ەلدەگى ايماقتاردىڭ ءوسىپ-وركەندەۋىنە جول اشاتىن جاڭا ءوندىرىس ورىندارىن بارىنشا دامىتۋ كەرەك. بۇل تۋرالى پرەزيدەنت قاسىم-جومارت توقاەۆ قازاقستان حالقىنا جولداۋى بارىسىندا مالىمدەدى, دەپ جازادى Egemen.kz.
مەملەكەت باسشىسى ايتىپ وتكەندەي, ەلىمىزدىڭ ونەركاسىپ الەۋەتىن تولىق پايدالانۋ ءۇشىن جان-جاقتى شارالار قابىلداۋ قاجەت. وسى ماقساتتا ۇكىمەت 17 ءىرى جوبانىڭ ءتىزىمىن جاسادى. وندا تەرەڭ وڭدەۋ ءتاسىلىن مەڭگەرۋگە باسىمدىق بەرىلگەن.
«مەن جۋىردا قاراعاندى وبلىسىندا بولدىم. سول كەزدە «Qarmet» مەتاللۋرگيا كومبيناتىنا باردىم. وتاندىق ينۆەستور كەلگەن سوڭ, ونداعى احۋال ەداۋىر تۇراقتالدى. كاسىپورىن جاڭعىرتىلا باستادى. بۇل قادام وندىرىلەتىن ءونىم كولەمىن ايتارلىقتاي ارتتىرۋعا ءتيىس. ساران قالاسىنىڭ ەكونوميكاسىن ءارتاراپتاندىرۋ جۇمىسى جۇرگىزىلىپ جاتىر. وندا اۆتوكولىك دوڭعالاعىن جانە تۇرمىستىق تەحنيكا شىعاراتىن وندىرىستەر ىسكە قوسىلدى. سونىڭ ارقاسىندا بۇل ەلدى مەكەن مونوقالالار ساناتىنان شىعارىلدى. باسقا دا مونوقالالارعا دەم بەرۋ ءۇشىن وسى تاجىريبەنى قولدانۋ قاجەت. جالپى, ايماقتاردىڭ ءوسىپ-وركەندەۋىنە جول اشاتىن جاڭا ءوندىرىس ورىندارىن بارىنشا دامىتۋ كەرەك», دەپ ناقتىلادى پرەزيدەنت.
ەسكە سالايىق, بيىل مەملەكەت باسشىسىنىڭ ارنايى جارلىعىمەن الاتاۋ قالاسى قۇرىلعان ەدى. قاسىم-جومارت توقاەۆتىڭ ايتۋىنشا, جاڭا قالا قارقىندى داميتىن, يننوۆاتسيا كەڭىنەن قولدانىلاتىن ءارى بىلىكتى ماماندار جۇمىس ىستەيتىن ورىنعا اينالۋى قاجەت. ۇكىمەت وندا جايلى ءومىر ءسۇرىپ, تابىستى ەڭبەك ەتۋگە, ينۆەستيتسيا سالۋعا قولايلى جاعداي جاساۋعا ءتيىس.
«اۆتوكولىك قۇراستىرۋ ىسىندە وڭ ناتيجەلەر بار. وسى قارقىندى ساقتاپ, جەرگىلىكتى ءوندىرىس كولەمىن ۇدايى ارتتىرۋ كەرەك. مەملەكەتتىڭ اۆتوكولىك ونەركاسىبىنە كورسەتىپ جاتقان جان-جاقتى قولداۋى ءتۇپتىڭ تۇبىندە تولىققاندى اۆتوكولىك قۇراستىرۋ كلاستەرى رەتىندە ەلدىڭ يگىلىگىنە اينالۋى قاجەت», دەپ قوستى قاسىم-جومارت كەمەل ۇلى.