ءونىم قاۋىپسىزدىگىن باقىلاۋ كۇشەيتىلەدى

تەحنيكالىق رەتتەۋ جانە مەترولوگيا كوميتەتىنىڭ ءتورايىمى جاننا ەسەنبەكوۆانىڭ ايتۋىنشا, ەلىمىزدە كو/ەاەو تەحرەگلامەنتتەرىمەن قامتىلماعان ونىمدەرگە قاتىستى 18 ۇلتتىق تەحنيكالىق رەگلامەنت جۇمىس ىستەيدى. وتكەن جىلى عيماراتتار مەن قۇرىلىس ماتەريالدارىنىڭ قاۋىپسىزدىگىن رەتتەيتىن ەكى قۇجات, سونداي-اق وسىمدىكتەردى قورعاۋ قۇرالدارى قابىلدانعان. سونىمەن قاتار سالالىق ۋاكىلەتتى ورگاندار الكوگول ونىمدەرى, جوعارى ۆولتتى جابدىقتار مەن كومىر بويىنشا ۇلتتىق تەحنيكالىق رەگلامەنتتەردى ازىرلەۋ اياقتالعانىن حابارلادى. سونداي-اق تۋريزم جانە سپورت مينيسترلىگى سپورتتىق جابدىقتار مەن تۇگەندەۋگە   قاتىستى جاڭا رەگلامەنت ازىرلەۋدى باستاعانى بەلگىلى بولدى.

كوميسسيا وتىرىسىندا پايدالانۋ مەرزىمى وتكەن ليفتىلەردى اۋىستىرۋ قاجەتتىگى دە ايتىلدى. ايتا كەتەيىك, 2025 جىلدىڭ 15 اقپانىنا دەيىن ەاەو-عا مۇشە مەملەكەتتەر ەگەر پاسپورتتا قىزمەت ەتۋ مەرزىمى تۋرالى اقپارات بولماسا, 25 جىلدان استام پايدالانىلاتىن ليفتىلەردى اۋىستىرۋى ءتيىس. بۇل تالاپتار 2013 جىلعى 15 اقپاندا كۇشىنە ەنگەن كو تر 011/2011 «ليفتىلەردىڭ قاۋىپسىزدىگى» تەحنيكالىق رەگلامەنتىندە بەكىتىلگەن.

ونەركاسىپ جانە قۇرىلىس مينيسترلىگىنىڭ اقپاراتى بويىنشا, بۇگىنگى تاڭدا جەرگىلىكتى اتقارۋشى ورگاندار ليفتىلەردى اۋىستىرۋ بويىنشا جۇمىستار جۇرگىزىپ جاتىر. بيىلعى جىلى 224 ءليفتىنى, ال كەلەسى جىلى 300-دەن استامىن اۋىستىرۋ جوسپارلانعان.

- «ليفت قاۋىپسىزدىگى» كو تەحنيكالىق رەگلامەنتىنىڭ نورمالارىن ۋاقتىلى قامتاماسىز ەتۋ ءۇشىن جەرگىلىكتى اتقارۋشى ورگاندار جانە تجم اۋماقتىق دەپارتامەنتتەرىمەن بىرلەسىپ تەحنيكالىق رەتتەۋ جونىندەگى وڭىرلىك شتابتار شەڭبەرىندە ىسكە اسىرىلاتىن ناقتىلانعان جوسپار-كەستەنى ازىرلەۋ تۋرالى شەشىم قابىلداندى. جوسپار ليفتىلەردى پايدالانۋ بويىنشا نورماتيۆتىك قىزمەت مەرزىمىنەن اساتىن مەرزىمدەر مەن تالاپتاردى ناقتى كورسەتۋى ءتيىس, - دەلىنگەن مينيسترلىك حابارلاماسىندا.

كوميسسيا سونداي-اق احۋالدىق شتاب جۇمىسى شەڭبەرىندە ازىق-ت ۇلىك جانە ونەركاسىپ تاۋارلارىنا مەملەكەتتىك باقىلاۋ قورىتىندىلارىن قاراعان.

- 2024 جىلدىڭ 7 ايىنىڭ قورىتىندىسى بويىنشا شەكارا ماڭىنداعى سەگىز وتكىزۋ پۋنكتىندە 14 776 اۆتوكولىك پەن 164 613 توننا ءسۇت جانە ءسۇت ونىمدەرى تەكسەرىلدى. كۇشەيتىلگەن باقىلاۋدىڭ ناتيجەسىندە 242 كولىك قۇرالى قايتارىلدى. ەاەو-نىڭ 27 وندىرۋشىسىنە قاتىستى «كۇشەيتىلگەن زەرتحانالىق باقىلاۋدىڭ» 29 رەجيمى ەنگىزىلدى. قازىرگى ۋاقىتتا 12 ءسۇت ونىمدەرىن شىعارۋشىلارعا قاتىستى باقىلاۋ كۇشەيتىلگەن. كولىك قۇرالدارىنا قاتىستى 1301 بىرلەسكەن تەكسەرۋ جۇرگىزىلدى, ونىڭ ىشىندە 74-ءى تالاپتارعا سايكەس كەلمەدى. اككرەديتتەلگەن زەرتحانالارعا جوسپاردان تىس تەكسەرىستەر جۇرگىزىلىپ, 12 ميلليون تەڭگە سوماسىنا ايىپپۇل سالىندى جانە 8 زەرتحانانىڭ اككرەديتتەۋ اتتەستاتتارى توقتاتىلدى. اككرەديتتەۋ جونىندەگى ورگان 11 زەرتحانانىڭ اككرەديتتەۋ اتتەستاتتارىن كەرى قايتارىپ الدى. ەۋرازيالىق ەكونوميكالىق وداقتىڭ سايكەستىكتى باعالاۋ جونىندەگى ورگانداردىڭ بىرىڭعاي تىزىلىمىنەن 3 زەرتحانا الىنىپ تاستالدى, - دەلىنگەن حابارلامادا.

ارمان شاققاليەۆ مەملەكەتتىك ورگاندار اراسىنداعى ءوزارا ءىس-قيمىلدى ودان ءارى ۇيلەستىرۋدىڭ جانە ءونىم قاۋىپسىزدىگىن باقىلاۋدى كۇشەيتۋدىڭ ماڭىزدىلىعىن اتاپ ءوتتى. بۇل شارالار قازاقستان رەسپۋبليكاسىنىڭ اۋماعىندا دا, جالپى ەاەو شەڭبەرىندە دە تاۋارلاردىڭ ساپاسى مەن قاۋىپسىزدىگىن ارتتىرۋعا باعىتتالعان.