ن.گوگول اتىنداعى وبلىستىق امبەباپ عىلىمي كىتاپحاناسى تورقالى توقسان جىلدىق تويىن اتاپ ءوتتى.
سوناۋ جىلدارى ەكى مىڭعا جۋىق كىتاپ قورىمەن باستالعان كىتاپحانادا قازىر 400 مىڭنان استام كىتاپ بار.
وبلىستىق مادەنيەت جانە قۇجاتتاما باسقارماسىنىڭ مۇرىندىق بولۋىمەن كىتاپحانا تويى دۇركىرەپ ءوتتى. 90 جىلدىعىن مەرەكەلەۋ اياسىنداعى ءىس-شارالار ەكى كۇنگە جوسپارلانىپ, شەتەلدەن كىتاپحانا باسشىلارى مەن ماماندارى ارنايى شاقىرتىلدى. ودان بولەك, ايماقتاعى كۇللى كىتاپحانا باسشىلارىمەن قاتار, استانا, الماتى قالاسىنان دا كەلدى. مەرەيتويعا اقىن, اباي اتىنداعى مەملەكەتتىك سىيلىقتىڭ يەگەرى سەرىك اقسۇڭقار ۇلى دا كەلىپ, ۇجىمعا جىلى لەبىزىن ءبىلدىردى. مەرەيتوي اياسىندا قر ۇلتتىق كىتاپحاناسىنىڭ ديرەكتورى, قازاقستاندىق كىتاپحانالىق وداعىنىڭ توراعاسى باقىتجامال وسپانوۆا وبلىستىق امبەباپ كىتاپحانا ديرەكتورى اينۇر شايمۇحانبەتوۆانى «قازاقستاننىڭ ۇزدىك كىتاپحاناشىسى» توسبەلگىسىمەن ماراپاتتادى. مادەنيەت جانە اقپارات مينيسترلىگىنىڭ ارحيۆ, قۇجاتتاما جانە كىتاپ ءىسى كوميتەتىنىڭ كىتاپ ءىسى باسقارماسىنىڭ باسشىسى الماز مىرزاحمەت وبلىس كىتاپحانالارىن دامىتۋ ءبولىمىنىڭ باسشىسى ايگۇل قاراشوۆاعا «مادەنيەت سالاسىنىڭ ۇزدىگى» توسبەلگىسىن تابىستادى.
مادەني ءىس-شارا باسى «قاراعاندى09: ەركىن ديالوگ ايماعى» حالىقارالىق OpenTalk بريفينگىمەن باستالدى.
ودان سوڭ «جاڭا ءداۋىر ادەبيەتى: ءداستۇر جانە جالعاستىق» اتتى دوڭگەلەك ۇستەل ءوتتى. وندا ءبىرشاما ماسەلە قوزعالىپ, وقىرمانداردى قازىرگى ادەبيەتتەگى قانداي تەندەنتسيالار مەن كىتاپتار قىزىقتىراتىنى تۋرالى ۇسىنىس ايتىلدى.
ودان كەيىن مەيماندارعا كىتاپحانا عيماراتىنا ەكسكۋرسيا ۇيىمداستىرىلدى. ەكسكۋرسيا بارىسىندا قوناقتارعا سيرەك كەزدەسەتىن كىتاپ قورى كورسەتىلدى.
سوڭعى كۇنى شەتەلدىك ارىپتەستەرمەن شىعارماشىلىق بايلانىستى نىعايتۋ ماقساتىندا ەكىجاقتى مەموراندۋمعا قول قويىلدى.
قاراعاندى وبلىسى