استانا. 24 قاڭتار. الەمنىڭ مۇناي رىنوگىندا ساۋد ارابياسى مۇنايىنىڭ ۇلەس-سالماعى بۇرىنعىدان دا ارتا تۇسەدى. ال كورول ابداللا قايتىس بولعاننان كەيىن ونىڭ تاعىنا وتىرعان جاڭا كورول سالمان الدىڭعى بيلەۋشىنىڭ تاڭداپ العان باعىتىنان تايمايدى. بۇ تۋرالى بريتانيانىڭ Telegraph گازەتى جازدى.
ساۋديانىڭ التىنشى كورلى ابداللا ابدۋل-ازيز ال ساۋد 23 قاڭتار كۇنى 91 جاسىندا قايتىس بولدى. ونىڭ ورنىن 79 جاستاعى ءىنىسى سالمان باستى.
باسىلىمنىڭ پىكىرىنشە, بۇعان دەيىن ينسۋلت الىپ قالعان سالمان «ۋاقىتشا» مونارح بولىپ تابىلادى. ونىڭ ماقساتى اعاسىنىڭ ميسسياسىن ابىرويمەن ورىنداپ, ەلدىڭ تاياۋ شىعىستاعى بۇرىننان بار ساياسي جانە ەكونوميكالىق كۇشىن نىعايتا ءتۇسۋ بولماق. ال مۇناي باعاسىنىڭ ارزان بولا ءتۇسۋى ساۋد بيلەۋشىسى ءۇشىن تاپتىرمايتىن باعىت. ول تەك ەلدىڭ باعىن اسىرا بەرەدى. وسىعان قاراعاندا, ساۋد ارابياسى ءوزىنىڭ مۇناي رىنوگىنداعى قارسىلاستارىن بۇدان ارى قىساتىن بولادى.
Telegraph گازەتىنىڭ وپەك-تەگى مانبەلەرى ساۋديانىڭ بيىلعى جىلى الدىنا قويىپ وتىرعان مىندەتى كۇنىنە قازىرگى 9,2 ملن. ورنىنا 10,5 ملن. باررەل ءوندىرۋ دەڭگەيىنە جەتكىزۋ بولىپ وتىرعانىن جەتكىزدى. مۇنى ول ۇيىمنىڭ باسقا مۇشەلەرىنىڭ كەلىسىمىنسىز جاساعالى وتىر.
«رىنوك مۇنايعا تولىپ تۇر, ال مۇناي-گاز كومپانيالارى ءوز جۇمىستارىنىڭ كولەمىن بەلسەنە قىسقارتىپ جاتىر. ساۋد ارابياسىنىڭ كۇتكەنى دە وسى. ەلدىڭ 750 ملرد. دوللارعا جۋىق ۆاليۋتالىق رەزەرۆى بيىلعى جىلعى بيۋدجەت تاپشىلىعىن جابۋ مەن مەملەكەتتىك سۋبسيديانى قارجىلاندىرۋعا مولىنان جەتەدى»., - دەپ جازادى باسىلىم.
مۇرات ايتقوجا.
دەرەك, سۋرەت: Telegraph.