اۋىل بالاسى ءۇشىن قالانىڭ تىرلىگى تىم قيال-عاجايىپ ەرتەگىدەي بولىپ كورىنەدى. تەك ۇلكەن قالالارداعى بالالارعا ارنالعان ويىن-ساۋىق ورتالىعى اۋىلدان اشىلسا, بۇل بالالار ءۇشىن ۇلكەن مەرەكە.
الماتىنىڭ ىرگەسىندەگى قاراساي اۋدانى, جاڭا-تۇرمىس اۋىلىندا 1-6 جاس ارالىعىنداعى بالالارعا «BUBBLE GUM» ويىن-ساۋىقتىرۋ ورتالىعى جۇمىسىن باستادى. كولەمى 3 مىڭ شارشى مەتر بولاتىن ءزاۋلىم عيماراتتىڭ ەكىنشى, ءۇشىنشى قاباتتارى بالالارعا ارنالعان.
بۇرىندارى اۋىلدا سيرەك بولاتىن كاسىپتىڭ كوزىن تاپقان - جاس كاسىپكەر ولجاس ماماداليەۆ. وتىز جاستى ءالى ەڭسەرە قويماعان جاس كاسىپكەردىڭ كاسىبىنە بەرەكە تىلەگەن اۋىلداستارى ءدان ريزا. ورتالىق ەندى اشىلسا دا بارلىق جاعداي جاسالعان. بالالاردىڭ جايلىلىعى مەن قاۋىپسىزدىگىنە مىقتى كوڭىل اۋدارىلعان. سەبەبى بارلىق ويىن قۇرىلعىلارى بالالاردىڭ دەنساۋلىعىنا زيان كەلتىرمەيتىن ماتەريالداردان جاسالىپ, ورنالاستىرىلعان. اتكەنشەك, سىرعاناق, حاۋىز دا بار, ءتىپتى ءبىر بۇرىنشتا بالالاردىڭ تۋعان كۇنىن وتكىزۋگە ارلاعان كىشكەنتاي بولمە دە بار. بۇل ورتالىق ءبىر مەزگىلدە 100 شاقتى بالانى قابىلداي الادى. اۋلەتتىڭ اناسى بولعان قالدىبەكوۆا بىزبەن اڭگىمەسىندە ۇلى ولجاستىڭ بۇل شەشىمىن قولداعانىن ايتىپ بەردى. سەبەبى اۋىل بالالارىنىڭ بارىندە بىردەي بالا باقشاعا بارۋعا مۇمكىندىك جوق. ال BUBBLE GUM ورتالىعىنىڭ قۇرىلتايشىسى ولجاس ماماداليەۆ ءوز سوزىندە بالالارعا سالىنعان ينۆەستيتسيا بولاشاققا سالىنعان دەپوزيتپەن بىردەي ەكەنىن ايتىپ, الداعى بىرەر جىلداعى جوسپارلارىن ءبولىستى. اماندىق بولسا, الداعى كۇندەرى بالالارعا اعىلشىن ءتىلىن ءتۇرلى ويىندار ارقىلى ۇيرەتەتىن ارنايى كۋرستار دا اشىلماق. ءتىپتى ورتالىق ءىشىن ءبىر اينالىپ وتەتىن كىشكەنتاي جۇردەك پويىزدار دا ورناتۋ ويدا بار.
اۋىلداستارى جاس كاسىپكەردىڭ بۇل شەشىمىنە ءدان ريزا. ەندى جاڭاتۇرمىستىق بالالارعا الماتىعا نەمەسە ۇلكەن قالالارعا بارماي-اق, وسى زامانعى ويىن تۇرلەرىمەن ءوز اۋىلىندا ويناۋعا مۇمكىندىك بار.