كۇرەس تۇرلەرىنەن وتكەن تارتىستى كەزدەسۋلەر دۇنيەجۇزىلىك كوشپەلىلەر ويىندارىنىڭ كورىگىن قىزدىردى. قازاق كۇرەسىنەن باستاپ, تۇرىك حالقىنىڭ – «اشىرتمالى ابا گيۋرەش», وزبەك اعايىنداردىڭ – «كۋراش», قىرعىز باۋىرلاردىڭ – «الىش», تاتار حالقىنىڭ «كوراش» مۇراسى بىرىنەن-ءبىرى قالىسپايدى.
كوشپەلىلەر كۇرەسىنىڭ قاي ءتۇرىن الىپ قاراساق تا, بىلەك كۇشىمەن قاتار, ايلا-ءتاسىلى ارتىق سپورتشى جەڭىسكە جەتەدى. تۇرىك حالقىنىڭ ۇلتتىق ويىندارىنىڭ ءبىرى – «اشىرتمالى ابا گيۋرەش»-ىنە (ۇلتتىق بەلبەۋ كۇرەسى) دە قارا كۇشپەن بىرگە ەپتىلىك, اقىل-ايلا كەرەك. بەلدەسۋلەر تەگىس ءشوپتى الاڭدا وتەدى. سپورتتىڭ وسى تۇرىنەن الاڭعا شىققان 5 بالۋانىمىزدىڭ ۇشەۋى فينالعا دەيىن سۇرىنبەي جەتتى. الايدا التىن جۇلدە ساراپقا سالىنعان بەلدەسۋلەردە وتانداستارىمىز قارسىلاستارىنا جول بەرىپ قويدى. قورجىندا – 3 كۇمىس. كۇمىسپەن كۇپتەلگەن سپورتشىلاردىڭ اراسىندا 60 كگ سالماقتا بەلدەسكەن ەرنۇر سۇلەيمەن, 70 كگ-دا سىنعا تۇسكەن ادىلەت احمەتعالي, 90 كگ-دا ونەر كورسەتكەن ايدوس عالىموۆ سىندى مىقتىلار بولدى.
تارتىستى بەلدەسۋلەردەن كەيىن ادىلەت احمەتقالي قالىڭ كوپشىلىككە تاڭسىق سپورتتىڭ ەرەكشەلىكتەرى تۋرالى از-كەم اڭگىمەلەپ, ءوزىنىڭ دايىندىعى تۋرالى ايتىپ بەردى.
– «اشىرتمالى ابا گيۋرەش»-ءىنىڭ باسقا كۇرەس تۇرلەرىنەن ايىرماشىلىعى بار. ەرەجەلەرى دە ەرەكشە. ارينە تۇركيانىڭ ۇلتتىق ويىندارىنىڭ ءبىرى بولعان سوڭ, تۇرىكتەر بۇل سپورتتان مىقتى. وزبەكستان سپورتشىلارى دا جاقسى دايىنداعان. نەگىزى ءوزىم دزيۋدومەن اينالىسامىن. سپورتتىڭ سول تۇرىمەن كاسىبي اينالىسقانىما 10 جىلعا جۋىقتادى. تۇرىك كۇرەسىنەن التىن مەدال الۋعا بارىمدى سالدىم. قالاي دەگەندە دە كوشپەلىلەر ويىنى ءوز ەلىمىزدە ءوتىپ جاتقان سوڭ, جانكۇيەرلەردى قۋانتقىم كەلدى. الايدا تۇرىك قارسىلاسىم باسىم بولدى. ءبىر جاعى «اشىرتمالى ابا گيۋرەش»-ىنەن العاش باق سىناپ تۇرمىن. ءالى الدا تالاي دودالاردا جەڭىسكە جەتەمىن دەپ ۇمىتتەنەمىن, – دەيدى ادىلەت احمەتقالي.
بۇل رەتتە «اشىرتمالى ابا گيۋرەش»-ىنەن 19 مەملەكەتتەن 74 سپورتشى باق سىناعانىن جانە ولاردىڭ قاي-قايسىسى دا وسال بالۋان بولماعانىن ايتا كەتكەن ءجون. مىسالى, ەرنۇر سۇلەيمەن جارتىلاي فينالدىق كەزەڭدە وزبەكستاندىق مۋزافەربەك نۋرلاەۆتان باسىم تۇسسە, فينالدا قىرعىزستان سپورتشىسى رومان ساپاروۆتان جەڭىلدى. بۇل ەرنۇردىڭ V دۇنيەجۇزىلىك كوشپەلىلەر ويىندارىندا جەڭىپ العان ەكىنشى كۇمىس جۇلدەسى. وتانداسىمىز وسىعان دەيىن «الاۋ» سارايىندا وزبەك حالقىنىڭ ۇلتتىق ويىنى كۋراش سپورتىنان دا سىنعا ءتۇسىپ, ەكىنشى ورىن ولجالاعان ەدى.
– دۇنيەجۇزىلىك كوشپەلىلەر ويىنىنا دايىندىعىمىز جاقسى بولدى. بارىمىزدى سالىپ, التىن جۇلدە الۋعا تالپىندىق. باق جانبادى. «كۋراش»-پەن اينالىسىپ جۇرگەنىمە ەكى جىلعا جۋىقتادى. بۇعان دەيىن وزبەك بالۋانىنا ازيا چەمپيوناتىندا ەسە جىبەرگەن ەدىم. وكىنىشكە قاراي, بۇل جولى دا جەڭىلدىم. الداعى الەم بىرىنشىلىكتەرىندە, ازيا چەمپيوناتتارىندا سپورتتىڭ وسى تۇرىنەن التىن جۇلدە الامىز دەگەن سەنىم بار. ارينە ول ءۇشىن دايىندىقتى ۇدەتىپ, تاعى دا شىڭدالۋ قاجەت, – دەپ پىكىر ءبىلدىردى ەرنۇر سۇلەيمەن.
كۋراشقا 27 مەملەكەتتەن 106 سپورتشى قاتىسۋعا نيەت بىلدىرگەن. سپورتتىڭ وسى ءتۇرى بويىنشا ەرلەر اراسىندا بەس سالماقتا, ايەلدەر اراسىندا ءۇش سالماقتا مىقتىلار انىقتالدى. مۇندا ەل اتىنان ونەر كورسەتكەن 7 بالۋان جارتىلاي فينالعا جولداما الىپ, جۇلدەگەرلەر قاتارىنا قوسىلعان ەدى. اقتىق سىنعا 4 بالۋان جولداما العاندا دا كەمىندە بىرەر التىن بۇيىرار دەگەن ءۇمىت باسىم بولدى. وكىنىشكە قاراي, ەكىنشى جارىس كۇنىندە التىن جۇلدە سپورتشىلاردىڭ ۋىسىنان سۋسىپ كەتتى. وسىلايشا, كۋراشتان باق سىناعان بالۋاندار 4 كۇمىس, 3 قولا جۇلدەمەن جارىستى اياقتادى. جۇلدەگەرلەردىڭ ىشىندە ەرنۇر سۇلەيمەننەن بولەك, مارات نىعماتۋللاەۆ, ايبەك قازاقباەۆ, تولعاناي ابەۋوۆا, التىناي نۇرحانوۆا, ءنۇردىن شايمەردەن, ادىلەت احمەتقالي سىندى بالۋاندار بولدى.
ابىروي بولعاندا, تاتار حالقىنىڭ كونە ۇلتتىق بەلبەۋ كۇرەسى كوراشتەن التىن جۇلدە بۇيىردى. بەلدەسۋلەر جاقسىلىق ۇشكەمپىروۆ اتىنداعى جەكپە-جەك سارايىندا ءوتتى. جارىس قورىتىندىسى بويىنشا ءتورت سالماقتا مىقتىلار انىقتالدى. بۇل سىندا 90 كگ سالماقتا بەلدەسكەن ءبىرجان شايمەردەنوۆ التىن جۇلدە الىپ, ەل مەرەيىن اسىردى. كۇمىس جۇلدەگە يە بولعان ادىلەت شالعىنبەك ۇلى (64 كگ) مەن نۇرداۋلەت جارىلعاپوۆ (+100 كگ) پەن قولا مەدال العان بەكنۇر بەكتايلار دا (75 كگ) سىلبىر كۇرەسپەدى, بارىن سالدى.