پرەمەر-ءمينيستردىڭ ورىنباسارى قانات بوزىمباەۆ باتىس قازاقستان وبلىسىندا سۋ تاسقىنىنان زارداپ شەككەن تۇرعىندار ءۇشىن سالىنىپ جاتقان ۇيلەر قۇرىلىسىنىڭ بارىسىمەن تانىستى.
جۇمىس ساپارى بارىسىندا قانات بوزىمباەۆ بقو اكىمى ناريمان تورەعاليەۆپەن جانە ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆپەن بىرگە قاراتوبە اۋدانىنداعى قورجىن اۋلىنا, سىرىم اۋدانىنداعى ولەڭتى مەن جىمپيتى اۋىلدارىنا, سونداي-اق دەرقۇل, زاشاعان اۋىلدارىنا جانە ورال قالاسىنىڭ جۇلدىز شاعىن اۋدانىنا باردى.
قورجىن اۋلىندا 3 بولمەلى 90 تۇرعىن ءۇيدىڭ قۇرىلىسى ءجۇرىپ جاتىر. مۇندا ەلەكتر جانە جىلىتۋ جۇمىستارى تولىعىمەن اياقتالدى. 79 ۇيدە ىشكى ارلەۋ جۇمىستارى اياقتالدى. نىساندا 6 مەردىگەر كومپانيا جۇمىس ىستەيدى. ولارمەن كەزدەسۋدە قانات بوزىمباەۆ ارلەۋشىلەر بريگادالارىنىڭ سانىن كوبەيتۋدى جانە قۇرىلىستى ساپالى اياقتاۋدى تاپسىردى.
سىرىم اۋدانىنىڭ ولەڭتى مەن جىمپيتى اۋىلدارىندا تاسقىننان زارداپ شەككەندەر ءۇشىن 68 تيپتىك ءبىر پاتەرلى جانە 10 ەكى پاتەرلى 3 بولمەلى ۇيلەردىڭ قۇرىلىسى جۇرگىزىلىپ جاتىر. بۇگىندە 45 ءۇي تاپسىرىلدى.
ورال ماڭىندا دا اۋقىمدى قۇرىلىس ءجۇرىپ جاتىر. مۇندا سۋ تاسقىنى كەزىندە جالعىز باسپاناسىنان ايىرىلعان ساياجاي تۇرعىندارى ءۇشىن ۇيلەر سالىنۋدا. جۇلدىز شاعىن اۋدانىندا 17 قۇرىلىس كومپانياسى 191 تيپتىك ءۇي قۇرىلىسىن قولعا العان. دەرقۇل اۋلىندا 103 ۇيدە ارلەۋ جۇمىستارى جاسالىپ جاتىر. سونداي-اق زاشاعان اۋلىنداعى 70 ۇيدە ىشكى ارلەۋ جۇمىستارى جۇرگىزىلۋدە, تاعى 7 ءۇيدىڭ شاتىرى جابىلىپ جاتىر.
بقو اكىمى ناريمان تورەعاليەۆتىڭ ايتۋىنشا, ۇيلەردىڭ باسىم بولىگى 1 قىركۇيەككە دەيىن پايدالانۋعا بەرىلەدى. قانات بوزىمباەۆ قۇرىلىس قارقىنىن جەدەلدەتۋدى تاپسىردى.
سونداي-اق وبلىستا 9 994 وتباسى جالپى سوماسى 3,7 ملرد تەڭگە بولاتىن 100 ايلىق ەسەپتىك كورسەتكىش كولەمىندە بىررەتتىك تولەم العان. تاعى 10 222 وتباسىنا كەلگەن زالال ءۇشىن 150 اەك كولەمىندە وتەماقى تولەنگەن. وتەماقىلاردىڭ جالپى سوماسى 3,68 ملرد تەڭگەنى قۇرايدى.