«Astana Hub» حالىقارالىق تەحنوپاركى ەلىمىزدە جاساندى ينتەللەكتىنى (جي) دامىتاتىن «AI Movement» باستاماسىن ىسكە قوستى. بۇل جوبا مەملەكەت باسشىسىنىڭ جولداۋىندا ايتىلعان تاپسىرماسى اياسىندا جۇزەگە اسىپ وتىر.
اۋقىمدى جوبا تالانتتاردى تارتۋ, وقۋ جانە رەسۋرستار سەكىلدى ءۇش باعىتتى قامتيدى. ءبىرىنشى باعىت اياسىندا جاساندى ينتەللەكت سالاسىنداعى ءبىلىمىڭىزدى تەكسەرىپ, باعالى سىيلىقتار ۇتىپ الۋعا مۇمكىندىك بەرەتىن «Astana Hub» ءموبيلدى قوسىمشاسىنداعى «AI Quest» ويىنى مەن وڭىرلەردە جي تەحنولوگياسىن ناسيحاتتاۋدى ماقسات ەتكەن «Roadshow» ۇيىمداستىراتىن ءىرى مۋلتيلوكاتسيالىق حاكاتون – «Decentrathon 2.0.» جوبالارىن جۇزەگە اسىرادى.
ەكىنشىسى جاساندى ينتەللەكت سالاسىنداعى مامانداردىڭ ءبىلىم دەڭگەيىن كوتەرۋگە ارنالعان. بۇعان «AI People Bootcamp» (4 اپتالىق ونلاين ينتەنسيۆ) جانە «جي نەگىزدەرى: ChatGPT» ونلاين كۋرسى سەكىلدى وقۋ باعدارلامالارى كىرەدى. سونداي-اق «Tomorrow School» جاساندى ينتەللەكت مەكتەبىن اشۋ مەن «Tech Orda» باعدارلاماسى اياسىندا مەكتەپ مۇعالىمدەرى مەن جوعارى وقۋ ورنى وقىتۋشىلارىنىڭ بىلىكتىلىگىن ارتتىرۋ دا كوزدەلىپ وتىر. مۇنىڭ ءبارى – جاساندى ينتەللەكت سالاسىنداعى جاڭا بۋىن ماماندارىن دايارلاماق.
سونىمەن قاتار «Astana Hub» اشىق تۇردە جي ستارتابى مەن مودەلىن مەڭگەرۋگە ارنالعان اشىق دەرەك جيناقتارى جايىندا اقپارات ۇسىنادى. جي ستارتاپتارىنىڭ دامۋىنا قارجىلىق قولداۋ كورسەتەتىن «AI’preneurs» اتتى اكسەلەراتور جۇمىس ىستەيدى.
جوبادا قاتىسۋشىلاردىڭ ىنتاسى مەن وقۋعا قىزىعۋشىلىعىن ەسەلەيتىن ويىنداردى قولدانۋعا ەرەكشە دەن قويىلعان. بۇل جاساندى ينتەللەكتىنى مەڭگەرەتىن جاڭا دەڭگەيدەگى مامانداردى قالىپتاستىرۋعا ىقپال ەتەدى.
قىسقاسى, «AI Movement» ەلىمىزدەگى جاساندى ينتەللەكتىنى دامىتا وتىرىپ, كەلەسى جىلى اشىلاتىن ۇلتتىق جاساندى ينتەللەكت ورتالىعىن قۇرۋعا نەگىز قالاماق.