استانا. 24 قاڭتار. رەسەيلىك رەجيسسەر اندرەي زۆياگينتسەۆتىڭ «لەۆيافان» ءفيلمى ءالى پروكاتقا شىقپاعانىنا قاراماستان, بيىلعى جىل باسىنان بەرى كەڭ تالقىلاۋعا ءتۇسىپ جاتىر. بۇل تۋرالى Interfax حابارلادى.
كارتينا «وسكار» سىيلىعىنا ۇسىنىلعان. ول قازىر امەريكا كينواكادەمياسى ماماندارىنىڭ قاراۋىنان وتۋدە. ال ونىڭ كوشىرمەسى قاراقشىلىق سايتتارىندا ءجۇر. سونىڭ ارقاسىندا جۇرتتىڭ تالقىسىنا ىلىككەن. دەگەنمەن, كورەرمەندەر ونى كەڭ فورماتتى ەكراننان كورۋگە قاتتى ىنتىعىپ وتىر. وسى ارالىقتا «لەۆيافان» بىرقاتار حالىقارالىق جۇلدەلەردى, سونىڭ ىشىندە «التىن گلوبۋستى» دا الىپ ۇلگەردى.
جاقىندا «دوجد» تەلەارناسىنا بەرگەن سۇحباتىندا اندرەي زۆياگينتسەۆ كارتيناعا اتتىڭ اتاۋىنىڭ ول ابدەن ءتۇسىرىلىپ بولعاننان كەيىن بەرىلگەنىن مالىمدەدى. سول كەزدە رەجيسسەر فيلم پروتوسيۋجەتىن ايۋب (ورىسشا - يوۆا) پايعامباردىڭ «كونە وسيەت» كىتابىنان كەزىكتىرگەن. «كونە وسيەت» ماتىنىنە ساي, ايۋب – ب ۇلىنبەگەن, ءادىل جانە قۇدايدان قورقاتىن ادام كەنەتتەن جاراتقاننىڭ شاپاعاتىنان تىس قالادى دا, ءوزىنىڭ بالالارى مەن بارلىق م ۇلىك-مۇكامالىنان, سوڭىنان دەنساۋلىعىنان ايرىلادى. ول قاتتى كۇيزەۋشىلىككە تۇسەدى. سوندا بۇعان ايەلى قۇدايدى مانسۇق ەتىپ, ولە قالۋدى ۇسىنادى. بىراق ايۋب بۇدان بىردەن باس تارتادى. ال دوستارى مۇنىڭ بۇعان الدەقانداي ءبىر كۇنالارى ءۇشىن بەرىلىپ جاتقانىن, ونىڭ سىناق ەكەنىن بىلدىرەدى. وسىعان كەلىسكەن ايۋب اقىرىندا قۇدايعا جالبارىنادى. سول كەزدە جاراتقان ونى كەشىرىپ, الىپ قويعان نارسەلەرىنىڭ ءبارىن قايتارادى..
XVII عاسىردىڭ ورتاسىندا اعىلشىن فيلوسوفى توماس گوببس «لەۆيافان, نەمەسە ماتەريا, ءپىشىن, شىركەۋ جانە ازاماتتىق مەملەكەت بيلىگى» دەگەن شىعارماسىن جاريالايدى. وندا تاۋراتتاعى قۇبىجىقتىڭ وبرازى قۋاتتى مەملەكەتتى بىلدىرەتىن ەتىپ كورسەتىلەدى.
زۆياگينتسەۆتىڭ تۇسىندىرۋىنشە, «لەۆيافاننىڭ» باس كەيىپكەرى نيكولاي تاپ وسى ايۋب تۋرالى جەلىنىڭ كولەڭكەسىندە قالىپ قويادى. فيلم اتاۋى, مىنە, گوببستىڭ جوعارىداعى ەڭبەگىنەن الىنادى.
قازىر فيلم جونىندەگى جۇرت پىكىرلەرى ەكىگە جارىلىپ تۇر. ءبىرى قارالاسا, ەكىنشىسى اقتاۋعا تىرىسادى. كارتينا ءالى كورەرمەن نازارىنا شىقپاعانمەن, وندا ادەپسىز لەكسيكانىڭ وتە كوپ ەكەنى بەلگىلى بولىپ قالدى. ال وتكەن جىلعى 1 شىلدەدەن باستاپ كوركەم تۋىندىلاردا بوعاۋىز سوزدەردىڭ پايلدالانىلۋىنا تىيىم سالىنعاننان كەيىن ءفيلمنىڭ پروكاتقا جولداما الۋى قيىندادى. ال ءفيلمدى جاساۋشىلار ونىڭ 1 شىلدەگە دەيىن ءتۇسىرىلىپ قويىلۋىنا بايلانىستى, جوعارىداعى تىيىمنىڭ وزدەرىنىڭ تۋىندىلارىنا جۇرمەيتىنىنە ءۇمىت ارتقىلارى كەلەدى. بۇل – ءبىر. ەكىنشىدەن, كارتينادا اراق ءىشۋ وقيعاسى ءتىپتى كوپ. رەسەي مادەنيەت ءمينيسترى ۆلاديمير مەدينسكي وسىعان وراي: «بىزدەگىلەر تاپ وسىلاي ىشپەيدى» دەگەندى ايتادى.
مۇنىڭ ءبارى جەكەلەگەن نارسەلەر. ال جەلىدە ءفيلمنىڭ قاراقشىلىق نۇسقاسى پايدا بولعاننان كەيىن قاسيەتتى نارسەلەردى اياققا تاپتادى دەگەن سارىنداعى سىنداردان گورى كەڭ اۋقىمدا مىنەۋ كەڭ ەتەك الىپ كەتتى. ولار نەگىزىنەن ءفيلمدى جاساۋشىلاردى پاتريوتتىق سەزىمنەن ادا دەگەن مازمۇندا ايىپتاماق بولادى. مۇنداي توپتاعىلاردىڭ ۇعىمىنشا, كارتينا رەسەي بيلىگىن, پراۆوسلاۆيەنى, تۇتاستاي العاندا, رەسەيدىڭ ءوزىن قارالاۋعا ارنالعان بولىپ شىعادى. تاعى بىرقاتار كورەرمەندەر تۋىندىنىڭ وسىلايشا باتىسقا جاعۋ, ءسويتىپ, ولاردىڭ جۇلدەلەرى مەن بايگەلەرىن جەڭىپ الا بەرۋ ماقساتىندا تۇسىرىلگەنىن دە العا تارتادى. ەندى بىرەۋلەر ءفيلمنىڭ كوركەمدىك دەڭگەيى تومەن دەگەن تۇرعىداعى سىنىن بىلدىرەدى.
ءبىر ايتارلىعى, «لەۆيافاندى» ۇناتقان قاۋىم دا از ەمەس. ولار رەسەي بيلىگى مەن پراۆوسلاۆيەنى «قارالاۋدىڭ» استارىندا شىندىق بار ەكەنىن جايىپ سالادى. فيلمدە ەلدەگى ەڭ اۋىر جاعدايلار كورسەتىلگەن, دەيدى وندايلار. ءومىردىڭ شىندىعىن وسىدان كورەدى.
وسىلايشا اتالمىش فيلم ەكرانعا شىقپاي جاتىپ-اق ۇلكەن رەيتينگكە يە بولىپ جاتىر. كۇنى ەرتەڭ شىعا قالسا, ونىڭ ناعىز كاسسالى دۇنيە بولعالى تۇرعانىن ەندى پايىمداۋ قيىن ەمەس.
مۇرات ايتقوجا.
دەرەك, سۋرەت: Interfax.