ەلوردامىزدا ءوتىپ جاتقان دۇنيەجۇزىلىك كوشپەلىلەر ويىندارىنىڭ ەكىنشى كۇنى جارىس جولىنا شىققان قورعانىس مينيسترلىگى ورتالىق سپورت كلۋبىنىڭ سپورتشىلارى ەل قورجىنىنا بەس التىن, ءبىر كۇمىس مەدال سالدى.
قازاق كۇرەسى, جامبى اتۋ جانە كۋراشتان وتكەن سايىستاردا ارميا سپورتشىلارى ءساتتى ونەر كورسەتتى.
«دۇنيەجۇزىلىك كوشپەلىلەر ويىندارىندا سپورتتىڭ بەس تۇرىنەن 14 ارميا سپورتشىسى سىنعا ءتۇسىپ جاتىر. ەكى كۇن ىشىندە ولار التى مەدال ۇتىپ الدى. 2025 جىلى استانادا قازاق كۇرەسىنەن حالىقارالىق اسكەري سپورت كەڭەسىنىڭ (CISM) الەم چەمپيوناتى وتەدى. بۇل جارىسقا وسى ۇيىمنىڭ وكىلدەرىن ارنايى شاقىردىق. بۇگىنگى جارىس – اسكەري سپورتشىلار اراسىندا قازاق كۇرەسى جارىسىن دايىنداۋ مەن ناسيحاتتاۋدىڭ ماڭىزدى كەزەڭدەرىنىڭ ءبىرى», دەيدى قورعانىس مينيسترلىگى سپورت كوميتەتىنىڭ توراعاسى – ورتالىق سپورت كلۋبىنىڭ باستىعى, پولكوۆنيك ارمان ابەۋوۆ.
جامبى اتۋدان ازيا ستيلىندەگى جارىستا قارۋلى كۇشتەر قىزمەتكەرى باتىر بەكساۋىت چەمپيون اتاندى. بۇل سپورت تۇرىنەن 27 ەلدەن بارلىعى 78 سپورتشى باق سىناستى.
9 ەلدىڭ 64 سپورتشىسى قاتىسقان اۋدارىسپاقتا 70 كيلوعا دەيىنگى سالماق دارەجەسىندە قارۋلى كۇشتەر قىزمەتشىسى المات لاتىپبەك التىن مەدال يەلەندى.
قازاق كۇرەسىنەن ءوتىپ جاتقان جارىسقا 41 ەلدەن سەگىز سالماق دارەجەسى بويىنشا 274 سپورتشى (ەرلەر مەن ايەلدەر) ءوتىنىم بەرگەن. بالۋاندار بەلدەسۋى جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتىر. بوزكىلەمدەگى سايىستا قارۋلى كۇشتەر قىزمەتشىلەرى بەكجان تولەپوۆ (55 كگ), جۇماجان قوجامبەكوۆ (74 كگ) جانە باقىت قۇساقباەۆ (60 كگ) جەڭىمپاز اتاندى.
ال كۋراش تۋرنيرىندە ارميا بالۋانى اعا لەيتەنانت مارات بايقامۇروۆ 100 كيلودان اسا سالماق دارەجەسىندە كۇمىس مەدالدى جەڭىپ الدى.