اەس سالۋدى قولداۋ جونىندەگى حالىقتىق شتاب ۇلىتاۋ وبلىسىنىڭ تۇرعىندارىمەن كەزدەسىپ, اتوم ەلەكتر ستانتسياسىنىڭ بولاشاعىن تالقىلادى, دەپ حابارلايدى Egemen.kz.
«Amanat» پارتياسىنىڭ ءباسپاسوز قىزمەتى ءمالىم ەتكەندەي, جەزقازعان قالاسىندا حالىقتىق شتابتىڭ مۇشەلەرى 300-گە جۋىق تۇرعىنمەن كەزدەسكەن.
ونەركاسىبى دامىعان ۇلىتاۋ وبلىسى كوپتەگەن ەكولوگيالىق ماسەلەگە تاپ بولىپ وتىر. شتاب مۇشەلەرىنىڭ ايتۋىنشا, اتوم ەنەرگەتيكاسىنا كوشۋ اۋانىڭ لاستانۋ پروبلەماسىن شەشۋدىڭ ءتيىمدى ءتاسىلى بولا الادى, ويتكەنى اەس – كومىر ەلەكتر ستانتسيالارىنا قاراعاندا الدەقايدا ەكولوگيالىق تۇرعىدا تازا.
«قازىرگىدەي الەمدە رەسۋرستارعا, ەنەرگياعا باسەكە كۇشەيگەن ۋاقىتتا ەلدىڭ ەنەرگەتيكالىق تاۋەلسىزدىگى, ەنەرگەتيكالىق قاۋىپسىزدىگى ءبىرىنشى ورىنعا شىعىپ وتىر. مۇنداي جاعدايدا, ورىنسىز ۇرەي مەن ءجونسىز ءپوپۋليزمنىڭ جەتەگىنە ەرىپ, اەس-كە قارسىلىق تانىتۋ ەل بولاشاعىنا جاسالعان قيانات بولار ەدى. ۇلىتاۋ تۇرعىندارىن بىرىگىپ, ۇلت بولاشاعى ءۇشىن اەس قۇرىلىسىنا قولداۋ بىلدىرۋگە شاقىرامىن!», دەدى اتالعان پارتيانىڭ اتقارۋشى حاتشىسى داۋلەت كارىبەك.