پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ تاپسىرىسى بويىنشا 2024 جىلعى 7-18 تامىز ارالىعىندا تەلەفون ارقىلى ساۋالناما جۇرگىزىلدى, دەپ حابارلايدى Egemen.kz.
ينستيتۋتتىڭ مالىمەتىنشە, ىرىكتەمەلى جيىنتىق كولەمى 1200 رەسپوندەنتتى قۇرادى. ساۋالناماعا 17 وبلىستان جانە رەسپۋبليكالىق ماڭىزى بار استانا, الماتى, شىمكەنت قالالارىنان 18 جاستان اسقان رەسپوندەنتتەر قاتىستى.
«جالپى, ساۋالناماعا قاتىسقانداردىڭ كوپشىلىگى (53,1%) اەس سالۋ يدەياسىن قولدايدى. اەس سالۋ يدەياسىن قولدايتىندار وعان ۇلكەن ءۇمىت ارتادى, سونىڭ ىشىندە 2030 جىلعا قاراي ەلەكتر تاپشىلىعى ماسەلەسى شەشىلەدى دەپ سەنەدى», دەلىنگەن حابارلامادا.
اەس سالۋ يدەياسىنا قارسى ادامدار (32,5%) نەگىزىنەن ىقتيمال اپاتتار مەن ولاردىڭ قورشاعان ورتاعا تيگىزەتىن زارداپتارىنا الاڭداۋشىلىق ءبىلدىردى.
سونىمەن قاتار ءاربىر ونىنشى رەسپوندەنت (14,4%) ءوز تاڭداۋىن ءالى جاساعان جوق.
سونداي-اق رەسپوندەنتتەردىڭ جارتىسى (51,0%) اەس قۇرىلىسىنا قاتىستى رەفەرەندۋمدا «قولداۋ» نەمەسە «قارسى» دەپ داۋىس بەرۋ ءۇشىن اقپاراتقا تولىق قول جەتكىزگەن. رەسپوندەنتتەردىڭ تاعى 12,2%-ى اقپاراتتى تولىق بىلمەيدى. ساۋالناماعا قاتىسقانداردىڭ 31,6%-ى مۇلدەم ەشقانداي اقپارات الماعان, ال 5,2%-ى جاۋاپ بەرۋگە قينالدى.
ساۋالناما بارىسىندا رەسپوندەنتتەردىڭ 42,6%-ى اەس سالۋ ماسەلەسى بويىنشا رەفەرەندۋمعا قاتىسۋعا تولىققاندى نيەت ءبىلدىردى. ال 16,4%-ى قاتىسۋى مۇمكىن ەكەنىن ايتتى. رەسپوندەنتتەردىڭ 25,3%-ى رەفەرەندۋمعا قاتىسپايدى, 8,9%-ى قاتىسپاۋى مۇمكىن, ال 6,8%-ى جاۋاپ بەرۋگە قينالدى.