باكۋدىڭ «ساباح» كلۋبى ازەربايجان كۋبوگىنىڭ يەگەرى اتاندى. ال فينالدىق ماتچتىڭ باستى قاھارمانى قازاقستان ۇلتتىق قۇراماسىنىڭ قاقپاشىسى ستاس پوكاتيلوۆ بولدى, دەپ حابارلايدى Egemen.kz.
شەشۋشى ويىندا پوكاتيلوۆتىڭ كومانداسى «زيرياعا» قارسى 2:1 ەسەبىمەن جەڭىسكە جەتتى.
ەسەپتى ماتچتىڭ 4-مينۋتىندا «زيريا» ويىنشىسى ەرەن ايدىن اشتى, ۇزىلىستەن كەيىن ويىن بارىسى وزگەردى. 70-مينۋتتا ورفە مبينا تارازى باسىن تەڭەستىرسە, 91-مينۋتتا دجوي-لانس ميكەلس جەڭىس گولىن سوقتى.
جەڭىس گولىنىڭ شەشۋشى ناتيجەلى پاسىن ستاس پوكاتيلوۆ بەردى. قازاقستان قاقپاشىسىنىڭ پاسىنان كەيىن ميكەلس گول سوعىپ, باكۋلىق كلۋبقا كۋبوك جەڭىسىن سىيلادى.
مەسسي فۋتبولدان الەم چەمپيوناتىنا قاتىسا ما؟
ستاس پوكاتيلوۆ 1992 جىلى دۇنيەگە كەلگەن, قازىرگى تاڭدا 33 جاستا. ول مانسابىندا قازاقستاننىڭ «اقتوبە», «شاحتەر», «قايرات», «توبىل» كلۋبتارىندا, سونداي-اق رەسەيدىڭ «روستوۆ» كومانداسىندا ويناعان. ال «ساباح» كلۋبىنىڭ ساپىندا وتانداسىمىز ازەربايجان چەمپيونى اتانىپ, ازەربايجان كۋبوگىن دە توبەسىنە كوتەرگەن.
الەم چەمپيوناتى الدىنداعى ويىندار ءبىزدىڭ فۋتبولشىلار ءۇشىن جەمىستى ءوتىپ جاتىر. بۇعان دەيىن استانا قۇراماسىنىڭ ويىنشىسى يۆان باشيچ قازاقستان پرەمەر-ليگاسىنىڭ تاريحىندا الەم چەمپيوناتىنا شاقىرتىلعان العاشقى فۋتبولشى اتانعانىن جازعان بولاتىنبىز.