ۇلتتىق قۇندىلىقتار – قاي ورىنعا دا كورىك بەرەر تەڭدەسسىز بايلىق. ەلدىڭ دارالىعىن ايشىقتار ناقىشتى ورنەكتەر بۇگىندە ءتۇرلى بەينەلەر ارقىلى ءار تۇستان كورىنىس تاۋىپ كەلەدى. ۇلان-عايىر جەرىمىزدىڭ قۇنىن ارتتىرار ىرگەلى قازىنالارىمىز شەتەلدىكتەردى دە تامساندىرىپ وتىر.
جاقىندا «نۇرلى جول» تەمىرجول ۆوكزال كەشەنىندە «قازاقستاننىڭ ۇلتتىق قازىناسى» الەۋمەتتىك-مادەني جوباسىنىڭ تۇساۋكەسەرى ءوتتى. ءىس-شاراعا كولىك ۆيتسە-ءمينيسترى ماقسات قالياقپاروۆ, مادەنيەت جانە اقپارات ۆيتسە-ءمينيسترى قانات ىسقاقوۆ, «قتج «ۇك» اق باسقارما توراعاسىنىڭ ورىنباسارى تالعات الدابەرگەنوۆ, استانا قالاسى اكىمىنىڭ ورىنباسارى ەرىك مەيىرحانوۆ, ۇلتتىق سپورت تۇرلەرىنىڭ پرەزيدەنتى يسلامبەك سالجانوۆ, V دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسىنىڭ ورىنباسارى ابىلاي قوندىباەۆ, باسقا دا قوناقتار قاتىستى.
تاعىلىمعا تولى بىرەگەي جوبا «قتج» ۇك» اق فيليالى «ماگيسترالدىق جەلى ديرەكتسياسى» باستاماسىمەن, مادەنيەت جانە اقپارات مينيسترلىگى, قازاقستان رەسپۋبليكاسىنىڭ ۇلتتىق مۋزەيى, «نۇرلى جول» ۆوكزال كەشەنىنىڭ «TCS Engineering» جشس باسقارۋشى كومپانياسى جانە «MYD Production» جشس جارناما وپەراتورىنىڭ قاتىسۋىمەن ىسكە اسىرىلىپ وتىر. جوبانىڭ عىلىمي تۇجىرىمداماسى مەن ديزاينەرلىك شەشىمىن ۇلتتىق مۋزەي ۇجىمى ازىرلەگەن.
– وسى ۇلكەن جوبانى ۇيىمداستىرۋشىلارعا العىس بىلدىرەمىن. بۇل جاي عانا جوبا ەمەس, ۇلتتىق مۋزەيى مەن «نۇرلى جول» تەمىرجول ۆوكزال كەشەنىنىڭ بىرەگەي ەڭبەگى. بيىل ۇلتتىق مۋزەيگە 10 جىل تولادى, وسى ۋاقىت ارالىعىندا مۋزەي 5 ميلليونعا جۋىق ازاماتقا قىزمەت كورسەتكەن. مەنىڭ ويىمشا, بۇگىنگى شارانىڭ اياسىمەن شەكتەلمەي, ءارى قاراي تىنباي جۇمىس جاساۋىمىز قاجەت, – دەدى مادەنيەت جانە اقپارات ۆيتسە-ءمينيسترى قانات ىسقاقوۆ.
قازىرگى تاڭدا ۇلتتىق مۋزەيدىڭ قور كوللەكتسيالارىنان تاريحي-مادەني مۇرا ۇلگىلەرىنە كاسىبي تۇردە ۆيزۋاليزاتسيا جاسالىپ, «نۇرلى جول» كەشەنىنىڭ كۇتۋ زالدارى 40 اقپاراتتىق مودۋلمەن بەزەندىرىلىپ وتىر. اقپاراتتىق مودۋلدەر سەرياسى 3 تىلدە ۇسىنىلعان, ولار: « ۇلى جىبەك جولى», « ۇلىق ۇلىس», «قازاق حاندىعى», «قازاقتاردىڭ رۋحاني الەمى», «قازاق حالقى سالت-داستۇرلەرىنىڭ دانالىعى», «قازاقستان تابيعاتى», «قازاق تاعامدارىنىڭ فيلوسوفياسى» سەكىلدى ىرگەلى تاقىرىپتىق بولىمدەردەن تۇرادى.
«قازاق حالقى سالت-داستۇرلەرىنىڭ دانالىعى» بولىمىندەگى سۋرەتتەردە ۇلتىمىزدىڭ كوكپار, التىباقان سەكىلدى ويىندارى بەينەلەنگەن. سونىمەن قاتار دومبىرا, قوبىز سىندى ۇلتتىق اسپاپتارىمىزدىڭ ايشىقتى سۋرەتى كورەرمەنگە ەرەكشە سەزىم سىيلايتىنى داۋسىز. قىلقالام شەبەرلەرىنىڭ ەڭبەگىنەن تۋعان پاۋەسكە جەككەن ات, وقالى شاپان جامىلىپ, تازى ەرتكەن اڭشى بەينەسى كوركەم كەستەلەنگەن. ءبىتىمى بولەك ونەر تۋىندىلارى شەتەلدىك تۋريستەر مەن قالا قوناقتارىنىڭ ەل مادەنيەتىنە قىزىعۋشىلىعىن تۋدىرارى انىق.
– مۇنداي كورمەنىڭ اشىلۋى ۇلكەن ماڭىزدى شارا دەپ ويلايمىن. اللا بۇيىرتسا, ەندى 9 كۇننەن كەيىن ەلوردامىزدا V دۇنيەجۇزىلىك كوشپەلىلەر ويىندارى وتەدى. وعان 90 مەملەكەتتەن 2000 سپورتشى, مىڭداعان شەتەلدىك تۋريستەردىڭ كەلۋى جوسپارلانىپ وتىر. قازاقستاننىڭ مادەنيەتى, تاريحى وتە مول, بۇل – اتا-بابامىزدان قالعان اسىل مۇرامىز. مۇنى ءارى قاراي دامىتۋعا ۇلەس قوسىپ جاتىرمىز, وسى جولدا قىزمەت ەتە دە بەرەمىز, – دەدى ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ.
«قازاقستاننىڭ حالىق قازىناسى» جوباسى وتاندىق تەمىرجولدىڭ – 120, ۇلتتىق مۋزەيدىڭ 10 جىلدىقتارى, سونداي-اق كونستيتۋتسيا كۇنىنە, استانادا دۇنيەجۇزىلىك كوشپەلىلەر ويىندارىن وتكىزۋگە ورايلاستىرىلدى. ۇيىمداستىرۋشىلاردىڭ بۇل ەكسپوزيتسيا ەلوردا جولاۋشىلارى مەن قوناقتارىنىڭ نازارىن اۋدارىپ, قازاق مادەنيەتىمەن جاقىن تانىسۋعا مۇمكىندىك بەرەرىنە سەنىمى مول. كۇتۋ زالدارىندا وتاندىق سۋرەتشىلەر تۋىندىلارىنىڭ ۇزىندىلەرىمەن, مۋزەي ەكسپوناتتارىنىڭ سۋرەتتەرى ارقىلى ماڭىزدى وقيعالار, تاريحي تۇلعالار, قازاق حالقىنىڭ ماتەريالدىق جانە رۋحاني الەمىمەن جاقىن تانىسۋعا بولادى.