قوستاناي. 26 قاڭتار. قوستاناي وبلىستىق قىلمىستىق ىستەر جونىندەگى مامانداندىرىلعان سوتتا مەملەكەتتىك ارحيتەكتۋرالىق-قۇرىلىس باقىلاۋ دەپارتامەنتىنىڭ بۇرىنعى ديرەكتورى الەكساندر ەن مەن ونىڭ ورىنباسارى ەلدوس اعىتاەۆقا, ليتسەنزيالاۋ جانە اتتەستاتسيا ءبولىمىنىڭ باستىعى قايرات قاسەنوۆ پەن وسى ءبولىمنىڭ مامانى ناتاليا چەمپالوۆاعا قاتىستى قىلمىستىق ءىس بويىنشا ۇكىم شىعارىلدى. بۇل تۋرالى ng.kz حابارلادى.
ولاردىڭ بارلىعىنا قىلمىستىق كودەكستىڭ 307, 301, 311-بابتارىنا سايكەس قىزمەتتىن اسىرا پايدالاندى, كاسىپكەرلىككە توسقاۋىل قويدى, پارا الدى, ال دەپارتامەنت ديرەكتورى الەكساندر ەنگە بۇعان قوسىمشا قىلمىستى كودەكستىڭ 235-بابى بويىنشا قىلمىستىق ۇيىمداسقان توپ قۇرىپ, وعان جەتەكشىلىك ەتتى دەگەن ايىپ تاعىلعان بولاتىن. الەكساندر ەن كىنالى دەپ تابىلىپ, ول 9 جىل باس بوستاندىعىنان ايىرىلدى جانە جازاسىن قاتاڭ رەجىمدەگى كولونيادا وتەيتىن بولادى. قايرات قاسەنوۆ 7 جىل جازاسىن جالپى كولونيادا وتەيدى. سوت ۇكىمىنە دەيىن ءۇي قاماقتا بولعان اعىتاەۆ پەن چەمپالوۆانىڭ دا قولىنا سوت زالىندا كىسەن سالىندى. ولار ءبىر جىل باس بوستاندىعىنان ايىرۋ جازاسىن الىپ, جالپى رەجىمدەگى كولونياعا جىبەرىلەتىن بولدى.
ۇكىم 106 پاراقتان تۇردى. وندا سوتتالعاندار مەن كۋالاردىڭ ايتۋىنشا, الەكساندر ەن دەپارتامەنتكە كەلگەن سوڭ, كاسىپكەرلەرگە ءتۇرلى كاتەگورياداعى رەتسەنزيا بەرگەنى ءۇشىن اقشا الۋدىڭ قىلمىستىق سحەماسى جاسالعان. مۇنى وسى ءىستى تەرگەۋ جانە سوت ءىسى ۇدەرىسىنە قاتىسقان وبلىستىق پروكۋراتۋرا قىزمەتكەرى تالعات نەسىپباەۆ تا دالەلدەگەنىن ايتتى. قۇپيا سحەما ارقىلى دەپارتامەنت قىزمەتكەرلەرى كاسىپكەرلەردەن پارا الىپ وتىرعان.
ءنازيرا جارىمبەتوۆا.
دەرەك, سۋرەت: ng.kz