پاۆلودار وبلىسىندا ەلىكتىڭ لاعىن ولتىرگەن ازاماتتارعا قاتىستى سوت ۇكىمى شىقتى, دەپ حابارلايدى Egemen.kz.
2024 جىلدىڭ اقپان ايىندا ك. جانە س. الدىن الا كەلىسىم بويىنشا جابايى جانۋارلاردى زاڭسىز اۋلاۋعا شىققان. ول ءۇشىن ولار اقتوعاي وڭىرىندەگى ەرتىس وزەنىنىڭ جايىلماسىن – جابايى اڭداردى اۋلاۋعا تىيىم سالىنعان ەرەكشە قورعالاتىن تابيعي اۋماقتى تاڭداعان. ولار وزدەرىمەن بىرگە تىركەلمەگەن تەگىس ۇڭعىلى اڭشى قارۋىن الىپ شىققانى بەلگىلى بولدى.
«سوتتالۋشىنىڭ ءبىرى ەلىكتەردى اتىپ ولتىرگەن. ولار 3 جاسار ەلىكتىڭ ولەكسەسىن الىپ كەتىپ قالماق بولعان ساتتە پوليتسيا قىزمەتكەرلەرى ۇستاعان», دەلىنگەن سوت حابارلاماسىندا.
سوتتالۋشىلار ەرەكشە قورعالاتىن تابيعي اۋماقتا اڭ اۋلاعانى ءۇشىن مەملەكەتكە 2,7 ملن تەڭگە زالال كەلتىرگەن.
ناتيجەسىندە سوت بۇرىن باس بوستاندىعىنان ايىرۋ جازاسىن وتەگەن ك.-نى 4 جىلعا, س.-نى 3 جىلعا باس بوستاندىعىنان ايىردى. سونداي-اق 7 جىلعا اڭ اۋلاۋعا تىيىم سالىندى.
ۇكىم زاڭدى كۇشىنە ەنگەن جوق.