جاڭاوزەندى دامىتۋ ماسەلەسى كۇن تارتىبىنەن تۇسكەن ەمەس. قىركۇيەك ايى باستالىسىمەن مۇنايلى قالادا وقۋشىلارعا ارنالعان نىساننىڭ ىرگەتاسى قالانۋى دا وسى ماقسات اياسىنداعى ءىس.
جاڭادان بوي كوتەرەتىن «Bolashaq Sarayi» وقۋشىلار سارايىن قالاداعى بالالار مەن جاستاردىڭ جان-جاقتى دامۋىنا بارلىق جاعداي جاسالعان زاماناۋي ءبىلىم ۇيىمى مەن مادەني ورتالىق رەتىندە سالۋ جوسپارلانعان.
– مەملەكەت باسشىسى قاسىم-جومارت توقاەۆتىڭ قابىلداۋىندا بولعان كەزدە جاڭاوزەن قالاسىندا وقۋشىلار سارايىن تەزدەتىپ سالۋدى تاپسىرعان ەدى. سول كۇننەن باستاپ قۇرىلىسقا قاتىستى جۇمىس جۇرگىزىلە باستادى. ماڭعىستاۋدىڭ بولاشاعى – ءبىلىمدى, كرەاتيۆتى جاستارىمىزدىڭ قولىندا. نىسان جاس ۇرپاقتىڭ شىعارماشىلىق قابىلەتىن دامىتۋعا, جاڭا مۇمكىندىكتەردى يگەرۋگە جول اشادى. باسەكەگە قابىلەتتى بالالارىمىز ەلىمىزدىڭ دامۋىنا ءوز ۇلەسىن قوساتىنىنا سەنىمدىمىن, – دەدى نىساننىڭ ىرگەتاسىن قالاۋعا قاتىسقان ماڭعىستاۋ وبلىسىنىڭ اكىمى نۇرداۋلەت قيلىباي.
ماڭعىستاۋ وبلىسىنىڭ 2021-2025 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارى اياسىندا جۇزەگە اسىرىلىپ جاتقان وقۋشىلار سارايىنىڭ قۇرىلىسىن قارجىلاندىرۋ «قازمۇنايگاز» ۇك» اق ەنشىلەس كاسىپورنى «وزەنمۇنايگاز» اق-نىڭ جەكە قاراجاتى ەسەبىنەن جۇرگىزىلەدى.
– ۇلتتىق كومپانيا جاڭاوزەن قالاسىنىڭ دامۋىنا, تۇرعىندارعا پايدالى الەۋمەتتىك نىسانداردىڭ بوي كوتەرۋىنە ءمان بەرەدى. بيىل ءساۋىر ايىندا عانا پاراليمپياداشىلارعا ارنالعان «العا» سپورت كەشەنى اشىلدى. كومپانيا جاڭاوزەن وقۋشىلارىنا جان-جاقتى قولداۋ كورسەتەدى. «جارقىن بولاشاق» گرانتتىق باعدارلاماسى بويىنشا ەلىمىزدىڭ ۇزدىك ءبىلىم ورىندارىندا, ءتۇرلى ونەر كوللەدجدەرى مەن سپورت مەكتەپتەرىندە ءبىلىم الۋعا 600-دەن اسا گرانت ءبولىندى, دەدى «قازمۇنايگاز» ۇك» اق باسقارما توراعاسى اسحات حاسەنوۆ.
350 ورىندىق عيماراتتىڭ اۋدانى 3 مىڭ شارشى مەتردى قۇرايدى. سارايدا روبوتتەحنيكا, باعدارلامالاۋ, 2D/3D مودەلدەۋ, شەت تىلدەرى, كيىم ديزاينى مەن تىگىن, قولونەر, ۆوكال جانە حالىق اسپاپتارىندا ويناۋ كابينەتى اشىلادى. سونداي-اق جاڭارتىلاتىن ەنەرگيا كوزدەرى, قولدانبالى جانە جاراتىلىستانۋ عىلىمدارىنىڭ زەرتحانالارى, بەينەلەۋ ونەرى ستۋدياسى, ارتىستىك, جۋرناليستيكا, حورەوگرافياعا ارنالعان تەلەستۋديالار قۇرىلادى.
«قازمۇنايگاز» ۇك» اق باسقارما توراعاسى اسحات حاسەنوۆتىڭ كومپانيانىڭ قالاعا الەۋمەتتىك نىساندار سالۋعا ءمان بەرەتىنىن ايتقاندىعىن ەسكەرسەك, جاڭاوزەندە جاقسى ىستەر جالعاسىن تابادى دەگەن سەنىم بار.
ماڭعىستاۋ وبلىسى