20 شىلدەدە قاراعاندى قالاسىندا ورنالاسقان «YDD Corporation» جشس فەرروقورىتپا زاۋىتىندا جازاتايىم وقيعا بولعان ەدى. توتەنشە جاعدايدى تەكسەرۋ ءۇشىن ارنايى كوميسسيا قۇرىلعان. ولار وقيعانىڭ ءمان-جايىن زەرتتەي كەلە, تەكسەرۋ ناتيجەسى باستى كىنا جۇمىس بەرۋشىدە ەكەنىن انىقتاعان, دەپ حابارلايدى Egemen.kz.
«كوميسسيا مۇشەلەرى تەحنيكالىق قۇجاتتامانى, وقيعا بولعان جەردى تەكسەرۋ ناتيجەلەرىن, كۋاگەرلەردىڭ ساۋالنامالارىن, ساراپتاما ۇيىمىنىڭ قورىتىندىسىن, نورماتيۆتىك قۇجاتتار مەن باسقا دا ماتەريالداردى زەردەلەگەننەن كەيىن وسىنداي قورىتىندىعا كەلدى. كاسىپورىندا تراۆماتيكالىق فاكتورلاردىڭ اسەرىن بولدىرماۋ ءۇشىن شۇعىل شارالار ءتيىستى دارەجەدە قابىلدانباعانى, قاۋىپسىز ەڭبەك جاعدايلارى مەن قىزمەتكەرلەردىڭ ەرەجەلەردى, نۇسقاۋلىقتاردى جانە تەحنولوگيالىق ءتارتىپتى ساقتاۋىن باقىلاۋ ەلەمەنتتەرى ءتيىستى دارەجەدە جاسالماعانى انىقتالدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاماسىندا.
كوميسسيا مۇشەلەرى زارداپ شەككەندەرمەن جانە ولاردىڭ وتباسى مۇشەلەرىمەن كەزدەسىپ, ولارعا قولدانىستاعى زاڭناماعا سايكەس ولاردىڭ الەۋمەتتىك قورعاۋعا زاڭدى قۇقىقتارى تۇسىندىرىلگەن.
«ارنايى كوميسسيانىڭ تەرگەۋ ناتيجەلەرى جانە جينالعان بارلىق ماتەريالدار بولعان جازاتايىم وقيعاعا كىنالى دەپ تانىلعان ادامداردى جاۋاپقا تارتۋ ءۇشىن قۇقىق قورعاۋ ورگاندارىنا بەرىلەتىنى حابارلاندى. جۇمىس بەرۋشىنىڭ اقپاراتىنا سايكەس, جۇمىس بەرۋشىنىڭ مىندەتتەمەلەرىنە قاتىستى ماتەريالدىق سيپاتتاعى بارلىق ماسەلەلەر, سونداي-اق قازا تاپقاندار مەن زارداپ شەككەندەردىڭ جاقىن تۋىستارىنا وزگە دە كومەك كورسەتۋ رەتتەلگەن. سونىمەن قاتار جۇمىس بەرۋشى زارداپ شەككەندەردىڭ جاقىن تۋىستارىنا وتەۋسىز ماتەريالدىق كومەك كورسەتتى», دەپ ناقتىلادى مينيسترلىك.
ەسكە سالا كەتەيىك, 2024 جىلدىڭ 20 شىلدەسىندە قاراعاندى قالاسىندا «YDD Corporation» فەرروقورىتپا زاۋىتىندا جازاتايىم وقيعا بولىپ, ناتيجەسىندە سەگىز جۇمىسشى زارداپ شەكتى. ولاردىڭ تورتەۋى اۋرۋحانادا قازا تاپتى.