بۇگىنگى كۇننىڭ باستى تاقىرىبى – جاساندى ينتەللەكت. ميچيگان مەملەكەتتىك ۋنيۆەرسيتەتىنىڭ پروفەسسورى حارتمان دۋگلاس «قاتتى اسىقپاڭىزدار» دەپ جاتىر. ياعني بۇل تەحنولوگيالاردى بىردەن ەمەس, بىرتىندەپ مەڭگەرگەن ءجون دەيدى. بىراق مەنىڭ ويىمشا اسىقپاسقا بولمايدى. ويتكەنى كوشتەن قالماۋىمىز كەرەك. جاساندى ينتەللەكت تۇرعاندا بۇرىنعى جۇيەمەن جۇرە بەرۋ – بۇل ۇشاق بار كەزدە جاياۋ جۇرگەن سياقتى عوي. سوندىقتان جاساندى زەردەنى شۇعىل تۇردە مەڭگەرىپ, ءبىلىم سالاسىنا ەنگىزۋ قاجەت.
قازىر ءتورتىنشى رەۆوليۋتسيا تاياپ قالدى. اۋەلدە تەمىرجول سىندى قوزعالتقىشتاردىڭ جاسالۋى ادامزات ءومىرىن كۇرت وزگەرتتى. كەيىن اۆتوماتتاندىرۋ ءدال سونداي جاڭالىق بولدى. ءۇشىنشى رەۆوليۋتسيا – ينتەرنەتتىڭ پايدا بولۋى. ال ءتورتىنشىسى وسى ماشينالىق وقىتۋ, جاساندى ينتەللەكتىنىڭ ومىرىمىزگە دەندەپ ەنۋى. اۋەلدە ادامدار ۇشاققا وتىرۋعا قورقاتىن. بىراق قازىر قالىپتى عوي. سول سەكىلدى ءبىز جاساندى زەردەنى جاتىرقاماۋىمىز كەرەك.
قازىرگى تاڭدا اقپاراتقا قولجەتىمدىلىك جاعىنان, زاماناۋي قۇرالدان ەشقانداي ماسەلە جوق. باستىسى, ءبىز سول قۇرىلعىلاردى, قولداعى بار مۇمكىندىكتى دۇرىس قولدانا ءبىلۋىمىز كەرەك. نەگىزى تسيفرلاندىرۋ بۇرىن دا ءوز قارقىنىمەن كەلە جاتقان ەدى. بىراق پاندەميا بۇل ۇدەرىستى ودان ءارى تەزدەتتى. جالپى, ءبىلىم سالاسى ءبىر ورىندا تۇرماۋى كەرەك. جاقىندا ەلىمىزدىڭ ءار وڭىرىندە تامىز كەڭەسى ءوتتى. سول كەزدە جاساندى ينتەللەكتىنىڭ يگىلىگىن كورەتىندەي بىرنەشە جوبا تانىستىرىلدى. بۇيىرسا, ەكى-ءۇش جىلدىڭ ىشىندە تاجىريبەگە ەنەدى دەپ ويلايمىن. ءبىزدىڭ كوللەدجدە بىلتىردان بەرى جاساندى ينتەللەكت تاقىرىبى ءجيى ايتىلىپ كەلە جاتىر. بيىلدان باستاپ قاناتقاقتى جوبالاردى جاساپ كورەمىز. ەگەردە جاقسى ناتيجە بەرسە, باسقا دا ءبىلىم وشاقتارىنا ۇسىنا باستايمىز.
اليشەر ءجۇنىسوۆ,
جامبىل يننوۆاتسيالىق جوعارى كوللەدجىنىڭ مۇعالىمى