ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن كۇزگى دالا جۇمىستارى ماسەلەلەرى جونىندەگى جەدەل شتابتىڭ ءبىرىنشى وتىرىسى ءوتتى. شتاب ۇزدىكسىز ەگىن جيناۋ ناۋقانىنا كەدەرگى كەلتىرەتىن تاكتيكالىق ماسەلەلەردى دەرەۋ شەشۋ ماقساتىندا قۇرىلعان, دەپ حابارلايدى Egemen.kz.
ايتا كەتەيىك, جاقىن ارادا اۋىل شارۋاشىلىعى مينيسترلىگى مەن «ازىق-ت ۇلىك كورپوراتسياسى» اق وكىلدەرى جەرگىلىكتى جەرلەردە ەگىن جيناۋ جۇمىستارىن جەدەل باسقارۋ ءۇشىن وڭىرلەرگە بارادى.
«20 تامىزداعى جەدەل دەرەكتەرگە سايكەس, ەلىمىزدە 2,2 ملن توننا استىق باستىرىلىپ, 1,1 ملن تونناسى جينالدى. ونداعى داقىلداردىڭ 76%-ى جاقسى, 22%-ى قاناعاتتانارلىق دەپ باعالانىپ وتىر. ەگىن جيناۋ قارقىنى بىلتىرعى جىلمەن سايكەس دەۋگە بولادى, بىراق تولاسسىز جاۋعان جاڭبىر جاپپاي جۇمىس ىستەۋگە جانە ءداندى داقىلداردىڭ تولىق پىسۋىنە كەدەرگى كەلتىرىپ جاتىر», دەپ حابارلادى مينيسترلىكتىڭ ءباسپاسوز قىزمەتى.
اۋىل شارۋاشىلىعى ۆيتسە-ءمينيسترى ازات سۇلتانوۆتىڭ ايتۋىنشا, بۇگىندە نەگىزگى استىق ەگەتىن وڭىرلەردە تاۋلىگىنە جالپى قۋاتى 820,6 مىڭ توننا بولاتىن 1301 استىق كەپتىرۋ اگرەگاتى بار. وسى كەپتىرۋ اگرەگاتتارىنىڭ جۇمىسى ءۇشىن 61 مىڭ توننا ارزانداتىلعان ديزەل وتىنىنا وتىنىمدەر كەلىپ تۇسكەن. بىراق كەيبىر وبلىستاردا كەپتىرگىشتەر سۇيىتىلعان گازبەن جۇمىس ىستەيدى, سوندىقتان بۇل قوندىرعىلارعا ارزانداتىلعان گاز قاجەت ەكەنى اتاپ ءوتىلدى.
بۇل رەتتە پرەمەر-ءمينيستردىڭ ورىنباسارى س. جۇمانعارين اشم مەن ەم-گە كەپتىرۋ اگرەگاتتارى ءۇشىن قاجەتتى سۇيىتىلعان گاز كولەمىن ەسەپتەپ, فەرمەرلەردى ارزانداتىلعان وتىنعا كەزەكتە تۇرعاندار تىزىمىنە قوسۋدى تاپسىردى. سونداي-اق اكىمدىكتەرگە فەرمەرلەردىڭ ءموبيلدى كەپتىرۋ اگرەگاتتارىنا دەگەن قاجەتتىلىگىن ەسەپتەۋ, ال قارجى ينستيتۋتتارىنا اتالعان قۇرىلعىلاردى ساتىپ الۋدى سۋبسيديالاۋ مۇمكىندىگىن پىسىقتاۋ تاپسىرىلدى.