استانادا اسىق اتۋ سپورتىنان الەم چەمپيوناتىنىڭ اشىلۋ ءراسىمى ءوتتى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
«اسپان» سپورت كەشەنىندە وتكەن ءىس-شارانى كوشپەلىلەردىڭ اسىق سپورتى حالىقارالىق فەدەراتسياسى مەن «اسىق اتۋ» رەسپۋبليكالىق فەدەراتسياسى استانا قالاسى اكىمدىگىنىڭ قولداۋىمەن ۇيىمداستىرىپ وتىر.
«قۇرمەتتى قاتىسۋشىلار مەن قوناقتار. بۇگىن اسىق اتۋدان ءبىرىنشى الەم چەمپيوناتى بولىپ جاتىر. ول قازاق جەرىندە ءوتىپ جاتقانى جايدان-جاي ەمەس. قاتىسىپ جاتقان بارشا ادامعا العىسىم شەكسىز. سىزدەرگە ساتتىلىك تىلەي وتىرىپ, بۇگىنگى جارىستى اشىق دەپ جاريالايمىن», دەدى ءماجىلىس دەپۋتاتى, كوشپەلىلەردىڭ اسىق سپورتى حالىقارالىق فەدەراتسياسىنىڭ پرەزيدەنتى ولجاس قۇسپەكوۆ.
ۇيىمداستىرۋشىلاردىڭ ايتۋىنشا, اتالمىش چەمپيونات قازاق حالقىنىڭ ۇلتتىق داستۇرلەرى مەن مادەنيەتىن الەمدىك ارەنادا ىلگەرىلەتۋدەگى ماڭىزدى قادامداردىڭ ءبىرى بولماق.
«بۇگىن - تاريحي كۇن. سەبەبى ەلوردادا اسىق اتۋدان تۇڭعىش الەم چەمپيوناتى ءوتىپ جاتىر. اسىق اتۋ - بۇل قازاق حالقىنىڭ ءداستۇرلى ويىنى. ويىن ەپتىلىككە, مەرگەندىككە, شاپشاڭدىققا, سەرگەكتىككە باۋليدى. ءبىر سوزبەن ايتقاندا, بۇل ويىننىڭ پايداسى مول», دەدى اسىق اتۋ فەدەراتسياسىنىڭ اتقارۋشى ديرەكتورى ازامات ماناپوۆ.
چەمپيوناتتىڭ اشىلۋ راسىمىندە قاتىسۋشىلار مەن كورەرمەندەرگە اسەرلى كونتسەرتتىك باعدارلامالار, ۇلتتىق مۋزىكالىق جانە بي قويىلىمدارى ۇيىمداستىرىلدى. سونداي-اق جينالعاندار اسىق اتۋ ويىنى تۋرالى جان-جاقتى اقپارات الىپ, ونىڭ قىر-سىرىمەن تانىستى.
ايتا كەتەيىك, سپورتتىق جارىسقا قازاقستان, اقش, گرۋزيا, ۆەنگريا, رەسەي فەدەراتسياسى, رۋمىنيا, موڭعوليا, تاجىكستان, تۇركيا, يسپانيا, چەحيا, ءۇندىستان, وزبەكستان سىندى ەلدەردىڭ ۇزدىك سپورتشىلارى كەلدى.
جەڭىمپازدار اقشالاي سىيلىق پەن كۋبوكتارمەن ماراپاتتالادى.