اقتوبە قالاسىندا №29 باعىتتاعى اۆتوبۋس پەن جۇك كولىگى سوقتىعىسىپ, زارداپ شەككەندەر اۋرۋحاناعا جەتكىزىلدى. پوليتسيا كولىك جۇرگىزۋشىلەرىنە جول ەرەجەسىن قاتاڭ ساقتاۋدى ەسكەرتتى, دەپ حابارلايدى Egemen.kz.
وبلىستىق پد ءباسپاسوز قىزمەتىنىڭ حابارلاۋىنشا, №29 باعىتتاعى اۆتوبۋس سوڭعى ايالدامادان قوزعالعان.
«اقتوبە-ورسك تاسجولىندا اۆتوبۋس پەن جۇك كولىگى اراسىندا جول-كولىك وقيعاسى بولىپ, جۇرگىزۋشى مەن جولاۋشىلار اۋرۋحاناعا جەتكىزىلدى. وبلىستىق پوليتسيا دەپارتامەنتى جول ەرەجەسىن قاتاڭ ساقتاۋدى ەسكەرتەدى», دەپ حابارلادى اقتوبە وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
وقيعا ورنىنا جەدەل جاردەم بارىپ, زارداپ شەككەندەرگە مەديتسينالىق كومەك كورسەتتى.
«اۆتوبۋستىڭ 32 جاستاعى جۇرگىزۋشىسى جابىق باس-مي جاراقاتىمەن اقتوبە وبلىستىق كوپسالالى اۋرۋراحاناعا جەتكىزىلدى. سونىمەن بىرگە, 55 جاستاعى جولاۋشىنىڭ وڭ جاق يىعى شىعىپ كەتكەن. ول دا اۋرۋحانادا جاتىر. 73 جاستاعى قاريا جابىق باس-مي جاراقاتىن الدى. وڭ جاق يىعىنىڭ بۋىندارى اۋىرىپ, دارىگەرلەرگە قارالدى. كەيىن ول دا وبلىستىق كوپسالالى اۋرۋحاعانا جەتكىزىلدى. ال, جۇك كولىگىنىڭ جۇرگىزۋشىسى دارىگەرگە قارالمادى», دەپ حابارلادى اقتوبە وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.