قوعامدا ساياق ءومىر سۇرەتىن, «ەرەكشە» توپتىڭ قاتارىندا سانالاتىن ەرەكشە ارماندارى بار جاندار عاجايىپقا كوبىرەك سەنەدى. الايدا اق پەن قاراسى قاتار ورىلگەن ومىردە عاجايىپ كوپ بولماسا دا, كوركەم شىعارمالاردا كەزدەسىپ جاتادى. ماسەلەن, دەنيەل كيزدىڭ «الجەرنونعا ارنالعان گۇل» (Flowers for Algernon) شىعارماسىنداعى چارلي دە ءبىر عاجايىپقا سەندى, ارمانىنا قول سوزدى. ءومىرى كۇرت وزگەرىپ, «ەرەكشەلىگىنەن» ايىعاتىن سول ءبىر ءساتتى اڭسادى. قاراپايىم ادامداردىڭ قاتارىنا اسىقتى. جۋىردا «مازمۇنداما» باسپاسىنان وسى ەرەكشە جاننىڭ تاعدىرى سۋرەتتەلگەن كىتاپ قازاق تىلىندە جارىق كوردى.
«الجەرنونعا ارنالعان گۇل» – الەمگە اقىل-ەسى كەم جىگىتتىڭ كوزىمەن قاراپ, ونىڭ جان سارايىنا ۇڭىلتەتىن تەبىرەنىسكە تولى شىعارما. رومان كۇندەلىك تۇرىندە جازىلعان. شىعارماداعى باستى كەيىپكەرلەردىڭ ءپروتوتيپى اۆتوردىڭ ومىرىنەن الىنعان. چارلي گوردون دەگەن 32 جاستاعى جىگىت اقىلدى بولۋدى ارماندايدى. جانىنا جالاۋ بولار دوس ىزدەپ, جاقسىلىقتان ءۇمىت ۇزبەيدى. كۇندەردىڭ كۇنى ادامنىڭ اقىل-ويىن وپەراتسيانىڭ كومەگىمەن دامىتۋدى كوزدەگەن بىلىكتى دارىگەر-عالىمدارعا تاپ بولىپ, وزىنە تاجىريبە جاساۋىنا كونەدى. باستاپقىدا ورفوگرافيالىق, پۋنكتۋاتسيالىق قاتەدەن اياق الىپ جۇرە المايتىن ونىڭ جازبالارى بىرتە-بىرتە ساۋاتتى بولىپ, مازمۇنى دا تەرەڭدەي تۇسەدى. ايتسە دە «اقىلدى بولسام, دوسىم دا كوپ بولادى, ءومىرىم گۇلدەنەدى» دەپ كۇتكەن چارليدە ءبارى كەرىسىنشە بولادى... ءبىر دەممەن وقىلاتىن شىعارما جانارىڭا ءمولدىر مونشاقتار ءتىزىپ, جانىڭدى مۇڭعا بولەيدى.
ءيا, بۇل كىتاپتىڭ قازاقشاعا اۋدارىلىپ شىعۋى دا وڭايعا سوقپاعان. باستى كەيىپكەرى ءچارليدىڭ تاعدىرى سەكىلدى بۇل شىعارمانىڭ دا جولى اۋىر بولىپتى. باسپا وكىلدەرى ءۇش جىل دەگەندە اۆتور قۇقىعىن ارەڭ العان. اۋدارما جۇمىستارى دا ءبىراز ۋاقىتتى الىپتى. سونىمەن اتالعان باسپانىڭ بەس جىل بويعى ەڭبەگىنىڭ ارقاسىندا دەنيەل كيزدىڭ «الجەرنونعا ارنالعان گ ۇلى» قازاق وقىرماندارىنا جول تارتىپ وتىر. اۋدارعان – اقىن داۋرەن بەرىكقاجى ۇلى. «بۇل اۋدارما باسقا اۋدارما كىتاپتارىنا قاراعاندا تىم اۋىر بولدى. ويتكەنى كىتاپ اقىل-ەسى كەم بالانىڭ كۇندەلىك ىسپەتتى بايانداماسى ارقىلى بەرىلگەن. ورفوگرافيا, پۋنكتۋاتسيا زاڭدىلىقتارىن بىلمەيتىن بالا ءسوزدى قالاي ەستىسە, سولاي جازۋعا داعدىلانعاندىقتان, العاشقى تاراۋلاردى وقۋ وقىرماندارعا قيىن سوعاتىنى بەلگىلى. شىعارما اقىل-ەسى كەم بالالاردىڭ مەحناتتى تاعدىرىنا قوعامنىڭ نازارىن اۋدارۋ ماقساتىندا جازىلعان. امەريكادا بۇدان 50-60 جىل بۇرىن جارىق كورگەن كىتاپتىڭ ءالى كۇنگە دەيىن وزەكتىلىگى ارتپاسا, كەمىمەگەندىگى كوپ جايتتان حابار بەرسە كەرەك», دەيدى اۋدارماشى.
ايتا كەتەيىك, كىتاپ Allur اۆتوكولىك كومپانياسىنىڭ قارجىلاندىرۋىمەن قازاق تىلىنە اۋدارىلىپ, باسىلىپ وتىر. اتالعان كومپانيا 1 000 دانا كىتاپقا 5,5 ملن تەڭگە بولگەن. ەندى جاڭا شىعارما الماتى وبلىسىنىڭ مەكتەپ كىتاپحانالارىنا تاراتىلادى.