پاۆلودار وبلىسىنا جۇمىس ساپارى بارىسىندا پرەمەر-ءمينيستردىڭ ورىنباسارى تامارا دۇيسەنوۆا وڭىردەگى بىرقاتار الەۋمەتتىك نىساندى ارالادى.
ەكىباستۇز قالاسىندا ۆيتسە-پرەمەر «سامعاۋ» بالالار شىعارماشىلىق ءۇيىنىڭ قۇرىلىس بارىسىمەن تانىستى. جوبا مەملەكەت باسشىسىنىڭ تاپسىرماسىمەن سالىنىپ جاتىر. بىلتىر قازان ايىندا بيۋدجەتتەن تىس قاراجاتتار ەسەبىنەن باستالعان قۇرىلىس قازىرگى ۋاقىتتا اياقتالۋعا جاقىن قالدى.
زاماناۋي قۇرال-جابدىقتارمەن قامتىلعان ءبىلىم بەرۋ كەشەنىندە 12 باعىت بويىنشا ۇيىرمەلەر مەن سەكتسيالار ۇيىمداستىرىلادى. ينكليۋزيۆتىلىككە ەرەكشە نازار اۋدارىلعان – نىسان ەرەكشە قاجەتتىلىگى بار بالالارعا تولىعىمەن بەيىمدەلگەن, سونداي-اق اتا-انالاردى پسيحولوگيالىق-پەداگوگيكالىق قولداۋ ورتالىعى دا جۇمىس ىستەمەك. ورتالىق قالا بالالارىن مەكتەپتەن تىس ءىس-شارالارمەن 32%-دان 70%-عا دەيىن قامتۋعا مۇمكىندىك بەرەدى. تامارا دۇيسەنوۆا نىساننىڭ ماڭىزدىلىعىن اتاپ ءوتىپ, قۇرىلىس جۇمىستارىن بەلگىلەنگەن مەرزىمدە اياقتاۋدى تاپسىردى.
پاۆلوداردا تامارا دۇيسەنوۆا «Viamedis Pavlodar» جشس ەمحاناسىنا باردى. قالانىڭ №4 ەمحاناسى ءمجا جوباسى اياسىندا جەكە كومپانياعا سەنىمگەرلىك باسقارۋعا بەرىلگەن بولاتىن. بۇل ونىڭ كادرلىق الەۋەتىن كەڭەيتۋگە جانە نىعايتۋعا, سونداي-اق ينفراقۇرىلىمىن تۇبەگەيلى جاقسارتۋعا مۇمكىندىك بەردى. نىسان كت, مرت, باسقا دا زاماناۋي مەديتسينالىق قوندىرعىلارمەن جابدىقتالعان.
جۇمىس ساپارى بارىسىندا وبلىس اكىمى اسايىن بايحانوۆپەن بىرگە وڭىردەگى مەديتسينا ۇيىمدارى باسشىلارىمەن كەڭەس وتكىزىلدى. وندا مەديتسينالىق قىزمەت ساپاسىن جاقسارتۋ, جاڭا تەحنولوگيالاردى ەنگىزۋ, ونىڭ ىشىندە ءدارى-دارمەكتى تاڭبالاۋ مەن قاداعالاۋدى ەنگىزۋ ماسەلەلەرى تالقىلاندى. قازىر وڭىرلەرگە 11 مىڭعا جۋىق تاڭبالانعان پرەپارات جىبەرىلدى. ونىڭ 600-ءى ءوڭىردىڭ ءدارىحانالار جەلىسىنە جەتكىزىلدى.
دەنساۋلىق ساقتاۋ ۆيتسە-ءمينيسترى ەرجان نۇرلىباەۆ دەنساۋلىق ساقتاۋ جۇيەسىنىڭ جاعدايى, سالاداعى قىزمەت كورسەتۋ ساپاسىن جاقسارتۋ جانە حالىقتى قامتۋدى ۇلعايتۋ بويىنشا جۇرگىزىلىپ جاتقان جۇمىستار تۋرالى باياندادى.
بۇگىنگى تاڭدا وبلىستا 117 مىڭنان استام ادام ساقتاندىرىلماعان. ءمامس جۇيەسىنە ازاماتتاردى تارتۋ ءۇشىن مەكەنجاي بويىنشا جۇمىس جۇرگىزۋ مىندەتى قويىلدى.
«ازاماتتاردىڭ مارتەبەسىن انىقتاۋ ماڭىزدى. جۇيەگە تارتىلماعانداردىڭ اراسىندا مەملەكەت ەسەبىنەن اۋدارىم جۇرگىزىلەتىن ادامدار ساناتى بولۋى مۇمكىن. ال ەڭبەككە قابىلەتتى ازاماتتاردى جۇمىسپەن قامتۋ بويىنشا شارالار قابىلدانۋى ءتيىس. دارىلىك زاتتاردى تاڭبالاۋ جانە قاداعالاۋ ۇدەرىسى كونترافاكتىلىك ونىمدەردى اينالىمنان شىعارۋعا باعىتتالعان. حالىق ساپالى ءارى سەرتيفيكاتتالعان ءدارى-دارمەكتەردى قولداناتىنىنا سەنىمدى بولۋى كەرەك», دەپ اتاپ ءوتتى تامارا دۇيسەنوۆا.
جۇمىس ساپارى بارىسىندا ۆيتسە-پرەمەر مالايسارى باتىر اتىنداعى ورتا مەكتەپكە باردى. مۇندا ول وقۋشىلاردىڭ قاۋىپسىزدىگىن قامتاماسىز ەتۋ, مەكتەپ اسحانالارىنداعى تولەم جۇيەسىن تسيفرلاندىرۋ, سونداي-اق وقۋشىلارعا كاسىپتىك باعدار بەرۋ بويىنشا جۇمىستارمەن تانىستى.
تامارا دۇيسەنوۆا وبلىستىڭ ءبىلىم ۇيىمدارى باسشىلارىمەن جينالىس وتكىزدى. وندا ساپانى ارتتىرۋ ماسەلەلەرى تالقىلاندى. قازىر وبلىستا 359 مەكتەپ جۇمىس ىستەيدى. جوبالىق كەڭسە قۇرىلىپ, ءبىرىنشى كەزەڭدە 14 ماقساتتى ءبىلىم مەكەمەسىندە ءبىلىم ساپاسىن كوتەرۋ ءۇشىن ادىستەمەلىك شارالار قابىلدانا باستادى.
ۆيتسە-پرەمەر پاۆلودار وبلىسى ءبىلىم ساپاسى بويىنشا ەلىمىزدە كوش باستاپ تۇرعانىن اتاپ ءوتىپ, ءبىلىم بەرۋدى تۇلعانى دامىتۋدىڭ كوپدەڭگەيلى جۇيەسى رەتىندە قاراستىرا وتىرىپ, ناتيجەلەردى ءارى قاراي جاقسارتۋ قاجەت ەكەنىن اتاپ ءوتتى.
«پاۆلودار وبلىسى – ءبىلىم ساپاسى بويىنشا قازىر ەلىمىزدەگى ۇزدىك بەستىكتىڭ قاتارىندا. جاقسى كورسەتكىشتەردى ساقتاپ قانا قويماي, جوعارىلاتۋعا دا ۇمتىلۋ ماڭىزدى. ماقساتتى مەكتەپتەردى انىقتاۋ قاجەتتى شارالاردى قابىلداۋعا مۇمكىندىك بەرەدى. بالاباقشا, مەكتەپ, كوللەدج, جوو جەكە تۇلعانى دامىتۋدىڭ دايەكتى ءارى ءوزارا بايلانىستى جانە كوپدەڭگەيلى جۇيەسى رەتىندە قاراستىرىلۋعا ءتيىس», دەپ اتاپ ءوتتى ت.دۇيسەنوۆا.