اباي اتىنداعى قازۇپۋ-دە مادەنيەت جانە اقپارات ءمينيسترى ايدا بالاەۆانىڭ توراعالىعىمەن يۋنەسكو قورعاۋىنداعى قازاقستاننىڭ تاريحي جانە مادەني مۇراسىن ساقتاۋدىڭ كەشەندى جوسپارىن ازىرلەۋ جونىندەگى جۇمىس توبىنىڭ وتىرىسى ءوتتى.
ءىس-شارا اياسىندا مينيستر ۋنيۆەرسيتەت باسشىلىعىمەن كەزدەسىپ, وقۋ ورنىنىڭ تىنىس-تىرشىلىگىمەن تانىستى. ا.بالاەۆا ۋنيۆەرسيتەت تۇلەكتەرىنىڭ شىعارماشىلىق جانە قولونەر تۋىندىلارى قويىلعان مۋزەيدى دە ارالادى. ەجەلگى دويبى ويىنىنا ارنالعان كورمەگە ەرەكشە نازار اۋدارىلدى. مينيستر قازاقستاندا ۇلتتىق سپورت تۇرلەرىن كەڭىنەن ناسيحاتتاۋدىڭ ماڭىزىن, ەلىمىزدىڭ مادەني مۇراسىندا الاتىن ورنى ەرەكشە ەكەنىن اتاپ ءوتىپ, بۇل سپورت تۇرلەرىن جاستار اراسىندا كەڭىنەن ناسيحاتتاۋ قاجەت ەكەنىن ءسوز ەتتى.
كەزدەسۋ بارىسىندا ا.بالاەۆا ەلىمىزدىڭ تاريحي-مادەني مۇراسىن ساقتاۋ مەن ناسيحاتتاۋدىڭ ماڭىزىنا توقتالىپ, بۇل كەزدەسۋ بۇكىلالەمدىك مۇرا تىزىمىنە ەنگىزىلگەن نىسانداردى قورعاۋ بويىنشا كەشەندى شارالاردى قامتاماسىز ەتۋ جولىنداعى باستى قادام ەكەنىن اتاپ ءوتتى. ول جۇمىس توبىنىڭ مۇشەلەرىن بولاشاق ۇرپاق ءۇشىن ۇلتتىق مۇرانى قورعاۋ مەن ساقتاۋعا باعىتتالعان ۇسىنىستار ازىرلەۋگە ءارى ءىس-شارالاردى جۇزەگە اسىرۋعا بەلسەندى قاتىسۋعا شاقىردى.
كەزدەسۋدە يۋنەسكو-نىڭ ماتەريالدىق ەمەس مادەني مۇرانى قورعاۋ جونىندەگى كونۆەنتسياسىن جۇزەگە اسىرۋدىڭ نەگىزگى ماسەلەلەرى, سونداي-اق مادەني داستۇرلەردى ساقتاۋ سالاسىنداعى مىندەتتەر تالقىلاندى. قاتىسۋشىلار ءجيى قولدانىلاتىن «ماتەريالدىق ەمەس» جانە «سەزىلمەيتىن قۇندىلىقتار» تەرميندەرى بويىنشا ءوز پىكىرلەرىن ءبىلدىردى. سونداي-اق قازاقستانداعى مادەني مۇرا وبەكتىلەرىن قورعاۋ جۇيەسىن جەتىلدىرۋ شارالارىنا توقتالدى. تاريحي-مادەني مۇرانى قورعاۋ مەن دامىتۋدىڭ جاڭا باستامالارى ۇسىنىلىپ, قاتىسۋشىلار وسى سالاداعى تاجىريبەلەرىن ءبولىسىپ, الداعى جۇمىستىڭ باسىم باعىتتارىن بەلگىلەدى.
اباي اتىنداعى قازۇپۋ-دىڭ پروفەسسورى, ماتەريالدىق ەمەس مادەني مۇرانى قورعاۋ ۇلتتىق كوميتەتىنىڭ مۇشەسى جانەركە شايگوزوۆا «اباي جولىمەن» جوباسى اياسىندا ماتەريالدىق ەمەس مادەني مۇرانى ساقتاۋدىڭ ماسەلەلەرى مەن كەلەشەگى» تاقىرىبىندا بايانداما جاسادى. جوبانىڭ نەگىزگى ماقساتى – قازاقستاننىڭ مادەني مۇراسىن ەل ىشىندە دە, شەتەلدە دە ءتيىمدى قورعاۋعا جانە ىلگەرىلەتۋگە باعىتتالعان ارەكەتتەر مەن شارالاردىڭ تۇراقتى نەگىزىن جاساۋ.
جوبا اياسىندا ەلىمىزدە العاش رەت ماتەريالدىق ەمەس مادەني مۇرا سالاسىنداعى ءبىلىم بەرۋ, اقپاراتتىق-ادىستەمەلىك جۇمىس جانە مامانداردىڭ بىلىكتىلىگىن ارتتىرۋ ماسەلەلەرى كوتەرىلىپ وتىر. تاريحي-مادەني مۇرا سالاسىنداعى مامانداردى دايارلاۋ ءۇشىن پانارالىق ءبىلىم بەرۋ باعدارلامالارى ازىرلەنىپ, سىناقتان وتكىزىلەدى. ۇلى جىبەك جولى بويىنداعى (سىعاناق, جەتىاسار, قايالىق, ت.ب.) ايشىقتى ەسكەرتكىشتەردى زەرتتەۋ, رەستاۆراتسيالاۋ جانە مۋزەيگە اينالدىرۋدى قوسا العاندا, ماتەريالدىق ەمەس مادەني مۇرا سالاسىنداعى عىلىمي جوبالاردى جۇزەگە اسىرۋ دا جوسپارلانىپ وتىر. سونداي-اق قازاقستاننىڭ مادەني مۇراسىن ەل ىشىندە دە, شەتەلدە دە تانىمال ەتۋگە باعىتتالعان اباي ورتالىقتارىنىڭ حالىقارالىق جانە ۇلتتىق جەلىلەرى, ەلىمىزدىڭ تاريحي-مادەني جانە ماتەريالدىق ەمەس مۇراسىن كورسەتەتىن «تسيفرلىق فورماتتاعى مۇرا» ۆەب-پورتالى قۇرىلادى.
«ارنايى توپتىڭ جۇمىسىن كۇشەيتىپ, ونى وسكەلەڭ ۇرپاق اراسىندا قازاقتىڭ مادەنيەتىن, سالت-ءداستۇرىن كورسەتەتىن ۇلتتىق قۇندىلىقتاردى ءتيىمدى ناسيحاتتاۋعا باعىتتاۋ قاجەت. ۇرپاقتار ساباقتاستىعىن قامتاماسىز ەتۋ, ۇلتتىق كودىمىزدىڭ ەلەمەنتتەرىن زەردەلەۋ جانە ولاردى دۇرىس پايدالانۋ, سونداي-اق ۇسىنىمدار مەن ناقتى ۇسىنىستار ازىرلەۋ ماڭىزدى», دەدى ا.بالاەۆا.
وتىرىس سوڭىندا ۇسىنىلعان ءىس-شارالاردى ورىنداۋ, بارلىق مۇددەلى تاراپتىڭ كۇش-جىگەرىن ۇيلەستىرۋ جانە ماتەريالدىق ەمەس مادەني مۇرانى قورعاۋ باعدارلاماسىن جۇزەگە اسىرۋ بويىنشا ناقتى ۇسىنىستار ازىرلەۋدە الداعى قادامدار تالقىلاندى.