الماتىدا 15 جىل بىرگە تۇرعان كۇيەۋىنىڭ قولىنان قازا تاپقان ءال-بەينە زاريپوۆانىڭ ولىمىنە قاتىستى اتىشۋلى ءىس جالعاسىپ جاتىر. كەشەگى سوت وتىرىسىندا مارقۇمنىڭ اناسى مەن ءىنىسى جاۋاپ بەردى. ايتۋلارىنشا, قايعىلى جاعدايعا دەيىن دە كەلىنشەك جۇمىس ىستەمەيتىن كۇيەۋىنەن بىرنەشە مارتە تاياق جەگەن, دەپ حابارلايدى Egemen.kz كتك ارناسىنا سىلتەمە جاساپ.
كۇيەۋىنىڭ قولىنان قازا تاپقان ءال-بەينەنىڭ اناسىنا جىبەرگەن سوڭعى سوزىندە الماتىداعى ءومىرىن توزاقپەن تەڭەستىرىپتى. جاقىندارىنىڭ ايتۋىنشا, قايعىلى جاعدايعا دەيىن دە ءسۇيىپ قوسىلعان كۇيەۋىنەن كورگەن قورلىعى كوپ.
«قىزىمنىڭ موينىنان كوگەرگەن ىزدەردى كورىپ, «مىناۋ نە؟» دەپ سۇرادىم. «كۇيەۋىم مەنى تۇنشىقتىردى» دەدى. كەيىن «اناشىم, مەن ونىڭ توقتاۋسىز قاداعالاۋىنان شارشادىم. ءتىپتى ۇيدەن شىعا الماي قالدىم. ول مەنى ەشقايدا جىبەرمەيدى. كيىم الايىن دەسەم, «ساعان قاجەتى جوق» دەپ بەتىمدى قايتارادى. ونىڭ ويلاعانى اقشا عانا. تاپقانىمدى قايتا-قايتا سۇراي بەرەدى» دەگەن», دەيدى مارقۇمنىڭ اناسى ماعجان بايسەيىتوۆا.
مارقۇم ءال-بەينە زاريپوۆا كوزى تىرىسىندە اقشادان تارىقپاعان. 42 جاسىندا قارجىگەر بولىپ جۇمىس ىستەپ, ءوز كولىگى, ءبىر ەمەس — ءۇش پاتەرى بولىپتى. كەيىن ەكى قاباتتى ءزاۋلىم ءۇي سالىپ العان. ءال-بەينەنىڭ ءومىرى وسى ءوز ۇيىندە ءۇزىلدى. 31 قاڭتاردا شەتەلدەن الماتىعا كەلگەننەن كەيىن ەكەۋىنىڭ اراسىندا كيكىلجىڭ تۋىنداعان. تەرگەۋ مالىمەتىنشە, 48 جاستاعى سابىرجان زاريپوۆ ايەلىن قىزعانىشتان پىشاقتاپ تاستاعان.
«زاريپوۆا دۋبايدا باسقا جىگىت تاپقانىن, ال ونىمەن اجىراسقىسى كەلەتىنىن ايتقان. كامەلەتكە تولماعان قىزى ەكىنشى قاباتتا ۇيىقتاپ جاتقان سوڭ, سويلەسۋ ءۇشىن جەرتولەگە تۇسەدى. زاريپوۆ ايەلىنەن «ۇيالمايسىڭ با؟» دەسە, ول ۇيالمايتىنىن ايتىپ ك ۇلىمسىرەگەن. قىزعانىشتان وڭ قولىنا پىشاق الىپ, كۇتپەگەن جەردەن زاريپوۆانىڭ موينىنا, جامباسىنا, ىشىنە سۇعىپ العان», دەدى پروكۋرور ءنايلا قاناتوۆا.
پروكۋروردىڭ سوزىنشە, كەيىن كۇيەۋى ءال-بەينەنىڭ تەلەفونىن پايدالانىپ, ەسەپشى بولىپ جۇمىس ىستەگەن كومپانيانىڭ شوتىنداعى 4 ميلليون 700 تەڭگەنى وزىنە اۋدارىپ العان. سابىرجان زاريپوۆ قازىر ەكى باپپەن ايىپتى تانىلىپ وتىر. ءبىرى — ۇرلىق, ەكىنشىسى — ادام ءولتىرۋ. الايدا جابىرلەنۋشى تاراپ قىلمىستىڭ قىزعانىشتان, اففەكت جاعدايىندا بولماعانىنا سەنىمدى. سوندىقتان اسا قاتىگەزدىكپەن ادام ءولتىرۋ بابىنا اۋىستىرۋدى تالاپ ەتىپ وتىر.
«دەنەسىنىڭ ءبارى كەسىلىپ كەتكەن. اسىرەسە جىنىس مۇشەسىن كەسكىلەپ تاستاعان. بەتىنىڭ دە ساۋ-تامتىعىن قالدىرماپتى. كوزىنەن يەگىنە دەيىن تىلىنگەن. ءتىپتى سۇيەگى كورىنىپ تۇردى», دەدى مارقۇمنىڭ ءىنىسى ەرىك ءجۇسىپوۆ.
قىلمىسىنان كەيىن سابىرجان زاريپوۆ 12 جاستاعى قىزىن تۋىستارىنىڭ ۇيىنە تاستاپ كەتكەن. قامقورشى رەتىندە قارىنداسى تانىلىپتى. قازىر جەتكىنشەك زاڭ بويىنشا سونىڭ قولىندا. مارقۇمنىڭ جاقىندارى كوميسسيانىڭ شەشىمىمەن مۇلدە كەلىسپەيدى. ويتكەنى جالعىز قىزى كامەلەتكە تولماعان, ءال-بەينەنىڭ 42 جىل جيىپ-تەرگەن مۇلكى كۇيەۋىنىڭ تۋىستارىنا كەتىپ قالۋى مۇمكىن ەكەن.