ەلىمىزدىڭ ءار ايماعىندا «ابايلاڭىز, بالالار!» ناۋقانى جالعاسىپ جاتىر. وقۋ جىلىنىڭ باستالۋى قارساڭىندا ءداستۇرلى ۇيىمداستىرىلاتىن اكتسيا بيىل 26 تامىز بەن 6 قىركۇيەك ارالىعىندا وتكىزىلەدى. مۇنداعى ماقسات – وقىس وقيعالاردىڭ الدىن الۋ, بالاقايلاردىڭ جولداعى قاۋىپسىزدىگىنە نازار سالۋ. اسىرەسە كولىك جۇرگىزۋشىلەرىن مەكتەپ ماڭىندا ساق بولۋعا شاقىرۋ.
جىل باسىنان بەرى ەلوردادا بالالاردىڭ قاتىسۋىمەن 123 جول-كولىك وقيعاسى تىركەلگەن. ونىڭ ىشىندە كامەلەتكە تولماعان 126 بالا زارداپ شەكسە, وكىنىشكە قاراي, ءبىر ءجاسوسپىرىمنىڭ ءومىرىن قۇتقارۋ مۇمكىن بولماعان.
«بالالاردىڭ جول-كولىك وقيعالارىنا تۇسپەۋىنىڭ, جاراقاتتانۋىنىڭ الدىن الۋ, كامەلەتكە تولماعانداردىڭ كوشەلەر مەن جولداردا قاۋىپسىز ءجۇرىپ-تۇرۋىنا بايلانىستى داعدىلارىن بەكىتۋ وتە ماڭىزدى. بۇل ىسكە اسىرەسە وقۋ جىلى باستالۋى قارساڭىندا ەرەكشە دەن قويىلادى. وسى ورايدا رەسپۋبليكالىق اكتسيا اياسىندا جاپپاي قالا اۋماعىندا ورنالاسقان بارلىق مەكتەپتىڭ وقۋشىلارىنا تانىمدىق ءىس-شارالار وتكىزىلىپ جاتىر. ماسەلەن, كەشە استانا قالاسىنداعى №54 مەكتەپ-ليتسەيىنىڭ جاس جول ينسپەكتورى مەكتەپ جاساعىمەن بىرلەسىپ اۆتوكولىك قۇرالدارىنىڭ جۇرگىزۋشىلەرىنە جول تاقىرىبىنداعى 30-عا جۋىق جادىنامانى تاراتۋ ارقىلى «جۇرگىزۋشى, ءبىزدى قورعاڭدار!» ۇگىت-ناسيحات اكتسياسىن جۇرگىزدىك. وسكەلەڭ ۇرپاقتىڭ قاتەلىككە ۇرىنباۋى ءۇشىن جول ەرەجەسى بويىنشا ساۋاتتىلىقتى ارتتىرۋدا مۇنداي ءىس-شارالاردىڭ ماڭىزى زور», دەيدى استانا قالاسى بايقوڭىر اۋدانى پوليتسيا باسقارماسى جەرگىلىكتى پوليتسيا قىزمەتى ءبولىمى يۋۆەنالدىق پوليتسيا بولىمشەسىنىڭ ۋچاسكەلىك پوليتسيا ينسپەكتورى, پوليتسيا كاپيتانى حافيز مۇقىشەۆ.
اكتسيا اياسىندا ءبىلىم ورگاندارىمەن, مەكتەپتەگى قوزعالىستىڭ جاس ينسپەكتورلارى جاساقتارىمەن بىرلەسىپ, اۆتوكولىك قۇرالدارى جۇرگىزۋشىلەرىنە جادىنامالار, جول تاقىرىبىنا جازىلعان بالالار شىعارمالارى ۇلەستىرىلىپ, «جۇرگىزۋشى نازارىنا!» ناسيحات اكتسياسى ۇيىمداستىرىلادى.