وتان الدىنداعى ەرەكشە ەڭبەگى, دەنە شىنىقتىرۋ مەن سپورتتى دامىتۋعا قوسقان زور ۇلەسى, جوعارى جەتىستىكتەرى جانە كاسىبيلىگى ءۇشىن عۇسمان قىرعىزباەۆ پەن ونىڭ ەگىزى ورتالىق سپورت كلۋبى دزيۋدو كومانداسىنىڭ اعا جاتتىقتىرۋشىسى – ءبولىم باستىعى عۇمار قىرعىزباەۆقا قورعانىس ءمينيسترىنىڭ بۇيرىعىمەن مەرزىمىنەن بۇرىن «كاپيتان» اسكەري اتاعى بەرىلدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
قارۋلى كۇشتەردىڭ قىزمەتشىلەرى سپورتشى-نۇسقاۋشىلار ناريمان قۇربانوۆ پەن دەمەۋ جادىراەۆ, سونداي-اق قاتارداعى جاۋىنگەر يسلام ساتباەۆ ۆەدومستۆولىق «ەل قورعانى» مەدالىمەن ماراپاتتالدى. «قارۋلى كۇشتەردىڭ ۇزدىگى» مەدالىمەن وليمپيادا ويىندارىنا قاتىسۋشى وسك سپورت روتاسىنىڭ جاۋىنگەرى بوكسشى مۇحاممەدسابىر بازارباي ۇلى ناگرادتالدى. سپورتشىلاردىڭ جاتتىقتىرۋشىلارىنىڭ دا ەڭبەگى ەلەندى. ال قالعان قاتىسۋشىلار اقشالاي سىياقى يەلەندى.
وليمپياداعا قورعانىس مينيسترلىگى ورتالىق سپورت كلۋبىنىڭ 21 سپورتشىسى بوكس, دزيۋدو, اتۋ, بادمينتون, ەسكەك ەسۋ, سپورتتىق گيمناستيكا, كۇرەس, سپورتتىق الپينيزم, تاەكۆوندو, زاماناۋي بەسسايىس جانە جەڭىل اتلەتيكا سەكىلدى 11 سپورت تۇرىنەن قاتىستى.
سپورتشىلاردى قۇتتىقتاعان قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ ارميا سپورتشىلارى قارۋلى كۇشتەردەگى سپورتتىڭ دامۋىنا ۇلكەن ۇلەس قوسىپ جاتقانىن اتاپ ءوتتى.
– جاقىن ارادا جاستار ءۇشىن اسكەري-سپورت كوللەدجىن اشۋدى جوسپارلاپ وتىرمىز. ءبىز ول ءۇشىن بارلىق قاجەتتى جاعدايلاردى جاسايمىز جانە جاس سپورتشىلارعا بارىنشا قولداۋ كورسەتەمىز. بۇل ارميا سپورتى مەن ورتالىق سپورت كلۋبىنىڭ دامۋىنا جاڭا سەرپىن بەرەدى, – دەدى قورعانىس ءمينيسترى.
ەستەرىڭىزگە سالا كەتەيىك, فرانتسيا استاناسىندا ارميا سپورتشىلارى ءتورت وليمپيادا مەدالىن جەڭىپ العان بولاتىن. ولاردىڭ قاتارىندا كۇمىس مەدال يەگەرلەرى گيمناست ناريمان قۇربانوۆ پەن گرەك-ريم كۇرەسىنىڭ بالۋانى دەمەۋ جادىراەۆ, سونداي-اق قولا مەدال يەلەنگەن دزيۋدوشى اعا لەيتەنانت عۇسمان قىرعىزباەۆ پەن سۇرمەرگەن قاتارداعى جاۋىنگەر يسلام ساتباەۆ بار.
تاۋەلسىزدىك جىلدارىندا قارۋلى كۇشتەردىڭ سپورتشىلارى 39 رەت وليمپيادا ويىندارىندا جەڭىمپاز جانە جۇلدەگەر اتاندى. الەمدىك دودالاردا ولار 637 التىن, 420 كۇمىس جانە 489 قولا مەدال جەڭىپ الدى.