قازاقستان باس پروكۋراتۋراسىنىڭ جانە ىشكى ىستەر مينيسترلىگىنىڭ ينتەرپول قىزمەتكەرلەرى قازاقستاننىڭ پولشا رەسپۋبليكاسىنداعى ەلشىلىگىنىڭ كومەگىمەن الكوگولدىك ماساڭ كۇيدە جول قوزعالىسى ەرەجەلەرىن بۇزعانى ءۇشىن قىلمىستىق جاۋاپكەرشىلىككە تارتۋ ماقساتىندا پولشادان گرۋزيا ازاماتىن ەكستراديتسيالادى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
انىقتالعانداي, كۇدىكتى 2023 جىلى الماتى قالاسىندا الكوگولدىك ماساڭ كۇيدە كولىك جۇرگىزىپ كەلە جاتىپ, قارسى جولاققا شىعىپ كەتكەن. ناتيجەسىندە باسقا كولىكپەن سوقتىعىسىپ, جۇرگىزۋشىنىڭ دەنساۋلىعىنا اۋىر زيان كەلتىرگەن. قىلمىس جاساعاننان كەيىن كۇدىكتى جاسىرىنىپ, حالىقارالىق ىزدەۋگە جاريالانعان.
بيىلعى جىلدىڭ ءساۋىر ايىندا كۇدىكتى پولشادا ۇستالعان. قازاقستان باس پروكۋراتۋراسىنىڭ سۇراۋى بويىنشا كۇدىكتى قازاقستانعا ەكستراديتسيالانىپ, قازىر تەرگەۋ يزولياتورىنا قامالعان. جاساعان قىلمىسى ءۇشىن ول ءۇش جىلعا دەيىن باس بوستاندىعىنان ايىرىلۋى مۇمكىن.
ايتا كەتەيىك, پولشا رەسپۋبليكاسىمەن ەكستراديتسيالاۋ تۋرالى كەلىسىمنىڭ جوقتىعىنا قاراماستان, كۇدىكتىنى ەكستراديتسيالاۋ قازاقستاننىڭ باس پروكۋراتۋراسى مەن پولشا ادىلەت مينيسترلىگىنىڭ اراسىنداعى تىعىز ىنتىماقتاستىقتىڭ ارقاسىندا مۇمكىن بولعان.
ەسكە سالا كەتەيىك, بيىلعى جىلى پولشا تاراپىنان قازاقستان اۋماعىندا اسا ءىرى كولەمدە ەسىرتكى بيزنەسىمەن اينالىسقان ترانسۇلتتىق ۇيىمداسقان توپتىڭ ۇيىمداستىرۋشىسى قازاقستانعا ەكستراديتسيالاندى.