استانا قالاسىنىڭ دوستىق ۇيىندە قازاقستان حالقى اسسامبلەياسىنىڭ وكىلدەرى باس قوسىپ, مەملەكەت باسشىسى قاسىم-جومارت توقاەۆتىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى حالىققا ارناعان جولداۋىنا قاتىستى پىكىر الماسىپ, ورتاق مۇددەلەر توڭىرەگىندە وي ءبولىستى.
كەزدەسۋگە قازاقستان حالقى اسسامبلەياسى توراعاسىنىڭ ورىنباسارى – قازاقستان پرەزيدەنت اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ, پارلامەنت دەپۋتاتتارى, مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين, قازاقستان حالقى اسسامبلەياسىنىڭ مۇشەلەرى, ەتنومادەني بىرلەستىكتەرىنىڭ, قحا قوعامدىق قۇرىلىمدارى مەن «اسسامبلەيا جاستارى» رقب وكىلدەرى قاتىستى.
ءىس-شارا بارىسىندا جيىنعا قاتىسۋشىلار جالپىۇلتتىق بىرلىكتى نىعايتۋعا, ازاماتتاردىڭ قۇقىقتىق مادەنيەتىنىڭ دەڭگەيىن ارتتىرۋعا, ساياسي جانە قوعامدىق ءومىردى جاڭارتۋعا, جاستاردى پاتريوتيزمگە تاربيەلەۋگە, قازاقستان تاريحى مەن مادەنيەتىن قۇرمەتتەۋگە باعىتتالعان جوبالاردى ىسكە اسىرۋ ماسەلەلەرى توڭىرەگىندە پىكىر الماستى.
مارات ءازىلحانوۆ ءوز سوزىندە قحا مۇشەلەرىنە اسسامبلەيانىڭ «جۇرەكتەن-جۇرەككە» جانە «مەكتەپكە جول» اۋقىمدى قايىرىمدىلىق اكتسيالارىنا بەلسەندى قاتىسقاندارى ءۇشىن العىسىن ءبىلدىرىپ, پرەزيدەنت جولداۋىندا ايتىلعان تاپسىرمالاردى ىسكە اسىرۋداعى اسسامبلەيانىڭ قىزمەتى مەن ءرولىن اتاپ ءوتتى.
– ءدال قازىر الدىمىزدا تۇرعان باستى مىندەت – جولداۋدىڭ ءاربىر تارماعىن جۇزەگە اسىرۋ ءۇشىن ناقتى قادامداردى ويلاستىرۋ جانە سوعان سايكەس كۇش بىرىكتىرىپ, ارەكەت ەتۋ. الدىمەن نەگىزگى تاقىرىپقا كوشپەس بۇرىن بارلىقتارىڭىزعا «جۇرەكتەن-جۇرەككە» جانە «مەكتەپكە جول» اۋقىمدى قايىرىمدىلىق اكتسيالارىنا ءبىر كىسىدەي اتسالىسىپ, ۇلكەن ۇلەس قوسقاندارىڭىز ءۇشىن العىس ايتقىم كەلەدى. سوڭعى ونكۇندىكتە ءبىزدىڭ جۇمىس ەرەكشە قارقىن الىپ, 260 ملن تەڭگەگە شامامەن 6 500-دەي بالانى مەكتەپكە دايىندادىق. بۇل قوعامدا اتاپ وتۋگە تۇرارلىق بەرەكە مەن بىرلىكتىڭ ۇلكەن جەتىستىگى.
جالپى, ەلىمىزدىڭ دامۋ جولىنداعى باستى ساياسي قۇجاتقا بالاناتىن جولداۋدا مەملەكەتتىك ساياساتتىڭ بارلىق سالاسى مەيلىنشە قامتىلعان, اسىرەسە ەكونوميكالىق, الەۋمەتتىك ماسەلەلەرگە باسىمدىق بەرىلىپ وتىر. دەسە دە, پرەزيدەنت ايتقان بارلىق باستاما, ۇسىنىستار مەن تاپسىرمالار ادىلەتتى قازاقستان قۇرۋ جولىنداعى ورتاق مۇددەگە كەلىپ توعىسادى.
سونىمەن قاتار پرەزيدەنت ايتقان نەگىزگى مىندەتتەردىڭ ءبىرى – ەلىمىزدى جايلى جانە قاۋىپسىز ءومىر ءسۇرۋ ايماعىنا اينالدىرۋ اسسامبلەيانىڭ دا ءاربىر مۇشەسىنىڭ مىندەتى رەتىندە قاراستىرىلۋى قاجەت ەكەندىگى ايقىندالدى. وسى رەتتە قاسىم-جومارت كەمەل ۇلى ءوز جولداۋىندا ءبىزدىڭ قوعامدا زاڭ مەن ءتارتىپ ۇستەمدىك قۇرۋعا ءتيىس ەكەنىن ەرەكشە اتاپ ءوتتى. «بۇل – بۇكىل قوعامنىڭ جانە ءار ادامنىڭ قاۋىپسىزدىگىن قامتاماسىز ەتۋگە قاتىستى ەڭ باستى تالاپ. ءبىز سوندا عانا ادىلەتتى, تازا, قاۋىپسىز قازاقستاندى قۇرا الامىز», دەدى پرەزيدەنت. ياعني قوعامدا زاڭ مەن ءتارتىپ قاعيداتىن تەرەڭىنەن بەكىتۋگە ەرەكشە نازار اۋدارۋدىڭ ماڭىزى زور, دەدى م.ءازىلحانوۆ.
ودان كەيىن ءسوز العان مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين مەملەكەت باسشىسى قاسىم-جومارت توقاەۆتىڭ قازاقستان حالقىنا كەزەكتى جولداۋى ءبىزدىڭ مەملەكەت پەن قوعامدى تەرەڭ ترانسفورماتسيالاۋدىڭ جالعاسى, الداعى جىلدارداعى دامۋىن ايقىندايتىن باعدارى ەكەنىنە توقتالدى.
– مەملەكەت باسشىسى ەلىمىزدىڭ تۇراقتى دامۋىن قامتاماسىز ەتۋ ءۇشىن بىرقاتار ماڭىزدى باعىتتارعا نازار اۋداردى. ولاردىڭ قاتارىندا قوعامدا زاڭ مەن ءتارتىپ يدەولوگياسىن نىعايتۋ ماسەلەلەرى دە بار. پرەزيدەنت ەتنوسارالىق قاتىناستار سالاسىن ودان ءارى دامىتۋعا ايرىقشا نازار اۋداراتىن, ونى ۇدايى جەتىلدىرىپ وتىرۋدى قاجەت ەتەتىن سالا ەكەنىنە تاعى دا ەرەكشە توقتالدى. بۇل رەتتە, مادەنيەت جانە اقپارات مينيسترلىگى قوعامدىق كەلىسىمدى نىعايتۋ مەن جالپىۇلتتىق بىرەگەيلىكتى قالىپتاستىرۋ, وسى باعىتتا حالىق اراسىندا اقپاراتتىق-ءتۇسىندىرۋ جۇمىستارىن جانداندىرۋ, مەملەكەتتىك ورگاندار جۇمىسىنا جاڭاشىل تاسىلدەردى ەنگىزۋ, ەتنومادەني بىرلەستىكتەر الەۋەتىن ءتيىمدى پايدالانۋ تۇرعىسىندا جۇمىستى قولعا العان, – دەدى ع.شويكين.
ءماجىلىس دەپۋتاتى گەننادي شيپوۆسكيح بيىلعى جولداۋدىڭ باستى ەرەكشەلىكتەرىنە توقتالدى.
– ءبىرىنشى كەزەكتە مەنىڭ وزىمە جاقىن جۇمىسشى ماماندىقتاردى كوتەرمەلەۋ, ولاردىڭ مارتەبەسىن ارتتىرىپ, جاعداي جاساۋ باعىتىنداعى پرەزيدەنت تاپسىرماسى كوڭىلىمە قوندى. بۇگىندە راسىندا ەل اۋماعىندا كادر تاپشىلىعى انىق سەزىلەدى, ياعني تەحنيكالىق ماماندىقتار قات بولىپ تۇر. سوندىقتان جۇمىسشى ماماندىقتاردى بارىنشا دارىپتەپ, ولاردىڭ تانىمالدىلىعىن ارتتىرۋ تۇرعىسىنداعى مەملەكەت باسشىسىنىڭ تاپسىرماسى وتە ءتيىمدى شەشىم بولدى, – دەدى ءماجىلىس دەپۋتاتى.
باسقوسۋدا ءسوز سويلەپ, ازاماتتىق ويلارىن جەتكىزگەن وزگە دە قحا مۇشەلەرى ادىلەتتى قازاقستان قۇرۋ جولىنداعى بايىپتى باستامالار مەن ناقتى ۇسىنىستار توڭىرەگىنە ۇيىسىپ, وتانداستارىمىزدى ورتاق ىستە ايانىپ قالماۋعا ۇندەدى.