جۇيرىكتەر جارىسى

ارعىماقتار ىرىكتەلدى

بەس كۇن بويى سارىارقانىڭ سايىن دالاسىن ءدۇبىرلى دوداعا بو­لەيتىن ەتنوسپورت تارتىسىنا قو­سى­ل­اتىن ارعىماقتاردى ىرىكتەۋ سايىستارى ءالى دە جالعاسىن تابادى. پاۆلودار قالاسىندا جالاۋىن جەلبىرەتكەن ىرىكتەۋ دوداسىنان كەيىن الماتى قالاسىندا بايگە تۇرلەرىنەن كەزەكتى تۋر ءوتتى. دۇنيەجۇزىلىك كوشپەلىلەر ويىن­دارىندا بايگە تۇرلەرىنەن سىن­عا تۇسەتىن ارعىماقتاردىڭ ارىنىن باعامداۋعا قالىڭ كوپشىلىك جينالدى. «الماتى قالاسىنىڭ كۋبوگى» ءۇشىن وتكەن الامان بايگەگە 39 جۇيرىك قوسىلعان. كومبەگە قارا ءۇزىپ كەلگەن جەتىسۋلىق ات­سەيىس داۋلەت اسىلوۆتىڭ «ۆي­­زا» ەسىمدى ارعىماعى كوم­بەگە قارا ءۇزىپ جەكە- دارا كەل­دى. اۋىز­دىعىمەن الىسقان ارعى­ما­ق­تى تىزگىندەگەن شاباندوز ءالي­حان باقىتحان ۇلى ەندى وسى جۇيرىكپەن دۇنيەجۇزىلىك كوش­پەلىلەر ويىندارىنىڭ بايگەسىنە قوسىلادى. ەكىنشى ورىن جام­بىل وبلىسىنان سايگ ۇلىك قوسقان مۇراتحان ارناتقا بۇيىرىپ, «كۇرەڭ اتى» دا ەتنوسپورت الاما­نىنىڭ جولداماسىن ولجالادى. ءۇشىنشى كەلگەن مىرزاحان دياستىڭ «القيسسا» (جامبىل وبلىسى) ارعىماعى دا بايگەگە قاتىسادى.

دۇنيەجۇزىلىك كوشپەلىلەر ويىندارىنا الامان بايگە بو­يىنشا ەلىمىزدەن التى ات قوسىلسا, شەتەلدىك كوماندالار ءۇش جۇيرىگىن عانا دوداعا سالادى.

قۇنان بايگەسىنە دە سىنشىلار­دىڭ ءتىسىن ساناپ, تۇرقىن پارىقتاپ رۇقسات ەتكەن 27 جۇيرىك دوداعا قوسىلدى. ۇزدىك شىققان ءۇش قۇ­نانعا عانا دۇنيەجۇزىلىك كوش­پەلىلەر ويىندارىنا قاتىسۋ جولداماسى بەرىلەتىندىكتەن, شاباندوزدار ايانىپ قالمادى. الماتى وبلىسىنىڭ تۇرعىنى ەرسۇلتان سەرىكوۆتىڭ «سۇڭقار» اتتى قۇنانىن تىزگىندەگەن ابزال تۇرعانبەك توپتى باستاپ كەلسە, ەكىنشى ورىن ايبەك بەيىسباەۆتىڭ «باقتورىسىنا» (الماتى وبلىسى) بۇيىردى. ۇش­­تىكتى الماتى قالاسىنان ات قوسقان باعلان نۇربوسىنوۆتىڭ «سەنيوريتا» اتتى قۇنانى تۇيىن­دەدى.

دۇنيەجۇزىلىك كوشپەلىلەر ويىندارىندا دا قۇنان بايگەگە ەلىمىزدەن 6 قۇنان قاتىسسا, وزگە مەملەكەتتەردەن كەلگەن ءار كوماندا 3 قۇنانىن قوسادى.

ەر ۇستىندەگى ەپتىلىك

ۇلتتىق جانە ات سپورتى تۇر­لەرىنەن مەملەكەتتىك جاتتىق­تى­رۋشى نۇركەن بايبوريەۆ ەلىمىزدە وتەتىن الاماندا التىن الۋ­عا سپورتشىلار بارىن سالىپ ازىرلىك جۇرگىزىپ جاتقانىن جەت­كىزدى.

«بۇعان دەيىنگى وقۋ-جاتتىعۋ جيىنى, ءتۇرلى سايىستارداعى ناتي­جەنى ەكشەي وتىرىپ, تەڭگە ءىلۋدىڭ ءۇش ءستيلى بويىن­شا ىرىكتەۋدە دارا­لانعان ۇزدىك­تەردى انىقتادىق. وقۋ-جاتتىعۋ جيىنىن كۇشەيتىپ جاتىرمىز, ساڭلاقتارىمىز ۇزدىك شىعا­رى­نا سەنىمىمىز كامىل», دەدى ن.بايبوريەۆ.

ىرىكتەۋدەن وتكەن 3 سپورتشى ەندى دۇنيەجۇزىلىك كوش­پەلىلەر ويىندارىندا «قوس قۇلاش», «بەس بەلەس», «جەتى قۇت» ستيلدەرى بو­يىنشا دوداعا قاتىسادى. «بەس بەلەس­تەن» سىنعا تۇسەتىن بەكنۇر سەرىكوۆ – باتىس قازاقستان وبلىسىنىڭ تۋماسى. جاسوسپىرىمدەر مەن جاس­تار اراسىندا وتكەن قازاقستان چەمپيوناتىنىڭ جەڭىمپازى, ازيا كۋبوگىنىڭ يەگەرى. «جەتى قۇت» ءستيلى بويىنشا باق سىنايتىن باقىت ءتولتاي – تۇركىستان وبلىسىنىڭ شاباندوزى. ەل بىرىنشىلىگىندە توپ جارعان ساڭلاق بيىل تەڭگە ىلۋدەن ازيا كۋبوگىن ولجالادى. «قوس قۇ­لاش» ستيلىندە راحات قامباروۆقا سە­نىم ارتىلماق. تۇركىستان وبلىسىندا ومىرگە كەلگەن راحات – ۇلتتىق سپورت فەستيۆالىندە چەمپيون اتانىپ, ازيا كۋبوگىن ەنشىلەپ, ازيا چەمپيوناتىندا جەڭىسكە جەتكەن ساڭلاق.

تەڭگە ىلۋدەن ۇلتتىق قۇراما مۇشەلەرى دۇنيەجۇزىلىك كوشپە­لىلەر ويىندارىنا وقۋ-جاتتىعۋ جيىنىنىڭ سوڭعى كەزەڭىن 27 تامىز بەن 7 قىركۇيەك ارالىعىندا استانا قالاسىندا وتكىزەدى. مۇنى تۋريزم جانە سپورت مينيسترلىگىنە قاراستى ۇلتتىق جانە ات سپورتى تۇرلەرى ورتالىعى ۇيىمداستىرىپ وتىر. ەتنوسپورت وليمپياداسى سانالاتىن دۇنيەجۇزىلىك كوشپە­لىلەر ويىندارىندا تەڭگە ءىلۋ دوداسى ەتنواۋىل اۋماعىندا 11-13 قىركۇيەك ارالىعىندا وتەدى. يسلامبەك سالجانوۆ باسقاراتىن ۇلتتىق سپورت قاۋىمداستىعىنا قاراستى تەڭگە ءىلۋ فەدەراتسياسىنىڭ جۇمىسى جاندانىپ, ساڭلاقتاردىڭ بايراقتى دودالاردا توپ جارۋىنا بار مۇمكىندىك جاسالىپ وتىر.

كوكپاردان ەسەمىز كەتپەي مە؟

استانا قالاسىندا وتەتىن V دۇنيەجۇزىلىك كوشپەلىلەر ويىندارىندا ەتنوسپورتتىڭ 21 تۇرىنەن دودا وتەتىنى بەلگىلى. دۇنيەجۇزىلىك دودانىڭ مەنشىك يەسى سانالاتىن قىرعىزستان مەملەكەتى كوش­پەلىلەر ويىندارىن وزدەرى ءۇش مارتە وتكىزدى.

شولپان اتا شاھارىندا, اي­گىلى ىستىقكولدىڭ جاعا­لاۋىندا ۇيىمداستىرعان الاماننىڭ باستى باسەكەسى كوكپار بولعانى بەلگىلى. سپورتتىڭ وسى سىنىندا قازاق پەن قىرعىزدىڭ تارتىسى, تاقىم مىقتىلىعىن سىناسۋى قيقۋمەن وتەتىنى امبەگە ايان. 2022 جىلى تۇركيانىڭ يزنيك قالاسىندا وتكەن IV دۇنيەجۇزىلىك كوشپەلىلەر ويىندارىندا كوكپاردان قازاقستان ۇلتتىق قۇراماسى وزبەكستان كوك­پارشىلارىن 8:1 ەسەبىمەن ويسىراتا ۇتىپ, جارتىلاي فينالدا موڭعوليا قۇراماسىن 12:2 ەسەبىمەن ىعىستىرىپ, فينالدا تەگەۋرىندى قارسىلاس قىرعىزستان كوكپارشىلارىن 4:3 ەسەبىمەن ەڭسەرىپ, چەمپيون اتانعان ەدى. بۇل جولى سول جەڭىستى قايتالاي الامىز با؟

كوكپاردان دا, قازاندىققا سالىم سالاتىن كوكبورىدەن دە سىنعا تۇسەتىن قۇرامانىڭ ساڭلاقتارى وقۋ-جاتتىعۋ جيىنىن وتكىزىپ جاتىر. كوكپاردان ۇلتتىق قۇرا­مانىڭ باس باپكەرى لاۋازىمىنا تاعايىندالعان اقىلباي مانكەەۆ شەڭبەرگە وينالاتىن كوكپاردان مەرەيىمىز ۇستەم تۇسكەنىمەن, قىرعىزدىڭ كوكبورى ويىنىنان باسەكەلەستىك وتە جوعارى ەكەنىن جەتكىزدى.

«دۇنيەجۇزىلىك كوشپەلىلەر ويىندارىنا دايىندىق بارىسى جۇيەلى جۇرگىزىلىپ جاتىر. ۇلتتىق قۇرامانىڭ مۇشەلىگىنە وتكەن سپورتشىلاردى ىرىكتەۋ ارقىلى, قارىم-قابىلەتىن سالماقتاي وتىرىپ شاقىرتتىق. كوكپاردان دا, قىرعىزدىڭ كوكبورى ويىنىنان دا قىرعىزستان مەن وزبەكستان قۇراماسى وتە تەگەۋرىندى. كوكبورى­دەن قىرعىز سپورتشىلارى نامىستى قولدان بەرمەسى انىق. وزدەرىنىڭ ءتول ويىنىندا ايانىپ قالمايدى. ال ءبىزدىڭ جىگىتتەر كوكبورىدەن بىرنەشە جىلدان بەرى قازاندىققا ويناعان ەمەس. دەسە دە بارىمىزدى سالامىز», دەدى ا.مانكەەۆ.

ۇلتتىق قۇرامانىڭ مۇشەسى ناۋرىزباي قالتاەۆ سپورتشىلار كوكبورىدەن دە تىنباي ازىرلىك جۇرگىزىپ جاتقانىن ايتتى.

«كوكبورىنىڭ شەڭبەرگە تارتاتىن كوكپاردان ايىرماشىلى­عى – قىرعىزدار ءۇش تايم تارتىس­قا تۇسەدى. كوكپاردى ءبىز ەكى تايم وينايمىز. ارينە, كوكبورىدەن باس­تى قارسىلاس قىرعىز ساڭلاق­تارى­نا قارسى تىڭعىلىقتى ازىر­لىك جۇرگىزىپ جاتىرمىز», دەدى ن.قالتاەۆ.

كوكپار فەدەراتسياسى دۇنيە­جۇزىلىك كوشپەلىلەر ويىندارىنا ازىرلىكتى كۇشەيتۋ ماقساتىندا تاجىريبەلى كەڭەسشىلەردى دە جات­تىعۋ جيىنىنا تارتىپ وتىر.

دايىنداعان –

قۋانىش نۇردانبەك ۇلى,

«Egemen Qazaqstan»