استانادا LRT قۇرىلىسىنا بايلانىستى قابانباي باتىر داڭعىلى ءۇش كۇنگە جابىلادى, دەپ حابارلايدى Egemen.kz «City Transportation Systems» جشس (CTS) ءباسپاسوز قىزمەتىنە سىلتەمە جاساپ.
CTS مالىمەتىنشە, 2 قىركۇيەكتە ساعات 00:00-دەن 5 قىركۇيەك كۇنى ساعات 00:00-گە دەيىن قابانباي باتىر داڭعىلى بويىمەن – «استانا جۇلدىزى» اينالما جولىنان ماڭگىلىك ەل داڭعىلىنىڭ قيىلىسىنا دەيىن كولىك قوزعالىسى تولىعىمەن شەكتەلەدى.
«تۇرعىن ءۇي كەشەندەرى مەن جولدىڭ جابىلعان بولىگىنە ىرگەلەس اۋماقتاردىڭ تۇرعىندارى ءۇشىن ارنايى وتكەل ۇيىمداستىرىلادى. LRT قۇرىلىس جۇمىستارىنىڭ جوسپارىنا سايكەس, اتالعان كەزەڭدە مەتالل قۇرىلىمداردى بولشەكتەۋ جانە قۇراستىرمالى تەمىربەتون ارقالىقتاردى ورناتۋ جۇمىستارى جۇرگىزىلەدى», - دەلىنگەن كاسىپورىن حابارلاماسىندا.
قالا تۇرعىندارى مەن قوناقتارىنا ءجۇرۋ باعىتتارىن الدىن الا جوسپارلاپ الۋ سۇرالادى.