋحانيات» قورىمەن بىرگە ءىس-شارالار ۇيىمداستىرامىز. سول ءىس-شارالارعا اتسالىسىپ, كومەكتەسىپ جۇرەمىن. قوعامدىق ورىنداردان, بازارلاردان نەمەسە اۆتوبۋستاردان. قوعامىمىزدا قانشاما ناۋقاس ءسابي كوپ, سولاردىڭ ەمىنە مەن دە كومەكتەسكىم كەلەدى», دەدى ەرىكتى نۇرلى سارىباي.
دەسە دە ەرەكشە بالالاردىڭ اتىن جامىلىپ, زاڭسىز جولمەن اقشا جيناپ جۇرگەن توپتار دا جوق ەمەس. جاقىندا وسى ماسەلە سەنات وتىرىسىندا دا كوتەرىلگەن. ەندى ەلىمىزدە اۆتوبۋستىڭ ىشىندە اقشا جينايتىن ەرىكتىلەردى پوليتسەيلەر تەكسەرەدى.
«قاراپ كورەيىك, زەرتتەيىك. بىراق جاقسىلىق جاساۋ ءار ادامنىڭ ءوز ەركىندە. اقشا جيناپ جۇرگەندەر ەشكىمدى بوپسالامايدى. بەرگىڭىز كەلسە — بەرەسىز, بەرگىڭىز كەلمەسە — بەرمەيسىز. بۇل ءبىرىنشى ماسەلە. ەكىنشى ماسەلە — ەرىكتىلەردىڭ ارتىندا الاياقتاردىڭ تۇرۋى دا مۇمكىن. ەگەر سونداي جاعداي كەزدەسىپ جاتسا, وندا ول ءبىزدىڭ قۇزىرەتىمىزدە», دەگەن ەدى ىشكى ىستەر ءمينيسترىنىڭ ورىنباسارى يگور لەپەحا.
ىشكى ىستەر مينيسترلىگى قوعامدىق ورىنداردا اقشا جيناپ جۇرگەن ەرىكتىلەردى ەندى ءجىتى تەكسەرمەك. ويتكەنى قاراجات جينايتىنداردىڭ كوبى — ءجاسوسپىرىم. سوندىقتان ءتۇسىندىرۋ جۇمىسىنا ولاردىڭ اتا-انالارى دا تارتىلادى. ال الاياق بولىپ تانىلعاندارعا ناقتى قانداي جازا قولدانىلاتىنى ازىرگە بەلگىسىز.