جامبىل وبلىسى اكىمىنىڭ ورىنباسارى ءابىلحايىر تامابەك Facebook-تەگى پاراقشاسىندا ءوزىنىڭ جۇمىسىن نە ءۇشىن جارنامالامايتىندىعىن ايتىپ بەردى, دەپ حابارلايدى Egemen.kz.
وعان جاقىندا استانادان ءبىر جەرلەسى حابارلاسقان كورىنەدى.
"سەن ەلگە بارعاندا قاتتى قۋاندىق, ءبىراز شارۋا اتقارادى دەپ ەدىك, دىم بىتىرمەي جاتىرسىڭ عوي", - دەگەن ول سالعان جەردەن.
- ونىڭ ءۋاجىن "جۇمىسىڭنىڭ جارناماسى جوق قوي" دەپ قابىلدادىم. جاۋابىم ارقاشان بىرەۋ: ءىستىڭ ءتۇبىن كورمەي بەتىن جىلتىراتىپ كەتۋدەن اۋلاقپىن. ايتپەسە ەكى جۇمىس بولادى. كوزبوياۋمەن "جىلدام جەڭىسكە" جەتەرسىڭ, بىراق تاعدىرى قىسقا, ارتى شالا. ەكى جۇمىس, ەسىل ۋاقىت. قىزمەت ۋاقىتشا, ال ءتۇبى تۋعان جەردە قالامىز. ەل بەتىنە ىستەگەن ءىسىمىز ءۇشىن ۇيالماي قاراي الاتىنداي بولۋىمىز كەرەك. ءپرينتسيپىم – وسى, – دەيدى ءابىلحايىر تامابەك.