استانا. 23 قاڭتار. قىتاي بەيجىڭ مەن ماسكەۋ ارالىعىنا قۇنى ءبىر جارىم تريلليون يۋان (242 ملرد. دوللار) تۇراتىن جوعارى جىلدامدىقتى تەمىر جول قۇرىلىسىن سالادى. بۇل تۋرالى بەيجىڭ قالالىق اكىمشىلىگىنىڭ Weibo ميكروبلوگى سەرۆيسىنە جولداعان اقپارىنا سىلتەمە جاساعان Bloomberg اگەنتتىگى حابارلادى.
تۆيتتەردىڭ قىتايلىق ۆاريانتىنا 21 قاڭتار كۇنى سالىنعان ماقالادا بۇل تەمىر جولدىڭ ەۋروپا مەن ازيانىڭ اراسىنا ساپار شەگۋ مەن جۇك تاسىمالىن جەڭىلدەتەتىنى اتاپ كورسەتىلگەن. اۆتورلاردىڭ ايتۋلارىنشا, بەيجىڭنەن قازاقستان ارقىلى ماسكەۋگە دەيىن جەتۋ ءۇشىن ەندى ەكى-اق كۇن كەرەك بولادى.
اتالمىش تەمىر جولىنىڭ قۇرىلىسى تۋرالى ۇسىنىس رەسەي ەكونوميكاسى مۇنايدىڭ باعاسى تومەندەۋىنەن تۇزەلۋگە باعىت ۇستاپ, اقش پەن ەۋروپا قاوىم-قاتىناسىنىڭ ۋكرايناداعى داعدارىسقا بايلانىستى ۋشىعا باستاعان كەزىندە ايتىلدى. سونىمەن بىرگە, قىتاي الەم رىنوگىنا ءوز تەحنولوگياسىن جوعارى قارقىندى تەمىر جول جەلىسى ارقىلى تەزىرەك جەتكىزۋگە ۇمتىلىپ وتىر.
«تەمىر جول قۇرىلىسىنا قاتىستى العاشقى وي ءبىرىنشى رەت وتكەن جىلعى قاراشا ايىندا رەسەي مەن قىتاي تابيعي گاز جەتكىزىپ بەرۋ تۋرالى كەلىسىم تاريحىنداعى ەڭ ۇلكەن جوباعا قول قويعان كەزدە ايتىلدى. «رەسەي تەمىر جولدارى» مەملەكەتتىك ااق ءبىرىنشى ۆيتسە-پرەزيدەنتى الەكساندر ميشارين 18 قاراشادا باق وكىلدەرىنە بەرگەن سۇحباتىندا رەسەي شەكاراسىنا دەيىنگى تەمىر جول قۇرىلىسىنىڭ سمەتالىق قۇنى 60 ملرد. دوللار تۇراتىنىن, بۇل جوبا جۇزەگە اسا قالسا, بەيجىڭنەن ماسكەۋگە پويىزبەن جەتۋگە بۇرىنعى 5 كۇننىڭ ورنىنا 30 ساعات كەتەتىنىن ايتقان ەدى.
ون جىلعا سوزىلعان كەلىسسوزدەن كەيىن «گازپروم» ااق گاز ساراپشىسى قىتايمەن اراعا قۇنى 400 ملرد. دوللار تۇراتىن قۇبىر تارتۋ جونىندەگى كەلىسىمگە قول قويدى. ميشارين قاراشا ايىندا جاڭا كولىك جۇيەسىن «اۋقىمىنىڭ ماڭىزدىلىعى جاعىنان» سۋەتس كانالىنا تەڭ دەگەندى جەتكىزدى.
رۋسلان يگىلىك.
دەرەك, سۋرەت: Bloomberg.