پارلامەنت سەناتىنىڭ دەپۋتاتى الىبەك ناۋتيەۆ اتىراۋ وبلىسىنىڭ يساتاي, قۇرمانعازى اۋداندارىندا بولىپ, اۋداندىق ءماسليحات دەپۋتاتتارىمەن جانە قوعامدىق كەڭەس مۇشەلەرىمەن كەزدەستى.
كەزدەسۋدە ازاماتتاردى الاڭداتقان وزەكتى ماسەلەلەر, سونىڭ ىشىندە كاسىپكەرلەر ءۇشىن بەلگىلەنگەن سالىق مولشەرى, جايىلىمدىق جەرلەر, نىساندار قۇرىلىسىنداعى كىدىرىستەر جانە جولدىڭ ساپاسىنا قاتىستى پروبلەمالار تالقىلاندى. سەناتور كوتەرىلگەن ماسەلەلەردى جەدەل شەشۋ قاجەت ەكەنىن جانە بۇل تۇيتكىلدەر دەپۋتاتتىق قىزمەتتە نازاردان تىس قالمايتىنىن اتاپ ءوتتى.
سونىمەن قاتار دەپۋتات سەناتتىڭ زاڭ شىعارۋ قىزمەتى تۋرالى ايتىپ, قوعامنىڭ دامۋىنا ەلەۋلى ىقپال ەتەتىن جانە الەۋمەتتىك-ەكونوميكالىق سالاعا وڭ وزگەرىس اكەلەتىن نەگىزگى زاڭدارعا توقتالدى.
الىبەك ناۋتيەۆ يساتاي اۋدانىنىڭ تومان اۋىلىنداعى ەلەكترمەن جابدىقتاۋ جەلىسىنىڭ, مەديتسينالىق پۋنكتتىڭ قىزمەتىمەن دە تانىستى. سونداي-اق قۇرمانعازى ەلدى مەكەنىندەگى وڭالتۋ ورتالىعىنىڭ, «اتىراۋ – استراحان» تاس جولى قۇرىلىسىنىڭ جاي-كۇيىنە نازار اۋداردى.