كۇرەس تۇرلەرىنەن يوردانيا استاناسى امماندا ءوتىپ جاتقان جاستار اراسىنداعى (U-17) الەم بىرىنشىلىگىندە قازاقستان قۇراماسى ءساتتى ونەر كورسەتىپ جاتىر. جارىستىڭ العاشقى كۇنى ورەندەرىمىز قوس كۇمىس مەدالعا قول جەتكىزدى.
جارىستى گرەك-ريم كۇرەسى شەبەرلەرى باستادى. العاشقى كۇنى ەكى بالۋانىمىزدىڭ قانجىعاسى مايلاندى. 55 كگ سالماقتاعى الپامىس بولات ۇلى قارسى كەلگەندەرىن قوعاداي جاپىرىپ, اقتىق سىنعا القىنباي جەتتى. الايدا باس جۇلدە ءۇشىن باسەكەدە قانداسىمىزدىڭ جولى بولمادى. اقش-تىڭ وكىلى دجەيدەن رەننيدەن نەبارى ەكى ۇپاي ايىرماشىلىعىمەن (5:7) جەڭىلگەن الپامىس كۇمىس مەدالدى قاناعات تۇتتى.
80 كگ سالماقتا سىنعا تۇسكەن ەركەبۇلان ءاناپيا دا ءدال سونداي ناتيجە كوسەتتى. باستاپقى باسەكەلەردە ۋكراينالىق ۆلاديسلاۆ سولودچۋك (11:0) پەن مولدوۆالىق نيكيتا اپوستولدى (8:0) ويسىراتا ۇتقان قازاق ورەنى جارتىلاي فينالدا ازەربايجاندىق ورحان گادجيەۆتىڭ جاۋرىنىن جەرگە تيگىزدى. بىراق شەشۋشى تۇستا ەركەبۇلاننىڭ بۇل جارىسقا بەيتاراپ سپورتشى رەتىندە قاتىسقان رەسەيلىك ميحايل شكارينگە (0:3) ءالى جەتپەدى.
ەدىگە تولەۋتاي (48 كگ) جارتىلاي فينالدا يراندىق ارمين شامسيپۋرحاجي جانە قولا مەدال ءۇشىن تارىستا ازەربايجاندىق امراح امانوۆتان ايلاسىن اسىرا المادى. كەلەسى كۇنى بەلدەسكەن ەراسىل مۇسان (48 كگ) ۇندىستاندىق ساينات پاردحيدەنگە جانە دامير ءابىلدا (45 كگ) قىرعىزستاندىق بەكجان بەيشەمباەۆقا جول بەردى. بۇل بالۋانداردىڭ بارلىعى دا بەسىنشى ورىندى قاناعات تۇتتى. ءسويتىپ, اتاقتى بالۋان المات كەبىسباەۆ جاتتىقتىراتىن قازاقستاننىڭ گرەك-ريم كۇرەسى وكىلدەرى اممانداعى جارىستى قوس كۇمىسپەن قورىتىندىلادى.
ودان كەيىن ايەلدەر كۇرەسىنەن باسەكەلەر باستالدى. بۇل جارىستا جاسمينا باقوەۆا (40 كگ), انەل بۇركىتباەۆا (43 كگ), مەدينا قۋانىشبەك (46 كگ), فاريدا ءابدىراحمانوۆا (49 كگ), مادحيا ۋسمانوۆا (53 كگ), اننا ستراتان (57 كگ), جايدار مۇقات (61 كگ), ۇلدانا تىلەۋحان (65 كگ), قىزجىبەك جارقىنباەۆا (69 كگ) جانە اقبوتا قادىر (73 كگ) سىندى سۇلۋلار ونەر كورسەتىپ جاتىر. قازىرگى كەزدە اننا مەن ۇلدانانىڭ جارتىلاي فينالدا سۇرىنگەنى بەلگىلى بولدى. ەندى ولار قولا مەدال ءۇشىن تالاسادى.
بۇرىمدىلار ءوز باسەكەلەرىن اياقتاعاننان كەيىن ەركىن كۇرەستەن وتەتىن جارىستى تاماشالايمىز. اتالعان دودادا ەل قۇراماسىنىڭ اعا جاتتىقتىرۋشىسى داۋلەت نيازبەكوۆ مىنا شاكىرتتەرىنە سەنىم ارتتى: 45 كگ – بەكزات امانگەلدى, 48 كگ – دامير قالي, 51 كگ – يبراحيم ىسقاقبەك, 55 كگ – ەرالى اسكەربەك, 60 كگ – بەكاسىل اسامبەك, 65 كگ – باقداۋلەت اكىمجان, 71 كگ – ءامىر ورازباەۆ, 80 كگ – بەيبارىس ەرعالي, 92 كگ – رايىم ماۋلەتوۆ جانە 110 كگ – ەدىگە قاسىمبەك.