استانا. 23 قاڭتار. تەننيستەن اۆستراليا اشىق بىرىنشىلىگىندە سىنعا تۇسكەن زارينا دياس ءۇشىنشى اينالىمدا ماريا شاراپوۆاعا 2:0 (6:1, 6:1) ەسەبىمەن ەسە جىبەردى. بۇل تۋرالى egemen.kz حابارلادى.
العاش بولىپ دوپتى ويىنعا زارينا قوستى. تاجىريبەلى شاراپوۆا سالعان بەتتەن ءبىزدىڭ قىزدىڭ ادىمىن اشتىرماي, ءتورت گەيم قاتارىنان ۇپاي الدى. تەك, بەسىنشى گەيمدى عانا زارينا ءوز پايداسىنا شەشە ءبىلدى. ارتىنشا قاتارىنان ەكى مارتە ۇپاي العان رەسەيلىك تەننيسشى ءبىرىنشى سەتتە 6:1 ەسەبىمەن جەڭىسكە جەتتى.
ەكىنشى كەزەڭدى زارينا جەڭىسپەن باستادى. قارسىلاسىنىڭ دوبىن ءوز پايداسىنا شەشكەن قازاق قىزى ويىننىڭ قالعان بولىگىندە بۇل قارقىنىن جوعالتىپ الدى. ناتيجەسىندە ءبىرىنشى سەتتەگى جاعداي اينا-قاتەسىز قايتالانىپ, شاراپوۆا تاعى دا 6:1 ەسەبىمەن باسىم ءتۇستى.
بۇل - الەمنىڭ 2-راكەتكاسى, 27 جاستاعى ماريا شاراپوۆا مەن زارينا دياستىڭ كورتتا العاش كەزدەسۋلەرى. 21 جاستاعى ءبىزدىڭ قىز ازىرگە WTA رەيتينگىندە 31-ساتىدا تۇر.
زارينا وتكەن جىلى دا اۆستراليا اشىق بىرىنشىلىگىندە ءۇشىنشى اينالىمعا دەيىن جەتكەن بولاتىن. اتالمىش سىندا ونىڭ جولىنا رۋمىنيالىق تەننيسشى, بۇگىندە الەمنىڭ 3-راكەتكاسى سيمونا حالەپ توسقاۋىل بولدى.
بيىلعى ناتيجەسىنەن كەيىن زارينانىڭ الەمدىك رەيتينگتەگى ورنى وزگەرىپ, ءبىر-ەكى ساتى تومەن ءتۇسۋى مۇمكىن. دەسەك تە, وتاندىق تەننيسسۇيەر قاۋىمعا تاماشا كوڭىل-كۇي سىيلاعان قىزىمىزدىڭ ۋاقىت وتكەن سايىن شەبەرلىگى ارتىپ كەلەدى. سوندىقتان الدا بولاتىن جارىستاردا نامىستى قولدان بەرمەيدى دەپ سەنەمىز.
ءتورتىنشى اينالىمعا شىققان شاراپوۆا اتالمىش كەزەڭدە قىتايلىق پەن شۋايمەن شەبەرلىك بايقاسادى. ءتۋرنيردىڭ 21-راكەتكاسى سانالاتىن قىتاي قىزى دا ءۇشىنشى اينالىمدا تاعى ءبىر تەننيسشىمىز ياروسلاۆا شۆەدوۆانى جارىس جولىنان شىعاردى. ناقتى ايتار بولساق, پ.شۋاي قازاقستاندىقتان 2:0 (7:6 (9:7), 6:3) ەسەبىمەن باسىم ءتۇستى.
ەلامان قوڭىر.
دەرەك: egemen.kz.
سۋرەت: ausopen.com.