ءتيىمدى يپوتەكا: "ەلوردا جاستارى" باعدارلاماسىنا قۇجات قابىلداۋ باستالدى

ەلوردانىڭ جاس تۇرعىندارىنان باعدارلاماعا قاتىسۋ تۋرالى وتىنىمدەر birge.astana.kz پورتالىندا ونلاين رەجيمدە قابىلدانادى.

"ەلوردا جاستارى" باعدارلاماسىنىڭ الەۋەتتى قاتىسۋشىلارىنا 2024 جىلعى 10 قىركۇيەكتى قوسا العان مەرزىمگە دەيىن قۇجاتتار تاپسىرىپ ۇلگەرۋ كەرەك.

"ەلوردا جاستارى" باعدارلاماسى - وتباسى بانك پەن استانا اكىمدىگىنىڭ بىرلەسكەن جوباسى. بيىل اكىمدىك باعدارلامانى قارجىلاندىرۋعا 1 ملرد 350 ملن تەڭگە ءبولىپ وتىر.

بۇل جاس مۇعالىمدەرگە, دارىگەرلەرگە, جۋرناليستەرگە, مادەنيەت, سپورت قىزمەتكەرلەرىنە, جوو وقىتۋشىلارى مەن عىلىمي قىزمەتكەرلەرىنە, الەۋمەتتىك سالا وكىلدەرىنە, كوممۋنالدىق كاسىپورىنداردىڭ, پوليتسيا دەپارتامەنتىنىڭ, تجد قىزمەتكەرلەرىنە, "قازپوشتا" اق فيليالدارىنىڭ بەيىندى قىزمەتكەرلەرىنە, سونداي-اق "جەتىم بالالار" ساناتى بويىنشا استانا قالاسىندا تۇرعىن ۇيگە كەزەكتە تۇرعاندارعا جەكە تۇرعىن ءۇي ساتىپ الۋ ءۇشىن جەڭىلدىكتى قارىز الۋعا مۇمكىندىك بەرەدى, - دەلىنگەن حابارلامادا.

باعدارلاماعا جاسى 35 جاسقا تولماعان استانا تۇرعىندارى قاتىسا الادى.

الەۋەتتى قارىز الۋشىلاردىڭ ءتىزىمىن ەلوردالىق اكىمدىك قالىپتاستىراتىن بولادى.

قاتىسۋشىلاردى ىرىكتەۋ وتىنىشتەردى قابىلداۋ مەرزىمى اياقتالعاننان كەيىن باستالادى. تىزىمگە ەڭ كوپ ۇپاي جيناعاندار كىرەدى. ولار جۇمىس ءوتىلى ءۇشىن ەسەپتەلەدى. سونداي-اق مۇمكىندىگى شەكتەۋلى وتباسى مۇشەلەرى بار تۇلعالار قوسىمشا ۇپاي الادى.

پۋل قۇرىلعاننان كەيىن ونىڭ قاتىسۋشىسى وتباسى بانكتەن كرەديت الۋعا جولداما الادى. وندا تولەم قابىلەتتىلىگى تەكسەرىلەدى جانە جىلدىق 5% مولشەرلەمە بويىنشا قارىز (جتسم 5,2%-دان باستاپ 5,7%-عا دەيىن) بەرىلەدى. باستاپقى جارنا 10%-دان باستالادى. ەلوردانىڭ جاس تۇرعىنى الا الاتىن كرەديتتىڭ ەڭ كوپ سوماسى – 18 ملن تەڭگە. قارىز 19 جىلعا دەيىنگى مەرزىمگە بەرىلەدى. كرەديت ارقىلى پاتەردى باستاپقى نەمەسە قايتالاما نارىقتان, سونداي-اق "قجك" اق كەپىلدىگى بولعان كەزدە ۇلەستىك قاتىسۋ شارتى بويىنشا سالىنىپ جاتقان تۇرعىن ءۇيدى ساتىپ الۋعا بولادى.

"ەلوردا جاستارى" باعدارلاماسىنىڭ قاتىسۋشىلارىنا قويىلاتىن تالاپتار:

1. قاتىسۋشىنىڭ جاسى ءوتىنىش بەرگەن كەزدە 34 جاستان (قوسا العاندا) اسپاۋى ءتيىس.

2. قاتىسۋشىنىڭ سوڭعى جىلدا استانا قالاسىندا ۇزدىكسىز تۇراقتى تىركەۋدە بولۋى.

3. ءوتىنىش بەرگەن كەزدە وتباسى بانكتە دەپوزيتتىڭ جانە 10% مولشەرىندە باستاپقى جارنانىڭ (دەپوزيتتىڭ بار ەكەندىگى تۋرالى سەرتيفيكات نەمەسە شوتتان ءۇزىندى كوشىرمە) بولۋى.

4. باعدارلاما قاتىسۋشىسىنىڭ جانە ونىڭ وتباسى مۇشەلەرىنىڭ سوڭعى 5 جىلدا قر اۋماعىندا ساتىپ الۋ قۇقىعىمەن دە, قۇقىعىنسىز دا جالعا بەرىلەتىن تۇرعىن ءۇيىنىڭ نەمەسە مەنشىك قۇقىعىنداعى تۇرعىن ءۇيىنىڭ بولماۋى.

5. استانا قالاسىندا تاڭدالعان سالاداعى زەينەتاقى شوتىنان الىنعان ءۇزىندى كوشىرمەمەن راستالاتىن رەسمي جۇمىس ءوتىلى - ءوتىنىش بەرگەن ساتتە كەم دەگەندە سوڭعى ءبىر جىل.

6. وتباسىنىڭ ءاربىر مۇشەسىنە شاققاندا سوڭعى 6 ايداعى تابىس 6 ەڭ تومەنگى كۇنكورىس دەڭگەيىنەن (زەينەتاقى اۋدارىمدارىن, جەكە تابىس سالىعىن جانە وزگە دە مىندەتتى اۋدارىمداردى ەسەپكە الماعاندا) اسپاۋى ءتيىس;

7. باعدارلاماعا ەرلى-زايىپتىلاردىڭ بىرەۋى عانا قاتىسا الادى.