«Egemen Qazaqstan» گازەتى ءبىلىم سالاسىنداعى كوپ يگى ءىستىڭ ۇيىتقىسى بولىپ كەلەدى. باس باسىلىمنىڭ بەلسەندى اۆتورلارى مەن جازىلۋشىلارىنىڭ اراسىندا دا پەداگوگتەر قاتارى قالىڭ ەكەنى اتاپ وتۋگە تۇرارلىق. وسى رەتتە قوعامنىڭ قوزعاۋشى كۇشى سانالاتىن ۇستازدار قاۋىمىنا جانە وقىرماندارىمىزعا ءسۇيىنشى جاڭالىقتى جەتكىزبەكپىز.
وقۋ-اعارتۋ مينيسترلىگى پەداگوگيكا سالاسىنداعى سۇبەلى ماقالالاردى جاريالاۋعا ۇسىنىلاتىن باسىلىمدار تىزىمىنە «قازاق گازەتتەرى» سەرىكتەستىگىنە قاراستى گازەت-جۋرنالداردىڭ دا ەنگىزىلگەنىن حابارلادى. اتالعان ءتىزىم مينيسترلىككە قاراستى ى.التىنسارين اتىنداعى ۇلتتىق ءبىلىم اكادەمياسىنىڭ سايتىندا جاريالاندى.
بۇل – وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ 2024 جىلعى 20 مامىرداعى №20-1-20-7/3360-ي حاتىنا سايكەس بەكىتىلگەن باسىلىمدار تىزبەگى. مىنە, سول تىزىمگە «قازاق گازەتتەرىنىڭ» قۇرامىنا كىرەتىن «بالدىرعان», «اقجەلكەن» جۋرنالدارى مەن «انا ءتىلى» «ۇلان», «درۋجنىە رەبياتا» گازەتتەرى قوسىلدى. ەندى پەداگوگتەر ءوزىنىڭ بىلىكتىلىگىن ارتتىرۋعا سەپ بولار ۇزدىك جۇمىستارىن, تاجىريبەسىن, ماقالاسىن جوعارىدا اتالعان باسىلىمداردا دا جاريالاي الادى.
ۇلتتىڭ ماڭدايالدى عالىمدارى مەن اقىن-جازۋشىلارىن جاس كۇنىندە شىعارماشىلىققا باۋلىعان تاريحي گازەت-جۋرنالدارىمىز الداعى جىلدارى ءتىزىمنىڭ باسىنان ورىن الادى دەپ سەنەمىز. سونىمەن قاتار باس باسىلىم – «Egemen Qazaqstan» گازەتىنىڭ دە ءبىلىم سالاسىنداعى تۇيتكىلدى تاقىرىپتاردى ۇدايى كوتەرىپ, وڭ شەشىمىن تابۋعا اتسالىسىپ, جەتىستىكتەر مەن يگى ىستەردى, جاعىمدى جاڭالىقتاردى قالىڭ وقىرمانعا جەتكىزۋدە ماڭىزدى ورىن الاتىنى بەلگىلى.