سىرتقى ىستەر ءمينيسترى ەرلان ىدىرىسوۆ لاتۆيالىق ساياساتكەر, ەۋروپا پارلامەنتىنىڭ دەپۋتاتى, ورتالىق ازيا جانە موڭعوليا ەلدەرىمەن ىنتىماقتاستىق بويىنشا دەلەگاتسيا ءتورايىمى يۆەتا گريگۋلەمەن كەزدەستى.
كەزدەسۋ بارىسىندا تاراپتار قازاقستان جانە ەو اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى جاڭا كەلىسىمشارتتى پارافيرلەۋ اياسىندا قازاقستاننىڭ ەۋروپا وداعىمەن جانە, اتاپ ايتقاندا, لاتۆيامەن قاتىناستارىنىڭ قازىرگى احۋالى مەن بولاشاعىن تالقىلادى. اتالعان كەلىسىم بويىنشا كەلىسسوزدەر ءۇش جىلعا سوزىلىپ, 2014 جىلى 9 قازاندا قازاقستان پرەزيدەنتى نۇرسۇلتان نازارباەۆتىڭ بريۋسسەلگە ساپارى بارىسىندا اياقتالدى, ال بيىلعى 20 قاڭتاردا بريۋسسەلدە تاراپتار جاڭا كەلىسىمشارت ءماتىنىن پارافيرلەۋ ءراسىمىن وتكىزدى.
مينيستر قازاقستان مەن ەو اراسىندا ءتۇرلى دەڭگەيلەردەگى, سونىڭ ىشىندە ەكى ەل پارلامەنتاريلەرى اراسىنداعى ءساتتى ىنتىماقتاستىققا قاناعات ءبىلدىردى. قر-ەو پارلامەنتتىك ىنتىماقتاستىق كوميتەتىنىڭ وتىرىستارى ىقپالداستىقتىڭ قول جەتكەن جەتىستىكتەرى مەن ەرەكشە نازار تالاپ ەتەتىن ماسەلەلەرىن تالقىلاۋ ءۇشىن ماڭىزدى پىكىر الماسۋ الاڭىنا اينالعانىن اتاپ ءوتتى.
ە.ىدىرىسوۆ ي.گريگۋلە حانىمدى ورتالىق ازيا بويىنشا ەۋروپارلامەنت دەلەگاتسياسىنىڭ ءتورايىمى لاۋازىمىنا تاعايىندالۋىمەن قۇتتىقتاپ, ەو كەڭەسىندەگى لاتۆيا توراعالىعىنىڭ ورتالىق ازيا ءۇشىن ەو ستراتەگياسى وزەكتىلىگىن كوتەرۋ نيەتىنە قولداۋ ءبىلدىرىپ, قازاقستان مەن لاتۆيا اراسىنداعى ەكىجاقتى قاتىناستاردى ودان ءارى بەلسەندىلەندىرۋ ءۇمىتىن ءبىلدىردى.
تاراپتار, سونىمەن قاتار, ادام قۇقىقتارى, وڭىرلىك جانە عالامدىق قاۋىپسىزدىك ماسەلەلەرىن جانە الەمدەگى گەوساياسي جاعدايدى تالقىلادى. قازاقستان ۋكرايناداعى داعدارىستى بەيبىت جولمەن شەشۋگە, سونىڭ ىشىندە «نورماندىق پىشىمدەگى» سامميتتى وتكىزۋگە الاڭ ۇسىنۋ ارقىلى ىقپال جاساۋعا دايىندىعىن راستادى.
ەۋرووداق قازاقستاننىڭ باستى ساۋدا جانە ينۆەستيتسيالىق ارىپتەسى بولىپ تابىلادى. قازاقستاننىڭ تاۋار اينالىمىنىڭ جارتىسى جانە ەلىمىزگە تارتىلعان ينۆەستيتسيانىڭ جارتىسىنان كوبى ەۋروپا ەلدەرىنىڭ ۇلەسىندە. ەو-مەن سىرتقى ساۋدا كولەمى 2014 جىلدىڭ 11 ايى ىشىندە 50 ملرد. اقش دوللارىنا دەيىن جەتتى.
«ەگەمەن-اقپارات».