كەيىنگى جىلدارى ۇلتتىق كينونى قولداۋ مەملەكەتتىك ورتالىعىنىڭ قولداۋىمەن كوپتەگەن جاڭا فيلم ءتۇسىرىلىپ جاتىر. ارينە, ءتۇرلى تاقىرىپ, ساپا دا ءارتۇرلى. ونىڭ ىشىندە ۇلكەن ەكرانعا شىقپاي تۇرىپ حالىقارالىق دودالاردا باق سىناپ, ۇزدىك اتانعاندارى دا جەتەرلىك. ماسەلەن, وتكەن جىلى پيتچينگتە توپ جارعان جوبانىڭ ءبىرى – «شىرماۋىق». رەجيسسەرى ءارى ستسەناري اۆتورى ازامات شارعىننىڭ دەبيۋتتىك ءفيلمى بۇگىندە ءتۇسىرىلىم جۇمىستارىن جۇرگىزىپ جاتىر.
وسى ورايدا ءتۇسىرىلىم الاڭىنداعى احۋالدى بىلۋگە رەجيسسەرگە حابارلاسىپ, كينوكارتينا تۋرالى ءبىرشاما ماعۇلمات الدىق. كينووندىرىستەگى بۇرىننان قۇلاققا شالىنىپ جۇرگەن بىرقاتار ماسەلەنىڭ دە بارىن اڭداپ قالدىق. القيسسا.
الەۋمەتتىك دراما جانرىنداعى جاڭا فيلم جىل باسىندا مادەنيەت جانە اقپارات مينيسترلىگىنىڭ تاپسىرىسىمەن, ش.ايمانوۆ اتىنداعى «قازاقفيلم» كينوستۋدياسىنان وندىرىسكە جىبەرىلگەن. كوكتەمدە دايىندىق كەزەڭى وتكىزىلىپ, ءتۇسىرىلىم شىلدە ايىندا الماتى وبلىسىندا باستالىپ, جامبىل وبلىسى مىڭارال ەلدى مەكەنىندە جالعاستى. ول جاقتا جيىرما كۇننەن اسا جۇمىس ىستەپ, قازىر الماتى وبلىسىندا ءتۇسىرىلىپ جاتىر. رەجيسسەردىڭ ايتۋىنشا, ءتۇسىرىلىم جۇمىستارى تامىزدىڭ سوڭىنا دەيىن اياقتالادى.
جالپى, اتالعان فيلم – قاراپايىم وتباسىنىڭ ءومىرى نەگىزىندە, جىلدار بويى قاسيەتتى سانالىپ كەلگەن وتباسىلىق قۇندىلىقتىڭ جوعالۋىن, ادام بالاسىنىڭ رۋحاني ازۋىن سۋرەتتەيدى. اۆتورلىق-ينتەللەكتۋالدىق باعىتتاعى تۋىندىدا ادامزاتقا ورتاق قۇندىلىقتار ۇلتتىق مەنتاليتەت تۇرعىسىنان ساراپقا سالىنادى.
رەجيسسەر دەبيۋتتىك تۋىندىسىنىڭ ءتۇسىرىلىم توبىنا تاجىريبەلى مامانداردى شاقىرۋعا تىرىسقان. اتاپ ايتساق, ءفيلمنىڭ اتقارۋشى پروديۋسەرى – ء«بىرجان سال», «اتاجۇرت», «اكەم ەكەۋىمىز» جانە «NETFLIX» پلاتفورماسى تۇسىرگەن «ماركو پولو», «شامان» جوبالارىنىڭ پروديۋسەرى, بىلىكتى مامان ارداگەر سانتىباەۆ. قويۋشى وپەراتورى – «دالا قاسقىرى», «جامبىل – جاڭا ءداۋىر» فيلمدەرىن تۇسىرگەن, 2014 جىلى APSA, 2021 جىلى AFA «ەڭ ۇزدىك وپەراتورلىق جۇمىس» اتالىمىنىڭ نومينانتى, «وسكار» كينواكادەمياسىنىڭ مۇشەسى ەركىنبەك پىتىراليەۆ. كوركەمدىك جەتەكشىسى – «ورالمان», «بوران» فيلمدەرىنىڭ رەجيسسەرى, ءوز ءىسىنىڭ كاسىبي شەبەرى ءسابيت قۇرمانبەك.
ءفيلمنىڭ باستى رولدەرىندە الماحان كەنجەبەكوۆا, لاۋرا ءسابيتوۆا, نۇرلان ءابىلوۆ جانە رايانا قۋات وينايدى. رەجيسسەردىڭ ايتۋىنشا, كاستينگتە ماقساتتى تۇردە تانىمال ەمەس, كينوعا كوپ تۇسپەگەن, بىراق كاسىبي اكتەرلەردى الۋعا تىرىسقان.
«كينو – ۇجىمدىق جۇمىس ءارى باستان-اياق شىعارماشىلىق ۇدەرىستەن تۇراتىندىقتان, دايىندىق, ءتۇسىرىلىم كەزەڭدەرىندە قيىنشىلىق تۋىنداماي تۇرمايدى. ماسەلە كوبىنە قارجىنىڭ ۋاقىتىندا تۇسپەۋى, شىعارماشىلىق- قارجىلىق ەسەپتەردىڭ ۇزاق قابىلدانۋىنان شىعىپ جاتادى. بۇل ءبىزدى دە اينالىپ وتكەن جوق. العاشقى ەكى كەزەڭنىڭ ەسەبى تاپسىرىلعانىمەن قارجىنىڭ ەكىنشى بولىگى بەلگىسىز سەبەپپەن كەشىگىپ جاتىر. قارجىعا جاۋاپتىلار زاڭ جۇزىندە ءاربىر ىسىمىزگە قۇجاتتاي ەسەپ تالاپ ەتكەنىمەن, وزدەرىنە كەلگەندە اۋىزشا جاۋاپپەن قۇتىلادى. جاۋاپتى زاڭدى تۇردە قاعاز جۇزىندە تالاپ ەتسەڭ, ءارتۇرلى سىلتاۋ ايتىپ, سوڭىن قۇمعا سىڭگەن سۋداي قىلادى. ارينە, بۇل كينونىڭ ساپاسىنا اسەر ەتپەي قويمايدى. سەبەبى ءتۇسىرىلىم توبىنداعى مامانداردىڭ دا وتباسى, جەكە قارجىلاي ماسەلەلەرى بار», دەيدى رەجيسسەر ازامات شارعىن.
ءيا, قازاق كينووندىرىسىندەگى ەسەپ-قيساپ جونىندە بۇعان دەيىنگى فيلم اۆتورلارىنان دا ەستىپ قالىپ ەدىك. اتالعان ماسەلە ءالى دە وزەكتى ەكەنىنە كەزەكتى رەت كوز جەتكىزدىك.
كينووندىرىس سالاسى الەمدە عالامات تابىس كوزىنە اينالعالى قاشان؟ دەسەك تە كينونىڭ جالعىز اقيقات انىقتاماسى, ول – ونەر. جالعىز شارتى – كوركەمدىك. بىراق كينونى دا اركىم ءارتۇرلى ماقساتتا تۇسىرەتىنى تاعى بار. ماسەلەن, ماتەريالدىق ماقساتتاعى فيلمدەردىڭ تابيعاتى دا سوعان ساي بولادى. ال رۋحاني تۇرعىدا تۇسىرىلگەن تۋىندىلاردىڭ دىتتەگەنى بولەك.
«كينونى كاسىپ كورىپ, ونى تاۋار قىلىپ, نارىقتى زەردەلەپ, قانداي ءونىم جاقسى وتەتىنىن زەرتتەپ, كينو تۇسىرەتىن تەحنيكانى جىل سايىن دامىتۋعا ارنايى قارجى ءبولىپ, سول ىسپەن كاسىبي اينالىساتىن الەمدە ءتۇرلى الپاۋىت كومپانيالار بار. مىسال رەتىندە ءبىر عانا گولليۆۋدتى ايتساق جەتكىلىكتى. لوس-انجەلەستىڭ ول اۋدانىندا ونداعان ءىرى كينوكومپانيا بار. ولار ءۇشىن كينو – تاۋار. جاقسى ساتىلۋ ءۇشىن, تاۋارىنا اتى الەمدىك برەندكە اينالعان ايگىلى جۇلدىزداردى جاپسىرادى. وعان قوسا, تاۋاردى الدىن الا جارنامالاۋدى, ساتۋدى شەبەر مەڭگەرگەن», دەيدى رەجيسسەر.
سونداي-اق ول رۋحاني ماقساتتا تۇسىرىلەتىن كينوعا, ەڭ الدىمەن ونەر دەپ قاراۋ كەرەك ەكەنىن اتاپ ءوتتى.
«بۇل ماقساتتاعىلار ءوز شىعارماسىمەن ادام بولمىسىنا اسەر ەتكىسى كەلەدى. ويلاندىرعىسى كەلەدى. الدەبىر سۇراققا جاۋاپ ىزدەيدى. ادامدى تەرەڭ ويلانۋعا, پىكىرلەسۋگە شاقىرادى. ادام بالاسىنىڭ قوعاممەن, وتباسىمەن, قۇدايمەن بايلانىسىن ءسوز ەتەدى. فيلوسوفيالىق استارعا باسا نازار اۋدارادى. تابىس, كاسسا جيناۋ, ەكى-ءۇش ەسە پايدا تابۋدى كوزدەمەيدى. تەك تۋىندىداعى وي كوپشىلىككە جەتسە دەيدى, ياعني ادەبيەت سياقتى رۋحانياتقا قىزمەت ەتەدى», دەدى ول.
ءيا, مەملەكەت كينوعا قارجى بولگەنىمەن, ونىڭ جارناماسى مەن پروكاتى «كينو تۋرالى» زاڭدا ناقتىلانباعان.
«مىسالى, فيلم دايىن بولعان سوڭ, ونىڭ تولىق قۇقى تاپسىرىس بەرۋشىگە تيەسىلى, بىراق جارناما مەن پروكاتقا قارجى قاراستىرىلماعاندىقتان ولار ونىمەن اينالىسپايدى. ال تاپسىرىس الىپ, تۇسىرگەن زاڭدى تۇلعا فيلم قۇقى وزىنە تيەسىلى بولماعاندىقتان, ەش جەرگە رۇقساتسىز اپارىپ كورسەتىپ, جارناما جاساپ, ساتا المايدى. وسىنداي قاراما-قايشىلىقتاردى تەزدەتىپ تۇزەۋ كەرەك. سالا دامۋ ءۇشىن «كينو تۋرالى» زاڭعا وزگەرىس كەرەك. ءماجىلىستىڭ الەۋمەتتىك-مادەني كورپۋسى مەن كينوگەرلەر وداعى بىرىگە جۇمىس توبىن قۇرىپ, زاڭدى كەمەلىنە كەلتىرمەسە, ماسەلە جىلدان-جىلعا كۇردەلەنە بەرەدى», دەيدى ا.شارعىن.
ءفيلمنىڭ پروديۋسەرى ارداگەر سانتىباەۆتىڭ ايتۋىنشا, كينوكارتينانىڭ جالپى بيۋدجەتى – 240 000 000 تەڭگە. بۇعان 12% ققس سالىعى مەن «قازاقفيلمنىڭ» 15% جالپى ستۋديالىق شىعىندارى كىرەدى, ياعني ۇشتەن ءبىر بولىگى بيۋدجەتتەن الىنادى.
ء«فيلمنىڭ پروكاتىنا دەيىن «ا» كلاسس پەن باسقا دارەجەدەگى حالىقارالىق كينوفەستيۆالدارعا قاتىساتىنىمىزعا سەنىمدىمىز. كينونىڭ ستسەناريلىك جانە ۆيزۋالدى الەۋەتى مول. وسىنداي تاقىرىپتاعى تۋىندىلاردى ەۋروپالىق كاسىبي كينوماماندار جوعارى باعالايدى. ءفيلمنىڭ پروكاتىن فەستيۆالداردان كەيىن جوسپارلايمىز. وسى ورايدا ءتۇسىرىلىم جۇمىستارىنا اتسالىسىپ, قولداۋ كورسەتكەن جامبىل وبلىسى مويىنقۇم اۋدانىنداعى مىڭارال تۇرعىندارىنا جانە اكىمى تىلەش امانجولوۆقا ەرەكشە العىس ايتامىز», دەيدى پروديۋسەر.
بايقاعانىمىزداي, ءتۇسىرىلىم توبىنىڭ سونداي ءبىر ونەرگە دەگەن جاناشىرلىعىمەن جاسالىپ جاتقان كوركەم تۋىندىنى كورۋگە اسىقپىز.