پاۆلوداردا «ەرتىس-بايان» ءى رەسپۋبليكالىق تەاترلار فەستيۆالى ءوتىپ جاتىر. ونەر دوداسى 25 قىركۇيەككە دەيىن جالعاسادى. وندا العاشقى ىرىكتەۋدەن وتكەن 11 تەاتر ءوز قويىلىمدارىن كورسەتەدى.
جۇسىپبەك ايماۋىت ۇلى اتىنداعى پاۆلودار وبلىستىق قازاق مۋزىكا-دراما تەاترىندا «ەرتىس-بايان» I رەسپۋبليكالىق تەاترلار فەستيۆالى باستالدى. اتالعان تەاتر باسشىسى ارمان تەمىربەكتىڭ ايتۋىنشا, ونەر ۇجىمدارىنىڭ دوداسى ج.ايماۋىت ۇلىنىڭ 135 جىلدىعىنا ارنالىپ وتىر.
– رەسپۋبليكالىق اۋقىمداعى فەستيۆال پاۆلودار وبلىسى اكىمدىگىنىڭ قولداۋىمەن ۇيىمداستىرىلۋدا. مۇنداي ءىرى تەاترلار سىنى ەرتىس-بايان وڭىرىندە وسىدان ون شاقتى جىل بۇرىن وتكەن ەكەن. اراعا ءبىراز جىل سالىپ ءداستۇرلى ءىس-شارا جالعاسىن تاپتى. فەستيۆال وتاندىق تەاتر ونەرىندەگى ۇزدىك جۇمىستاردى, زاماناۋي تەاتر ءۇردىسىنىڭ نەگىزگى تەندەنتسيالارىن انىقتاۋ جانە تەاتر ونەرىنىڭ كلاسسيكالىق, زاماناۋي مۇرالارى اراسىنداعى شىعارماشىلىق بايلانىستى نىعايتۋ, اكتەرلىك كاسىبي دەڭگەيدى شىڭداۋ, تەاتر الەمىندەگى جاڭا ەسىمدەردى انىقتاۋ ماقساتىندا قولعا الىنعان. ەلىمىزدەگى ەڭ ۇزدىك دەگەن سپەكتاكلدەر پاۆلودار تورىندە قويىلىپ, جەرگىلىكتى كورەرمەن دە وزگە اكتەرلەردىڭ ونەرىنە قارىق بولادى دەگەن ويدامىز. بۇل فەستيۆالداعى نەگىزگى تالاپ – قاتىساتىن جۇمىستار بۇرىن وزگە تەاترلاردىڭ ساحناسىندا قويىلماۋى كەرەك ءارى كەيىنگى ءبىر جىل ىشىندە پرەمەراسى وتكەن بولۋعا ءتيىس. بۇل ءبىزدىڭ وزگە ارىپتەستەرىمىزدىڭ اراسىنداعى باسەكەلەستىكتى ارتتىرا تۇسەدى دەگەن سەنىمدەمىز, دەيدى ا.تەمىربەك.
رەسپۋبليكالىق سىنعا ەلىمىزدىڭ تۇپكىر-تۇپكىرىنەن 11 تەاتر, اتاپ ايتقاندا ج.ايماۋىت ۇلى تەاترىنان بولەك, س.قوجامقۇلوۆ اتىنداعى ۇلىتاۋ وبلىسىنىڭ قازاق مۋزىكالىق-دراما تەاترى, اباي اتىنداعى اباي وبلىستىق قازاق مۋزىكا-دراما تەاترى, س.مۇقانوۆ اتىنداعى سولتۇستىك قازاقستان وبلىستىق قازاق مۋزىكالىق دراما تەاترى, س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترى, ءا.مامبەتوۆ اتىنداعى مەملەكەتتىك دراما جانە كومەديا تەاترى, ق.قۋانىشباەۆ اتىنداعى قازاق ۇلتتىق مۋزىكالىق دراما تەاترى, ش.قۇسايىنوۆ اتىنداعى اقمولا وبلىستىق قازاق مۋزىكالىق-دراما تەاترى, استانا قالاسى اكىمدىگىنىڭ جاستار تەاترى, شىعىس قازاقستان وبلىستىق دراما تەاترىنىڭ جاس كورەرمەن ترۋپپاسى, ب.ريموۆا اتىنداعى تالدىقورعان دراما تەاترى باعىن سىناپ جاتىر.
العاشقى كۇنى كورەرمەندەر پاۆلودارلىق اكتەرلەر ساحنالاعان شەكسپيردىڭ ء«ىىى ريچارد» قويىلىمىن تاماشالادى. اكتەرلەردىڭ ونەرىن قازاقستاننىڭ ەڭبەك سىڭىرگەن قايراتكەرى, م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك باستاعان قازىلار القاسى باعالايدى.
پاۆلودار