ۇكىمەت وتىرىسىندا ەنەرگەتيكا ءمينيسترى الماسادام ساتقاليەۆ ەل ەكونوميكاسىنىڭ تۇراقتى ءوسۋى ەلەكتر ەنەرگياسىنا سۇرانىستىڭ ارتۋىمەن قاتار جۇرەتىنىن اتاپ ءوتتى, دەپ حابارلايدى Egemen.kz.
سوندىقتان مينيستر ونەركاسىپ, مەتاللۋرگيا, كولىك, IT, فارماتسەۆتيكا, اۋىل شارۋاشىلىعى ونىمدەرىن قايتا وڭدەۋ جانە باسقا دا سەكتورلاردا جاڭا جوبالاردى ىسكە اسىرۋ ءۇشىن قازىردىڭ وزىندە ەلەكتر ەنەرگياسىنىڭ ەداۋىر كولەمى قاجەت ەكەنىن باياندادى.
«بۇل جوبالار جاڭا جۇمىس ورىندارىن قۇرۋعا, ەكونوميكالىق ءوسۋدى ىنتالاندىرۋعا جانە ازاماتتاردىڭ ءال-اۋقاتىن ارتتىرۋعا باعىتتالعان. الايدا ولاردىڭ دامۋى ەلدەگى ەنەرگيا قۋاتىنىڭ جەتىسپەۋشىلىگىمەن شەكتەلۋدە. ەگەر جاڭا تۇراقتى ەنەرگيا كوزدەرىن – جاڭارتىلاتىن, رەتتەۋشى جانە بازالىق قۋاتتاردى سالۋ بويىنشا شۇعىل شارالار قابىلدانباسا, جاعداي كۇردەلەنە ءتۇسۋى مۇمكىن», دەدى الماسادام ساتقاليەۆ.
ەنەرگەتيكا مينيسترلىگىنىڭ بولجامى بويىنشا 2035 جىلعا قاراي قازاقستاندا ەلەكتر ەنەرگياسىن تۇتىنۋ 152,4 ملرد كۆت/ساع دەيىن وسەدى. بۇل رەتتە بىرقاتار وبەكتيۆتى سەبەپ بويىنشا قولدانىستاعى ەنەرگيا كوزدەرىن ءوندىرۋ 135 ملرد كۆت/ساع-قا دەيىن تومەندەيدى. تاياۋداعى 10 جىلدا قازاقستانعا جيىنتىق قۋاتى 26,5 گۆت جاڭا ءوندىرۋشى قۋاتتاردى ەنگىزۋ قاجەت. ۇكىمەت وتىرىسىندا الەم قازىر كومىرتەگى بەيتاراپتىعىنا بەت بۇرىپ جاتقانى ايتىلدى.
«ەلىمىزدەگى گاز رەسۋرستارىنىڭ شەكتەۋلى بولۋىنا بايلانىستى گاز گەنەراتسياسىن اۋقىمدى ەنگىزۋدى جۇزەگە اسىرۋ مۇمكىن ەمەس. ءوز كەزەگىندە, جاڭارتىلاتىن ەنەرگيا كوزدەرى تابيعي-كليماتتىق جاعدايلارعا تاۋەلدىلىگىنە بايلانىستى ەلەكتر ەنەرگياسىن ءوندىرۋدىڭ سەنىمدى بازالىق كوزى بولا المايدى. الەمدىك تاجىريبەگە سۇيەنسەك, اتوم ەلەكتر ستانساسىن سالۋ – شىعاتىن قۋاتتاردى اۋىستىرۋ جانە قازاقستاننىڭ ەنەرگياعا تاۋەلدىلىگىن قامتاماسىز ەتۋ ءۇشىن جالعىز دۇرىس شەشىم. قازىرگى كەزەڭدە اتوم ەلەكتر ستانتسياسىنا بالاما جوق», دەدى الماسادام ساتقاليەۆ.