تاتارستان استاناسىندا جاھاندىق ءىىى جاستار ءسامميتى ءوتتى. ءىس-شاراعا قازاقستان رەسپۋبليكاسىنىڭ قازان قالاسىنداعى باس كونسۋلى ەرلان ىسقاقوۆ, مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ, ەكولوگ ءمادي الدابەرگەنوۆ, رەجيسسەر شىڭعىس ماقانوۆ ارنايى قاتىستى. باسقوسۋدا تسيفرلاندىرۋ جانە جاستار ساياساتىنىڭ زاماناۋي قۇرالدارى تالقىلاندى.
ءسامميتتى تاتارستان رەسپۋبليكاسىنىڭ ۇكىمەتى, تاتارستان رەسپۋبليكاسىنىڭ جاستار ىستەرى بويىنشا مينيسترلىگى جانە «يسلام ىنتىماقتاستىعى ۇيىمىنىڭ جاستار فورۋمى» حالىقارالىق ۇيىمى ۇيىمداستىردى. جالپى, جاھاندىق جيىندا الەمنىڭ 43 ەلىنىڭ 100-دەن اسا جاستار ساياساتىنا جاۋاپتى مينيسترلىكتەر مەن ۆەدومستۆولاردىڭ باسشىسى جانە ءىرى حالىقارالىق ۇيىمداردىڭ وكىلى بوي كورسەتتى.
فورۋم اياسىندا تاتارستان رەسپۋبليكاسىنىڭ رايىسى رۋستام ميننيحانوۆتىڭ قاتىسۋىمەن پلەنارلىق وتىرىس ۇيىمداستىرىلدى. وندا قازىرگى قوعامداعى وتباسى ينستيتۋتىنا قاتىستى ماسەلەلەر قوزعالدى. بۇعان قوسا جاساندى ينتەللەكت جانە ۆيرتۋالدى شىندىق, جاستار اراسىنداعى تسيفرلىق ترەندتەر بويىنشا دا سەسسيالار ءوتتى. جيىن قاتىسۋشىلارى جاھاندانۋ داۋىرىندە ءداستۇرلى قۇندىلىقتاردى ساقتاۋ ماسەلەسىن ءسوز ەتتى. ءوز كەزەگىندە, قازاقستان مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ قازاقستاندا بۇل باعىتتا اتقارىلىپ جاتقان جۇمىستارعا توقتالدى.
«بۇل سامميت يسلام ىنتىماقتاستىعى ۇيىمىنا مۇشە ەلدەر جاستارىنىڭ ديالوگى, تاجىريبە الماسۋى ءۇشىن ماڭىزدى الاڭ. ءبىز تسيفرلىق تەحنولوگيالار ءومىرىمىزدىڭ بارلىق سالاسىنا ەنگەن داۋىردە ءومىر ءسۇرىپ جاتىرمىز. ينتەرنەت پەن الەۋمەتتىك مەديا جاستار ءۇشىن شەكسىز مۇمكىندىكتەر اشتى دەۋگە بولادى. ماسەلەن, كەز كەلگەن ءبىلىم بۇرىنعىدان دا قولجەتىمدى بولا ءتۇستى. الەمنىڭ ءار قيىرىنداعى ازاماتتارمەن قارىم-قاتىناس كۇندەلىكتى قاراپايىم دۇنيەگە اينالدى. بۇل يگىلىك جاستاردىڭ ءوز جوبالارىن قۇرۋىنا, جاھاندىق دەڭگەيدەگى جيىن نە بايقاۋلارعا قاتىسۋعا, الەمنىڭ ءار تۇكپىرىندەگى ازامات دۇنيە جۇزىنە ورتاق ماسەلەلەردى شەشۋگە ۇلەس قوسۋىنا جول اشتى», دەي كەلە ول كەز كەلگەن قوعامدى قالىپتاستىرۋدا نەگىز بولاتىن ءداستۇرلى قۇندىلىقتاردىڭ ماڭىزىن اشىپ ايتتى.
– قازاقستاندا دالا دەموكراتياسىنىڭ داستۇرلەرىن ساقتاۋ ءۇشىن 2022 جىلدان باستاپ ەل پرەزيدەنتى جانىنداعى ۇلتتىق قۇرىلتايدىڭ جىل سايىنعى وتىرىسى وتكىزىلىپ كەلەدى. قۇرىلتاي قوعامداعى ءارتۇرلى توپتاردىڭ, سونىڭ ىشىندە جاستاردىڭ كۇش-جىگەرىن بىرىكتىرۋ قاجەت بولعان جەدەل وزگەرىستەر مەن جاھاندىق سىن-قاتەرلەر داۋىرىندە ەرەكشە ماڭىزعا يە بولىپ وتىر. بيىل وتكەن باسقوسۋدا مەملەكەت باسشىسى قاسىم-جومارت توقاەۆ ەل جاستارىنا, بارشا وتانداستارىمىزعا پاتريوتيزم, ادىلدىك, كاسىپقويلىق, ۇنەمشىلدىك, ەڭبەكقورلىق, وتان مەن وتباسى الدىنداعى جاۋاپكەرشىلىك سياقتى ەڭ اسىل قاسيەتتەردى تاربيەلەۋگە باعىتتالعان «ادال ازامات» تۇجىرىمداماسىن ۇستانۋ قاجەت ەكەنىن باسا ايتتى. سايىپ كەلگەندە, تەحنولوگيا – جانسىز دۇنيە. سوندىقتان قۇندىلىقتاردى بويىنا سىڭىرگەن ادام عانا جاڭاشىلدىقتاردى ىزگى نيەتپەن پايدالانا الادى. دەمەك تسيفرلىق ءداۋىر ءبىزدىڭ ءداستۇرلى قۇندىلىقتارىمىزدى الماستىرماي, ودان ءارى تولىقتىرۋدى كوزدەيدى. قازاقستان حالىقارالىق ىنتىماقتاستىقتى بەلسەندى قولدايدى جانە بىرلەسكەن كۇش-جىگەرمەن عانا ورنىقتى دامۋعا, وركەندەۋ مەن بەيبىتشىلىككە قول جەتكىزۋگە بولادى دەپ ەسەپتەيدى. قازىرگى ۋاقىتتا ەلىمىزدە 5,7 ميلليون جاس بار. ولاردى جان-جاقتى قولداۋ قازاقستان رەسپۋبليكاسىنىڭ مەملەكەتتىك جاستار ساياساتىنىڭ نەگىزگى باعىتتارىنىڭ ءبىرى. ءبىز مۇنداي باسقوسۋلاردان جاستار ديپلوماتياسىن دامىتۋ, ءبىلىم الماسۋ, عىلىم, ءبىلىم, كاسىپكەرلىك, مادەنيەت سالالارىنداعى بىرلەسكەن جوبالاردى جۇزەگە اسىرۋ ءۇشىن ۇلكەن الەۋەتتى كورىپ وتىرمىز, – دەيدى ءبىرجان ءالىمجانوۆ.
سونداي-اق فورۋمدا تاتارستان رەسپۋبليكاسىنداعى «حالىقارالىق جاستار ىنتىماقتاستىعى» فەدەرالدىق جوبالىق كەڭسەسىنىڭ جۇمىسى تانىستىرىلدى. سامميت قورىتىندىسى بويىنشا يسلام الەمىن قولداۋعا جانە يىۇ ەلدەرىنىڭ جاستارىن دامىتۋعا باعىتتالعان قارار قابىلدانىپ, بىرلەسكەن ءىس-قيمىل جوسپارىنا قول قويىلدى. كەلەسى جىلى تاتارستاندا يسلام جاستارى ويىندارىن وتكىزۋ جوسپارلانىپ وتىر.