سەرياسىنىڭ ءۇشىنشى توپتاماسى جارىق كوردى
تاياۋدا ا.س.پۋشكين اتىنداعى وبلىستىق كىتاپحانادا «شىعىس قازاقستان كىتاپتارى – 2014» شاراسى شەڭبەرىندە بىرقاتار ادەبي جوبالاردىڭ تۇساۋكەسەرى ءوتتى. ونىڭ ىشىندە «التاي-ەرتىس كىتاپحاناسى» سەرياسىنىڭ ءۇشىنشى توپتاماسى, «شىعىس قازاقستاننىڭ مۋزىكالىق مۇراسى», اۋعان سوعىسىندا قازا تاپقان ينتەرناتسيوناليست-جاۋىنگەرلەرگە ارنالعان «ازالى كىتاپ» جانە «شىعىس قازاقستان» ەنتسيكلوپەدياسى وقىرماندارعا تانىستىرىلدى.
ايتا كەتكەن ابزال, «التاي-ەرتىس كىتاپحاناسى» سەرياسىنىڭ العاشقى 20 تومى تاۋەلسىزدىكتىڭ 20 جىلدىعى قارساڭىندا وقىرمان قولىنا تيگەن بولاتىن. 2013 جىلى اتالعان سەريالى كىتاپتار قازاقتىڭ كونە جىراۋلارىنان باستاۋ الىپ, ەل ماقتانىشىنا اينالعان بەلگىلى اۆتورلاردىڭ شىعارمالارىن قامتىدى. ال ءۇشىنشى توپتاما ۇلى ابايدىڭ 170 جىلدىق مەرەيتويىنا لايىقتى سىي بولاتىن كىتاپتارىمەن ەرەكشەلەنىپ وتىر. ياعني بيىل مۇحتار اۋەزوۆتىڭ «اباي جولى» رومان-ەپوپەياسى, ابايدىڭ بارلىق ولەڭدەرى مەن پوەمالارىنا عىلىمي تۇسىنىكتەمە جازعان قايىم مۇحامەدحانوۆتىڭ ەڭبەگى جاريالاندى. ودان بولەك پروفەسسور اراپ ەسپەنبەتوۆتىڭ ابايتانۋ, شاكارىمتانۋ مەن سۇلتانماحمۇتتانۋ تۋرالى زەرتتەۋلەرى ەنگەن قوس تومدىعى, اباي مەكتەبىنەن ءتالىم العان دارىندى اقىن ءارىپ تاڭىربەرگەنوۆتىڭ شىعارمالارى جارىق كوردى. سونىمەن قاتار, ۇلى وتان سوعىسىنا قاتىسىپ, قالام مەن قارۋدى قاتار ۇستاعان جەرلەستەرىمىزدىڭ شىعارمالارى جارىق كوردى. ولاردىڭ قاتارىندا حالىق قاhارمانى قاسىم قايسەنوۆ, حالىق جازۋشىسى ءازىلحان نۇرشايىقوۆ پەن پارتيزان جازۋشى ءادي ءشارىپوۆتىڭ تۋىندىلارى بار. بۇل ءتىزىمدى جازۋشى ءمۇسىلىم قۇماربەكوۆتىڭ كەڭەس وداعىنىڭ باتىرى ىزعۇتتى ايتىقوۆتىڭ ءومىرى تۋرالى باياندايتىن «تاۋقىمەت» اتتى رومانى جالعاستىرادى. ەل باسىنا كۇن تۋعان سىن ساعاتتا شىڭدالعان حالىقتار دوستىعى كەشەگى اۋعان جەرىندە وتكەن ارپالىستا نىعايا ءتۇستى. وندا قازا تاپقان شىعىسقازاقستاندىق جاۋىنگەرلەردىڭ رۋحىنا ارنالعان «ازالى كىتاپ» تا جارىق كوردى.
دۋمان اناش,
«ەگەمەن قازاقستان».
وسكەمەن.