قازاقستان حالىقتارىنىڭ تىلدەر مەرەكەسىنە وراي, ماڭعىستاۋدا بىرقاتار ءىس-شارا جوسپارلانعان. سونىڭ ءبىرى – ء«تىلدارىن» پوليگلوتتار بايقاۋى. اقتاۋ قالالىق ىشكى ساياسات جانە تىلدەردى دامىتۋ ءبولىمىنىڭ مەملەكەتتىك الەۋمەتتىك تاپسىرىسى اياسىندا ۇيىمداستىرىلعان بايقاۋدىڭ ماقساتى – قازاق, ورىس, اعىلشىن تىلدەرىن جەتىك مەڭگەرگەن قابىلەتتى جاستاردى انىقتاپ, قولداۋ كورسەتۋ, كوپ ءتىلدى مەڭگەرگەندەردى وزگەلەرگە ۇلگى ەتۋ. 15 جانە 30 جاس ارالىعىنداعى جاستار قاتىساتىن سايىس كوپ ءتىل بىلەتىن ناعىز جۇيرىكتەردى انىقتايتىن بولادى.
«قاتىسۋشىنىڭ وزىندىك كيىم ۇلگىسى مەن ساحنا مادەنيەتىن ساقتاۋى تالاپ ەتىلەدى. قازاق, اعىلشىن جانە ورىس تىلىندە وتەتىن بايقاۋ ءۇش كەزەڭنەن تۇرادى», دەدى اقتاۋ قالالىق ىشكى ساياسات جانە تىلدەردى دامىتۋ ءبولىمىنىڭ باس مامانى ايزانات كەنجەعۇل.
سونداي-اق وزگە ۇلت وكىلدەرى اراسىندا ماقال-ماتەلدەن ء«تىل – تاريحتىڭ ايناسى» بايقاۋى باستالدى. بۇل سايىس تا اقتاۋ قالالىق ىشكى ساياسات جانە تىلدەردى دامىتۋ ءبولىمىنىڭ مەملەكەتتىك الەۋمەتتىك تاپسىرىسى اياسىندا «سالاماتتى ەل» قوعامدىق قورىنىڭ ۇيىمداستىرۋىمەن وتكىزىلىپ جاتىر. مەملەكەتتىك ءتىلدىڭ قولدانىس اياسىن كەڭەيتۋ, ءتىل مادەنيەتىن كوتەرۋ, قازاق ءتىلىنىڭ ەتنوسارالىق قارىم-قاتىناس ءتىلى رەتىندەگى قىزمەتىن نىعايتۋ ماقساتىنداعى سايىسقا 15-20 جاس جانە 25-45 جاس ارالىعىنداعى وزگە ۇلت وكىلدەرى قاتىسا الادى.
ۇيىمداستىرۋشىلاردىڭ ايتۋىنشا, بايقاۋ ءۇي تاپسىرماسىنان جانە ءتورت كەزەڭنەن تۇرادى. قاتىسۋشىلار الدىمەن ء«ۇي تاپسىرماسى» بويىنشا ءوزىن قىسقامەتراجدى بەينەروليك ارقىلى تانىستىرادى, وندا قاتىسۋشىنىڭ اتى-ءجونى, قىزىعۋشىلىقتارى, قوعامدىق ومىردەگى جەتىستىكتەرى, الدىنا قويعان ماقسات-مىندەتتەرى, قازاق ءتىلىنىڭ قولدانىس اياسىن كەڭەيتۋگە قوسىپ جۇرگەن ۇلەسى, ت.ب. قامتىلۋعا ءتيىس. كەلەسى كەزەڭدەردە ماقال-ماتەل ايتۋدان جارىسىپ, ولاردىڭ ماعىناسىن تۇسىندىرۋدەن سىنعا تۇسەدى. ال ءۇشىنشى كەزەڭدە ماقال-ماتەلدىڭ جالعاسىن تاۋىپ, سوڭعى كەزەڭدە ماقال-ماتەلدەر بويىنشا سۇراقتارعا جاۋاپ بەرەدى.
تىلدەر مەرەكەسىنە وراي وتكىزىلەتىن ءىس-شارا تەك بۇل سايىستارمەن شەكتەلمەيدى, بىرنەشە كۇنگە ۇلاساتىن ءىس-شارالار مەملەكەتتىك ءتىلدىڭ مەرەيىن كوتەرۋگە نەگىزدەلگەن.
ماڭعىستاۋ وبلىسى