قىرعىزدار كوش باستاپ كەلەدى

تۇڭعىش رەت حالىق­ارالىق دەڭگەيدە ۇيىمداس­تى­رىلعان « ۇلى دالا جو­رىعى» دوداسىنا ەلىمىزدەن 8 كوماندا, سىرت ەلدەردەن 9 كوماندا قوسىلدى. بەس كۇنگە ۇلاساتىن ۇلى ءدۇبىردى بوتايدان اتقا قونعان ساڭلاقتار 7 قىركۇيەكتە استانادا اياقتايدى.

ءبىرىنشى كەزەڭنىڭ 100 شاقى­رىمدىق قاشىقتىعىندا قىرعىز­ستان كومانداسى وزگەلەردەن ەداۋىر الدا كەلدى. جەرەبە تارتۋ كەزىندە دە قىرعىز شاباندوزدارىنا جو­رىقتىڭ تۇڭلىگىن ءتۇرىپ, ءبىرىنشى باستاۋ مۇمكىندىگى بۇيىرعان ەدى. كورشىلەر حالىقارالىق مارا­فون-بايگەگە قاتىساتىن شاباندوزداردى دا, جۇيرىكتەردى دە ىرىكتەۋ ارقىلى ايقىنداپ, سىناق بايگەسىن دە وتكىزىپ ۇلگەرىپتى. ءوز ەلدەرىندە 300 شاقىرىمدىق مارافون-بايگە ۇيىمداستىرىپ, اتتاردىڭ تىنىسىن, شاباندوزدىڭ شىدامىن تەكسەرىپ العان ەكەن. كورشى ەلدەن كەلگەن كوماندانىڭ باپكەرى جەڭىسبەك باتىرقۇلوۆ شاكىرتتەرىنىڭ بەتالىسىنا كوڭىلى توعاياتىنىن ايتتى.

«مۇنداي ۇزاق قاشىقتىقتاعى مارافون-بايگەگە بۇرىن-سوڭدى قاتىسىپ كورگەنىمىز جوق. دەگەنمەن دە قىرعىز اتتارىنىڭ مىقتىلىعىن پاش ەتسەك دەپ, تاۋەكەلمەن قوسىپ وتىرمىز. ءبىرىنشى كەزەڭدە جىگىت­تەر توپ باستاپ كەلدى. 50 شاقى­رىمدى 2 ساعات 40 مينۋتتا شاۋى­پ ءوتىپ, مەرەيىمىزدى تاسىتىپ ەدى, قالعان 50 شاقىرىمدا دا الدىنا قارا تۇسىرگەن جوق. حالىقارالىق دودانىڭ ۇيىم­داستىرىلۋىنا ەش ءمىن ايتپايمىز, ءبارى كوڭىلدەن شىعىپ وتىر. ءار ءۇزىلىس سايىن ۆەتەرينارلار تۇلپارلاردىڭ تىنىسىن تەكسەرىپ, جۇرەك قاعىسىن, قان اينالىمىن دا قاداعالايدى. شاباندوزداردىڭ دا احۋالى – ءجىتى باقىلاۋدا. قىسقا كۇندە قىرىق قۇبىلعان اۋا رايىنىڭ دا بۇ­زىلۋى كەدەرگى بولماسا ەكەن دەپ تىلەيمىز. جورىققا نەگىزىنەن جاڭا قىرعىز تۇقىمى, بايىرعى جىلقى تۇقىمدارىن دا سىناپ كورمەككە بەل بۋدىق. بۇل دودانىڭ وتەتىنىن ەكى اي ۋاقىت قالعاندا ەستىپ, بىر­دەن دايىندىققا كىرىستىك. قىرعىزستانداعى رەس­پۋبليكالىق ىرىكتەۋ بايگەسىنە 25 ات قوسىلىپ, سونىڭ اراسىنان 5 جۇيرىكتى تاڭداپ الدىق. ارعىماقتاردى تىزگىندەگەن بەس شاباندوز حالىقارالىق مارافون-بايگەگە قاتىسىپ وتىر. جۇلدەلى ورىننان كورىنسەك دەپ بارىمىزدى سالامىز. ءال-ءازىر كومبەنىڭ قاراسى الىس, 300 شاقىرىمدى ارتقا تاستاعان سوڭ, ۇزدىكتەر ايقىندالا باستايدى. قازاقستاننان قوسىلعان كوماندالاردىڭ اتتارى دا ءتوزىمدى, شى­دامدى ەكەن. بۇل دا بايگە, كىمنىڭ باعى جانىپ, بابى كەلىسەدى, جۇلدە سوعان بۇيىرادى», دەدى ج.با­تىرقۇلوۆ.

ءبىرىنشى كەزەڭنىڭ قورىتىندىسى بويىنشا قىرعىزستان كومانداسى 100 شاقىرىمدى 5 ساعات 12 مينۋت 23 سەكۋندتا شاۋىپ ءوتىپ, كوش باستاپ تۇر. 2-ورىنعا تۇراقتاعان جامبىل وبلىسىنىڭ «اۋليەاتا» كومانداسىنىڭ شاباندوزدارى 5:24:19 سەكۋندتا كەلدى. ۇشتىكتى الماتى قالاسىنىڭ «الاتاۋ» كومانداسى 5:25:01 ۋاقىت كورسەتكىشىمەن تۇيىندەدى. ءبىرىنشى كۇننىڭ بايگەسىن 5:30:46 سەكۋندتا وندىرگەن ماڭعىستاۋ وبلىسى ءتورتىنشى ساتىعا جايعاسسا, بەسىنشى ورىن 5:40:10 ۋاقىتتا كەلگەن قوستاناي وبلىسىنىڭ شاباندوزدارىنا بۇيىردى. ەكىنشى كەزەڭگە اتتانعان قاتىسۋشىلار اراسىندا ازىرگە تەك يران كو­مان­داسىنىڭ عانا قاتارى تۇگەل ەمەس, 100 شاقى­رىمدى بەس شاباندوزى دا شاۋىپ وتكەنىمەن, ەكىنشى كەزەڭگە ولاردىڭ ءبىر اتى جاراماي قالدى. پاۆلودار وبلىسىنىڭ جەرگىلىكتى جابى تۇقىمىنان ىرىكتەلگەن جۇيرىكتەردى تىزگىندەگەن يران شا­باندوزدارى ەكىنشى كەزەڭدى ءتورت اتپەن باستادى. ويتكەنى كۇرەڭ توبەل ارعىماقتىڭ ارتقى اياعى تاعالانباعاندىقتان, تاستاق جولدا تاسىرقاپ, ۆەتەرينار ماماندار كەلەسى كەزەڭگە وتكىزبەدى. بىراق بۇعان مويىعان يراندىق شاباندوزدار جوق. ءبىرىنشى كۇننىڭ قورىتىندىسىندا كوش سوڭىندا قالعانىنا قاراماستان, بارلىق كەزەڭگە قاتىسۋدان ءۇمىتتى, ەندى قالعان ءتورت ات سۇرىنبەسە يگى دەپ تىلەپ وتىر.

« ۇلى دالا جورىعى» حالىق­ارالىق مارافون-بايگەسىن ۇيىم­داس­تىرۋ القاسىنىڭ مۇشەسى سا­كەن سەيىتحان ءبىرىنشى كەزەڭنىڭ العاشقى 50 شاقىرىمىن شاۋىپ ءوتۋ شاباندوزدارعا دا, استىنداعى ارعىماقتارىنا دا جەڭىل تيمەگەنىن اتاپ ءوتتى.

«قازاق پەن قىرعىز باۋىرلاس ەل بولعاندىقتان دا, ۇلتتىق سپورت تۇرلەرىنەن قاشاندا ءبىر-بىرىنە لايىقتى باسەكەلەستىك تۋدىرادى. قىرعىز كومانداسى جالپى نا­تيجەمەن توپ باسىندا. ءبىرىنشى كەزەڭدە 50 شاقىرىم جول نەگىزىنەن تاستاق بولدى. ماڭايدىڭ ءبارى ەگىستىك القاپ بولعاندىقتان, كەي تۇسى سازداۋىت تارتقاندىقتان دا, تاستاق جولدان قيىس ءجۇرۋدىڭ رەتى بولمادى. ەندىگى كەزەڭدەردە مۇنداي قيىندىق تۋىندامايدى دەپ سەنەمىز», دەيدى س.سەيىتحان.