مادەنيەت جانە اقپارات ءمينيسترى ايدا بالاەۆا قازاقستان حالقىن وتباسى كۇنىمەن قۇتتىقتادى, دەپ جازادى Egemen.kz اقپارات اگەنتتىگى.
- قۇرمەتتى قازاقستاندىقتار! سىزدەردى وتباسى كۇنىمەن شىن جۇرەكتەن قۇتتىقتايمىن! بۇل مەرەكە كۇنتىزبەدەگى جاي عانا داتا ەمەس. وتباسى – سۇيىسپەنشىلىكتىڭ, ىزگىلىك پەن مەيىرىمنىڭ, قۇرمەت پەن تاتۋلىقتىڭ وشاعى, ياعني كەز كەلگەن قوعامنىڭ دىڭگەگى. بالالارىمىز وتباسىندا تاربيەلەنىپ, ەڭ باستى قۇندىلىقتاردى بويعا ءسىڭىرىپ, ەلىمىزدىڭ بولاشاعى قالىپتاسادى. وتباسىنىڭ بەرەكە-بىرلىگى مەن ءداستۇرلى قۇندىلىقتارىن نىعايتۋ – مەملەكەت باسشىسى بەلگىلەگەن مەملەكەتتىك ساياساتتىڭ باسىم باعىتتارىنىڭ ءبىرى, - دەدى مينيستر.
پرەزيدەنتتىڭ ۇلتتىق قۇرىلتايدا بەرگەن تاپسىرماسىنا سايكەس, وتباسى ينستيتۋتىن نىعايتۋ, ۇرپاقتار ساباقتاستىعىن ساقتاۋ باعىتىندا بەلسەندى جۇمىستار جۇرگىزىلۋدە. وتباسىلىق جانە گەندەرلىك ساياساتتىڭ 2030 جىلعا دەيىنگى تۇجىرىمداماسى اياسىندا وتباسىن قولداۋ, تۇرمىستىق زورلىق-زومبىلىقپەن كۇرەس جانە وتباسى قۇندىلىقتارىن قورعاۋ شارالارى جۇزەگە اسىپ كەلەدى.
- سوڭعى 10 جىلدا قازاقستانداعى وتباسىلار سانى ءبىر جارىم ميلليونعا ءوسىپ, بۇگىندە 5,5 ميلليون وتباسىعا جەتتى. بۇل ادامداردىڭ تۇراقتىلىق پەن وتباسىلىق قارىم-قاتىناستاردى كوبىرەك باعالايتىنىن كورسەتەدى. سونداي-اق سوڭعى 5 جىلدا اجىراسۋدىڭ 48,6%-عا ازايعانى – قازاقستاندىق وتباسىلارىنىڭ نىعايىپ كەلە جاتقانىنىڭ تاعى ءبىر كورسەتكىشى.بيىل «انالار كۇنى» مەن «اكەلەر كۇنىن» العاش رەت تويلادىق. بۇل مەرەكەلەر ۇلكەن قولداۋ تاۋىپ, وعان مىڭداعان قازاقستاندىق قاتىستى. مۇنداي باستامالار اتا-انا مەن بالا اراسىنداعى بايلانىستى ارتتىرىپ, سانالى تاربيە مەن وتباسىنداعى بوس ۋاقىت وتكىزۋ مادەنيەتىن قالىپتاستىرۋعا سەپ بولادى. وتباسى – ءبارىمىزدى بىرىكتىرەتىن قۇندىلىق. ءار ۇيدە ماحاببات پەن ىرىس-بەرەكە, باقىت ورناپ, بالالارىمىز قۇرمەتكە, قامقورلىققا بولەنىپ وسۋىنە تىلەكتەسپىن. مەرەكە قۇتتى بولسىن, قىمباتتى دوستار! ءار شاڭىراققا شاتتىق ورناسىن!, - دەپ جازدى بالاەۆا.