كەشە پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن وتكەن پالاتا بيۋروسىنىڭ وتىرىسىندا زاڭ جوبالارىنىڭ دايىندىعى قارالدى.
سالالىق كوميتەتتەردىڭ ۇسىنۋىمەن پالاتانىڭ جالپى وتىرىسىنىڭ كۇن تارتىبىنە “نورماتيۆتىك قۇقىقتىق اكتىلەر تۋرالى” زاڭعا تۇزەتۋلەر ەنگىزۋدى كوزدەيتىن زاڭ جوباسى ۇسىنىلدى. ەلىمىزدىڭ كەيبىر زاڭدارىنا بالالاردىڭ قۇقىعىن قورعاۋ تۋرالى زاڭ جوباسى ەكىنشى وقىلىمدا, وتباسى ۇلگىسىندەگى بالالار اۋىلى جانە ءجاسوسپىرىمدەر ۇيلەرىنە قاتىستى وزگەرىستەر ەنگىزۋدى قاراستىراتىن زاڭ جوباسى شىعارىلاتىن بولدى. جانە دە “نەكە (ەرلى-زايىپتىلىق) جانە وتباسى تۋرالى” كودەكس جوباسى ەكىنشى وقىلىمدا تالقىعا تۇسەدى.
سونىمەن قاتار, “قازاقستان رەسپۋبليكاسىنىڭ حالىقارالىق شارتتارى تۋرالى” زاڭعا تۇزەتۋلەر ەنگىزۋدى كوزدەيتىن زاڭ جوباسى, قازاقستان مەن بىرىككەن اراب ءامىرلىكتەرى اراسىنداعى ازاماتتىق جانە كوممەرتسيالىق ىستەر بويىنشا قۇقىقتىق كومەك كورسەتۋ تۋرالى كەلىسىمدى, قازاقستان مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (دامۋ باعدارلاماسىن قولداۋعا بەرىلەتىن كرەديت) جانە قازاقستان مەن گەرمانيا فەدەراتيۆتىك رەسپۋبليكاسىنىڭ ۇكىمەتتەرى اراسىنداعى الماتى قالاسىنداعى قازاقستان-گەرمانيا ۋنيۆەرسيتەتىن دامىتۋ جونىندەگى ودان ءارى ىنتىماقتاستىق تۋرالى كەلىسىمدى بەكىتۋدى قاراستىراتىن زاڭ جوبالارى جالپى وتىرىستا تالقىعا سالىنادى.
بيۋرو وتىرىسىندا بىرقاتار سالالىق كوميتەتتەر زاڭ جوبالارىمەن جۇمىس ىستەۋدى جالعاستىرۋ تۋرالى ۇسىنىس جاسادى. سونداي-اق “قازاقستان رەسپۋبليكاسىنىڭ كەيبىر زاڭنامالىق اكتىلەرىنە جۇمىلدىرۋ دايىندىعى مەن جۇمىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” زاڭ جوباسى بويىنشا قوس پالاتانىڭ كەلىسىم كوميسسياسىنىڭ ۇسىنىستارى قارالدى.
“ەگەمەن-اقپارات”.